ទីក្រុងរ៉ាកានៅស៊ីរីត្រូវបានរំដោះទាំងស្រុងពីកណ្តាប់ដៃអង្គការរដ្ឋអ៊ីស្លាម
នៅក្នុងប្រទេសស៊ីរី បន្ទាប់ពីបានបើកយុទ្ធនាការវាយប្រហារអស់ជាច្រើនខែមក កម្លាំងសម្ព័ន្ធមិត្តអន្តរជាតិ និងអង្គការសង្កេតការណ៍សិទ្ធិមនុស្សស៊ីរីបានប្រកាសឲ្យដឹងពីការដណ្តើមបានទាំងស្រុងនូវទីក្រុងរ៉ាកាពីកណ្តាប់ដៃអង្គការរដ្ឋអ៊ីស្លាម។ ចំណែកកម្លាំងប្រជាធិបតេយ្យស៊ីរីបានប្រកាសពីការកំចាត់ពួកជីហាតសេសសល់ចុងក្រោយ និងថា ប្រតិបត្តិសឹកនៅក្នុងទីក្រុងរ៉ាកាបានបិទបញ្ចប់ជាផ្លូវការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
« ប្រតិបត្តិការយោធានៅរ៉ាកាបានបិទបញ្ចប់ ហើយទីក្រុងរ៉ាកាទាំងមូលបានស្ថិតក្រោមការគ្រប់គ្រងរបស់កម្លាំងប្រជាធិបតេយ្យស៊ីរី » នេះជាការប្រកាសរបស់អ្នកនំាពាក្យកម្លាំងប្រជាធិបតេយ្យស៊ីរីលោក តាតាល់ សេឡូ។ លោកតាតាល់បានបន្ថែមថា ទីក្រុងរ៉ាកាបានរំដោះមែន តែកម្លាំងប្រជាធិបតេយ្យស៊ីរីដែលរួមគ្នាដោយកម្លាំងគួដ និងអារ៉ាប់បានបន្តប្រតិបត្តិការចូលឆែកឆេរនៅតាមអាគារ និងទីតាំងសំខាន់ៗមួយចំនួន ពិសេសពហុកីឡាដ្ឋាន និងមន្ទីរពេទ្យដែលជាកន្លែងលាក់ខ្លួនចុងក្រោយរបស់ពួកជីហាត។ ទន្ទឹមគ្នានេះ ក៏នៅមានប្រតិបត្តិការបោសសំអាតគ្រាប់មីន និងគ្រាប់បង្កៃផ្សេងទៀតដែលបង្កប់ដោយពួកជីហាតមុននឹងពួកវាដកថយ។
ព័ត៌មានផ្តល់ដោយកម្លាំងប្រជាធិបតេយ្យស៊ីរីឲ្យដឹងថា មានវត្តមានពួកជីហាតបរទេស និងក្រុមគ្រួសាររបស់ជាច្រើននាក់បានលាក់ខ្លួននៅពហុកីឡាដ្ឋាន និងក្នុងមន្ទីរពេទ្យ។ តែនៅមិនទាន់ព័ត៌មានណាមួយដែលបញ្ជាក់ពីជោគវាសនារបស់ពួកគេនៅឡើយទេ។ គួររម្លឹកជូនថា តាំងពីមានបដិវត្តពណ៌ផ្ទុះនៅស៊ីរីក្នុងឆ្នាំ ២០១១ មក ទីក្រុងរ៉ាកាបានធ្លាក់ក្រោមការកាន់កាប់របស់ក្រុមប្រឆាំងរដ្ឋាភិបាលស៊ីរីរបស់លោកប្រធានាធិបតីអាសាដក្នុងឆ្នាំ ២០១៣។ ក្រោយមក ទីក្រុងស៊ីរីមួយនេះក៏ត្រូវបានពួកជីហាតអង្គការរដ្ឋអ៊ីស្លាមវាយដណ្តើមយកធ្វើជាទីក្រុងរបស់ខ្លួនក្នុងឆ្នាំ ២០១៤។
ទីក្រុងរ៉ាកាបានក្លាយជានិមិត្តរូបនៃអំពើឃោរឃៅព្រៃផ្សែប្រព្រឹត្តដោយអង្គការរដ្ឋអ៊ីស្លាម ព្រោះនៅទីនោះហើយដែលពួកជីហាតបានរៀបចំផែនការវាយប្រហារភេរវកម្មយ៉ាងបង្ហូរឈាមនៅក្នុងប្រទេសជាច្រើន ពិសេសប្រទេសនៅអឺរ៉ុប។ តួលេខផ្តល់ដោយកម្លាំងប្រជាធិបតេយ្យស៊ីរីឲ្យដឹងថា ប្រតិបត្តិសឹករបស់កម្លាំងប្រជាធិបតេយ្យស៊ីរីដោយមានជំនួយពីកម្លាំងសម្ព័ន្ធមិត្តអន្តរជាតិដើម្បីរំដោះទីក្រុងរ៉ាកានារយៈពេលប៉ុន្មានខែនេះអាចនឹងមានមនុស្សស្លាប់ ៣ ២៥០នាក់ក្នុងនោះមានជនស៊ីវិលចំនួន ១ ១៣០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ