ស្ថានការណ៍តានតឹងនៅគួឌីស្ថានអ៊ីរ៉ាក់ ក្រោយបោះឆ្នោតប្រជាមតិទាមទារឯករាជ្យ
ក្នុងពេលកំពុងរង់ចាំលទ្ធផលបោះឆ្នោតប្រជាមតិនៅគួឌីស្ថាន ទាមទារឯករាជ្យពីអ៊ីរ៉ាក់ ទំនាក់ទំនងរវាងរដ្ឋអំណាចតំបន់ស្វ័យតគួឌីស្ថានអ៊ីរ៉ាក់និងរដ្ឋអំណាចកណ្តាលក្រុងបាក់ដាដកាន់តែតានតឹង។ រដ្ឋាភិបាលក្រុងបាក់ដាដបានចេញបញ្ជាអោយពង្រាយកងទ័ពនៅតាមតំបន់ជម្លោះរវាងអ៊ីរ៉ាក់និងគួឌីស្ថាន។ ម្សិលមិញ អាមេរិកបានសំដែងការខកចិត្តដែលគួឌីស្ថានរៀបចំប្រជាមតិទាមទារឯករាជ្យនេះ។
ចុះផ្សាយនៅថ្ងៃ៖ កែប្រែថ្ងៃទី៖
ថ្ងៃចន្ទម្សិលមិញ ប្រជាជននៅតំបន់ស្វ័យតគួឌីស្ថានអ៊ីរ៉ាក់បាននាំគ្នាទៅបោះឆ្នោតប្រជាមតិទាមទារឯករាជ្យពីអ៊ីរ៉ាក់។ អ្នកចូលរួមមានជាង៣លាន៣សែននាក់ គឺមានជាង៧២ភាគរយ នៃអ្នកដែលត្រូវបោះឆ្នោត។ ប៉ុន្តែ នៅខែត្រប្រេងគៀកគូក ជាខែត្រដែលអ៊ីរ៉ាក់និងគួឌីស្ថានឈ្លោះដណ្តើមគ្នានោះ មានជនជាតិតួមេនីស្ថាន និងជនជាតិអារ៉ាប់រស់នៅដែរ។ ជនជាតិទាំង២មិនបានទៅបោះឆ្នោតទេ ព្រោះពួកគេមិនចង់ឃើញគួឌីស្ថានកាន់កាប់ផ្តាច់មុខខែត្រមួយនេះទេ។
យប់មិញ អាជ្ញាធរខែត្រគៀកគូកបានដាក់បម្រាមគោចរក្នុងខែត្រ ដើម្បីចៀសវាងការប៉ះអទង្គិចណាមួយ ប៉ុន្តែ ព្រឹកថ្ងៃអង្គារនេះ បានលើកចេញបម្រាមគោចរទៅវិញហើយ។ ក្នុងពេលកំពុងរង់ចាំលទ្ធផលបោះឆ្នោត គេដឺងថា ជនជាតិគួឌីស្ថានច្បាស់ជាបានបោះឆ្នោតគាំទ្រអោយគួឌីស្ថានក្លាយជារដ្ឋឯករាជ្យពេញលេញ។ តែលោកម៉ាស៊ូត បាហ្សានី ជាប្រធានរដ្ឋអំណាចគួឌីស្ថាន គូសបញ្ជាក់រួចមកហើយថា “ការបោះឆ្នោតនេះមិននាំអោយគួឌីស្ថានប្រកាសទាមទារឯករាជ្យភ្លាមៗទេ។ ការបោះឆ្នោតនេះគឺជាចំណុចចាប់ផ្តើម ដើម្បីចរចាច្បាស់លាស់ជាមួយរដ្ឋអំណាចកណ្តាលក្រុងបាក់ដាដ ដោះស្រាយជម្លោះរវាងភាគីទាង២”។ ក្រុមវិភាគស្ថានការណ៍ធ្លាប់លើកឡើងថា ការបោះឆ្នោតនេះជាសម្ពាធ ដើម្បីអោយគួឌីស្ថានចែករំលែកអំណាចនយោបាយនិងសេដ្ឋកិច្ចជាមួយអ៊ីរ៉ាក់តែប៉ុណ្ណោះ។
ថ្ងៃចន្ទម្សិលមិញ រដ្ឋាភិបាលអ៊ីរ៉ាក់បានបញ្ជាអោយពង្រាយកងទ័ពនៅតាមតំបន់ដែលរដ្ឋអំណាចក្រុងបាក់ដាដនិងគួឌីស្ថានឈ្លោះដណ្តើមគ្នា គឺត្រូវពង្រាយនៅតាមខែត្រប្រេងសំបូរគៀកគូក និងនៅតាមទីតាំងនៅខែត្រនីនីវ ឌីអាឡា និងសាឡាហេបឌីន។ ទីតាំងភាគច្រើននៅតាមខែត្រទាំងនេះ ត្រូវបានកងកម្លាំងគួឌីស្ថានចូលកាន់កាប់នៅឆ្នាំ២០១៤ គឺឆ្លៀតយកមកគ្រប់គ្រងក្នុងពេលដែលអ៊ីរ៉ាក់កំពុងប្រយុទ្ធជាមួយក្រុមភេរវជនរដ្ឋអ៊ីស្លាម។ កន្លងមក គួឌីស្ថាននាំប្រេងពីគៀកគូកទៅក្រៅ មិនដែលឆ្លងកាត់ការអនុញ្ញាតពីរដ្ឋអំណាចក្រុងបាក់ដាដទេ។ អគ្គលេខាធិការអង្គការសហប្រជាជាតិបារម្ភពីស្ថានការណ៍មិននឹងនរ បានអំពាវនាវអោយគួឌីស្ថាននិងអ៊ីរ៉ាក់ចរចាគ្នា។
តួកគី អ៊ីរ៉ង់ និងស៊ីរី មិនទទួលស្គាល់ប្រជាមតិគួឌីស្ថានទេ។ សហគមន៍អន្តរជាតិ អាមេរិក អង្គការសហប្រជាជាតិ មិនចង់អោយមានប្រជាមតិនេះដែរ ព្រោះវាអាចរុញច្រានអោយជនជាតិគួឌីស្ថានរស់នៅតួកគី ស៊ីរី រឺក៏អ៊ីរ៉ង់បះបោរទាមទារឯករាជ្យដូចគ្នាដែរ។ អ៊ីរ៉ង់បានបិទការហោះហើរជាមួយគួឌីស្ថានអ៊ីរ៉ាក់ ខណៈតួកគីបានគំរាមបិទព្រំដែនដីគោក និងបិទបំពង់ប្រេងដែលភ្ជាប់ពីគួឌីស្ថានមកទឹកដីតួកគី ដើម្បីកុំអោយគួឌីស្ថានអាចនាំចេញប្រេងបានទៀត។ លោកអ៊ែរដូហ្កានព្រមានគួឌីស្ថានអោយប្រយ័ត្នពីសង្គ្រាមដែលអាចកើតឡើងជាមួយសហគមន៍ផ្សេងៗ បើគួឌីស្ថានបង្កើតបានរដ្ឋឯករាជ្យរបស់ខ្លួន នៅទីបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ