៣០០០នាក់ស្លាប់ កញ្ញា ខែមរណៈបំផុត នៅស៊ីរី
មានមនុស្សយ៉ាងហោចណាស់ ៣ពាន់នាក់ ក្នុង៩៩៥នាក់ជាជនស៊ីវិល ត្រូវបានស្លាប់ នៅក្នុងខែកញ្ញា ២០១៧នេះ នៅស៊ីរី ! ពោលគឺជាខែដែលមានចំនួនមនុស្សស្លាប់ច្រើនជាងគេបបំផុត គិតចាប់ពីដើមឆ្នាំមក។ នេះបើតាមសេចក្តីប្រកាសរបស់អង្គការសង្កេតការណ៍សិទ្ធិមនុស្សស៊ីរី (OSDH) ចេញផ្សាយនៅថ្ងៃអាទិត្យទី ១តុលា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ជាង៧០%នៃជនរងគ្រោះស៊ីវិល ត្រូវបានស្លាប់ដោយសារការវាយប្រហារផ្លូវអាកាសរបស់រដ្ឋាភិបាលស៊ីរី ឬទ័ពរុស្ស៊ី ឬរបស់សម្ព័ន្ធអន្តរជាតិដឹកនាំដោយសហរដ្ឋអាមេរិក ដែលប្រតិបត្តិការរបស់គេធ្វើឡើងក្នុងក្របខ័ណ្ឌជួយបើកផ្លូវឱ្យកងកម្លាំងថ្មើរជើងវាយសម្រុកលើកចូលសមរភូមិបណ្តេញពួកជីហាតអង្គការរដ្ឋអ៊ីស្លាមនៅខេត្តDeir Ezzor។ កងទ័ពអាកាសរុស្ស៊ីជាសម្ព័ន្ធមិត្ត ជួយកងទ័ពស៊ីរីនៅភាគខាងកើតស៊ីរី ឯយន្តហោះសម្ព័ន្ធអន្តរជាតិ ផ្តល់ជំនួយដល់កងយុទ្ធជនគួដឌីស្ថាននិងអារ៉ាប នៅភាគខាងជើងប្រទេសស៊ីរីផង និងនៅខាងខេត្តDeir Ezzorដែរ។
តុល្យការមរណៈឡើងខ្ពស់កាន់តែខ្លាំងនេះ ក៏បណ្តាលមកពីកងទ័ពអាកាសរុស្ស៊ីនិងសម្ព័ន្ធអន្តរជាតិ បានបង្កើនប្រតិបត្តិការ និងបរិមាណនៃការវាយប្រហារលើបន្ទាយរបស់ពួកអង្គការរដ្ឋអ៊ីស្លាម នៅភាគខាងជើងនិងកើតផង និងការសម្រុកវាយប្រហារកាន់តែខ្លាំងលើតំបន់កាន់កាប់ដោយពួកឧទ្ទាមស៊ីរី ពីសំណាក់កងទ័ពអាកាសរុស្ស៊ីនិងកងទ័ពអាកាសរបស់រដ្ឋាភិបាលក្រុងដាម៉ាស។
ទាក់ទងនឹងចំនួនមនុស្សស្លាប់វិញ ក្នុងជនរងគ្រោះស៊ីវិលទាំង៩៩៥ដែលបានបាត់បង់ជីវិតនៅក្នុងខែកញ្ញាកន្លងទៅនេះ មាន២០៧នាក់ជាកុមារ។ នេះបើតាមរបាយការណ៍អង្គការសង្កេតការណ៍សិទ្ធិមនុស្សស៊ីរីដដែលដែលមានបណ្តាញផ្តល់ព័ត៌មាននៅពេញផ្ទៃប្រទេស។ ដោយឡែកបើតាមអង្គការក្រៅរដ្ឋាភិបាលមានមូលដ្ឋាននៅអង់គ្លេស មានពួកទាហានជីហាតនៃអង្គការរដ្ឋអ៊ីស្លាម និងអង្គការភេរវនិយមស្និទ្ធនឹងអាល់កៃដា ចំនួន៧៣៨នាក់ ត្រូវបានកម្ចាត់។
ផ្ទុះឡើងនៅឆ្នាំ២០១១ ដោយចលនាបាតុកម្មសន្តិនិយមប្រឆាំងនឹងរបបលោកបាស្ហារ អាល់អាសាដ វិបត្តិស៊ីរីបានប្រែក្លាយទៅជាសង្គ្រាមដ៏រ៉ាំរ៉ៃ ដោយមានបរទេសជាច្រើនចូលលូកដៃ ទឹកដីពុះជ្រៀកជាបំណែកតូចៗគ្រប់គ្រងដោយក្រុមភេរវនិយមផង ពួកជីហាតផង។ សង្គ្រាមអូសបន្លាយគ្មានច្រកចេញបានផ្តាច់ជីវិតសរុបអស់ជាង៣៣០០០០នាក់ និងពលរដ្ឋរាប់លាននាក់បង្ខំចិត្តធ្វើបំលាស់ទី និងក្លាយជាជនភៀសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ