យន្តហោះអ៊ីស្រាអែល ធ្វើការវាយប្រហារបំផ្លាញ កាំភ្លើងធំ ស៊ីរី កាលពីថ្ងៃចន្ទម្សិលមិញ
កាលពីថ្ងៃចន្ទម្សិលមិញ យន្តហោះរបស់អ៊ីស្រាអែល បានធ្វើការវាយប្រហារបំផ្លាញកាំភ្លើងធំរបស់ស៊ីរីនៅភាគខាងកើតទីក្រុងដាម៉ាស ដើម្បីឆ្លើយតបទៅនឹងការបាញ់មីស៊ីលរបស់ស៊ីរីសំដៅទៅលើយន្តហោះរបស់អ៊ីស្រាអែល។ យន្តហោះយោធាអ៊ីស្រាអែលដែលកំពុងបំពេញបេសកកម្មហោះឈ្លបយកការណ៍នៅពីលើទឹកដីលីបង់-នេះ ជាការគូសបញ្ជាក់របស់អ្នកនាំពាក្យម្នាក់នៃកងទ័ពអ៊ីស្រាអែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
យន្តហោះរបស់អ៊ីស្រាអែល ពុំបានទទួលរងគ្រោះដោយសារការបាញ់គ្រាប់មីស៊ីលរបស់ស៊ីរីទេនិងបានវិលត្រឡប់ចូលទៅកាន់មូលដ្ឋានខ្លួនវិញដោយពុំមានឧបសគ្គអ្វីឡើយ-នេះជាការគូសបញ្ជាក់របស់លោកវរសេនីយ Jonathan Conricus អ្នកនាំពាក្យម្នាក់របស់កងទ័ពអ៊ីស្រាអែលដែលបានគូសបញ្ជាក់ទៀតថា “ប្រព័ន្ធកាំភ្លើងធំរបស់ស៊ីរី ត្រូវបានយន្តហោះអ៊ីស្រាអែលធ្វើការបង្រ្កាបទាន់”។
អ្នកនាំពាក្យរបស់កងទ័ពអ៊ីស្រាអែល បានលើកបញ្ជាក់ទៀតថា “គឹជាលើកទីមួយហើយចាប់តាំងពីការផ្ទុះសង្គ្រាមលើកតំបូងនៅស៊ីរីក្នុងឆ្នាំ២០១១មក ដែលកងទ័ពស៊ីរី បានបាញ់គ្រាប់មីស៊ីលតម្រង់សំដៅទៅលើយន្តហោះអ៊ីស្រាអែល។ យន្តហោះអ៊ីស្រាអែលដែលកំពុងបំពេញបេសកកម្មឈ្លបយកការណ៍នៅពីលើដែនដីប្រទេសលីបង់។
អ្នកនាំពាក្យរបស់កងទ័ពអ៊ីស្រាអែលដដែលថែមទាំងបានព្រមានប្រាប់ទៀតថា "គឺរបបស៊ីរីនោះឯងដែលជាអ្នកទទួលខុសត្រូវទាំងស្រុងនៅលើហេតុការណ៍បាញ់គ្រាប់មីស៊ីលសំដៅប្រឆាំងទៅលើយន្តហោះអ៊ីស្រាអែលនិងរាល់ការវាយប្រហារទាំងឡាយដែលកើតចេញពីទឹកដីស៊ីរី”។
លើសពីនេះ ឧត្តមសេនីយអ៊ីស្រាអែល បានអះអាងទៀតថា”ដើម្បីជាផលប្រយោជន៍រួមនៅក្នុងកិច្ចការពារថែរក្សាស្ថិរភាពនៅក្នុងតំបន់ អ៊ីស្រាអែលពុំដែលមានចេតនាណាមួយឡើយ ក្នុងការបង្ករឲ្យមានអស្ថិរភាពនៅក្នុងតំបន់”។
គួរបញ្ជាក់ដែរថាចាប់តាំងពីសង្គ្រាមស៊ីវីលស៊ីរីបានផ្ទុះឡើង អ៊ីស្រាអែលបានធ្វើការវាយប្រហារតាមអាកាសលើទឹកដីស៊ីរី គឺដើម្បីប្រឆាំងទៅលើក្បួនយាន្តយន្តដែលដឹកសព្វាវុធទៅអោយពួកអ៊ីស្លាម Hezbollah លីបង់តែប៉ុណ្ណោះ។ ចលនាអ៊ីស្លាមលីបង់ដែលប្រកាន់និកាយអ៊ីស្លាមស៊ីអីត ជាសម្ព័ន្ធយោធាមួយរបស់របបលោក Bachard al-Assad។
ម្យ៉ាងទៀត ឧប្បតិហេតុនេះ ត្រូវបានប្រព្រឹត្តទៅជួនចំពេលដែលរដ្ឋមន្ត្រីការពារជាតិរុស្ស៊ីលោក Sergueï Shoïgu អញ្ជើញទៅបំពេញទស្សនកិច្ចនៅលើទឹកដីអ៊ីស្រាអែលកាលពីថ្ងៃចន្ទម្សិលមិញដែរ។
ប្រទេសរុស្ស៊ីដែលគាំទ្ររបបលោក Bachar al-Assad និងបានចូលរួមផងដែរខាងផ្នែកយោធានៅលើទឹកដីស៊ីរីចាប់តាំងពីឆ្នាំ ២០១៥មកម្ល៉េះ ដើម្បីធ្វើការប្រយុទ្ធប្រឆាំងទល់នឹងពួកបះបោរស៊ីរីនិងពួកអ៊ីស្លាមជ្រុលនិយមជីហាតនៃអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ