លោកប្រធានាធិបតីលីបង់មីសែល អាអ៊ូនបានអំពាវនាវឲ្យលោកសាដ ហារីរីត្រឡប់ចូលស្រុកវិញ
នៅថ្ងៃសុក្រ ទី១០ វិច្ឆិកា លោកប្រធានាធិបតីលីបង់មីសែល អាអ៊ូនបានអំពាវនាវនាយករដ្ឋមន្រ្តីរបស់លោក គឺលោកសាដ ហារីរីដែលកំពុងស្ថិតក្នុងប្រទេសអារ៉ាប៊ីសាអូឌីតឲ្យវិលចូលស្រុកវិញ។ ការប្រកាសរបស់លោកអាអ៊ូនយ៉ាងដូចនេះបានធ្វើឡើង នៅក្រោយជំនួបជាមួយបេសកជនអារ៉ាប៊ីសាអូឌីតប្រចាំទីក្រុងបេរូតលោកវ៉ាលីដ ប៊ូខារី។ សូមរម្លឹកជូនថា លោកសាដ ហារីរីបានប្រកាសលាចុះពីមុខតំណែងពីទីក្រុងរីយ៉ាដ ប្រទេសអារ៉ាប៊ីសាអូឌីតកាលពីថ្ងៃសៅរ៍ ទី៤ វិច្ឆិកា និងបានបន្តស្ថិតនៅទីនោះរហូតមកដល់សព្វថ្ងៃ។
ចុះផ្សាយនៅថ្ងៃ៖
ស្តាប់ - ០២:១៣
ព្រឹត្តិការណ៍នៃការប្រកាសលាចុះពីតំណែងនាយករដ្ឋមន្រ្តីលីបង់របស់លោកសាដ ហារីរីពីប្រទេសអារ៉ាប៊ីសាអូឌីតបាន និងកំពុងបន្តធ្វើឲ្យមជ្ឈដ្ឋានទូទៅនៅលីបង់ភ្ញាក់ផ្អើលផង និងព្រួយបារម្ភផង ពិសេសគណបក្ស និងមនុស្សជំនិតរបស់លោកហារីរី។ អ្វីដែលពួកគេព្រួយបារម្ភខ្លាំង គឺបរិបទ និងកាលៈទេសៈនៃការប្រកាសលាលែងរបស់លោកហារីរីពីទឹកដីអារ៉ាប៊ីសាអូឌីត។ នៅក្នុងន័យនេះ លោកប្រធានាធិបតីលីបង់អាអ៊ូនបាននិយាយប្រាប់បេសកជនអារ៉ាប៊ីសាអូឌីតប្រចាំទីក្រុងបេរូតលោកវ៉ាលីដ ប៊ូខារីត្រង់ៗថា លោកមិនអាចទទួលយកបានទេនូវរបៀបនៃការលាលែងរបស់លោកហារីរី និងបានអំពាវនាវឲ្យលោកហារីរីវិលត្រឡប់ចូលស្រុកវិញ។
លោកអាអ៊ូនបានបន្ថែមថា លោកមិនអាចទទួលយកការលាចុះពីតំណែងរបស់លោកហារីរីបានទេ ល្គឹកណាលោកហារីរីមិនត្រឡប់ចូលលីបង់វិញដើម្បីបញ្ជាក់ឲ្យបានច្បាស់ពីមូលហេតុនៃការលាលែងនោះ។ ការអំពាវនាវដូចគ្នានេះក៏មានពីសហគមន៍សាសនាស៊ុយនីតនៅលីបង់ និងសហគមន៍ពលរដ្ឋលីបង់ដែរ។ លោកវ៉ាលីដ យុមប្លាត ប្រធានសហគមន៍លីបង់បានបញ្ជាក់ថា វាល្មមដល់ពេលដែលលោកហារីរីត្រឡប់ចូលលីបង់វិញដោយស្ម័គ្រចិត្ត ឬដោយប្រើកម្លាំង និងថា លោកហារីរីគ្មានជម្រើសអ្វីផ្សេងទេ។ ក្រៅពីការអំពាវនាវឲ្យលោកហារីរីវិលត្រឡប់ចូលស្រុកវិញ លោកមីសែល អាអ៊ូនក៏បានស្នើទីក្រុងរីយ៉ាដឲ្យពន្យល់បំភ្លឺលើពាក្យចចាមអារ៉ាមដែលថា រដ្ឋអំណាចអារ៉ាប៊ីសាអូឌីតបានឃុំលោកហារីរី និងបានបង្ខំលោកហារីរីឲ្យលាចុះពីតំណែង។
ចំណែកប្រមុខចលនាហេស្បូឡាលីបង់លោកហាសាន ណាស្រាឡាបានថ្លែងតាមកញ្ចក់ទូរទស្សន៍នាថ្ងៃសុក្រ ទី១០ វិច្ឆិកាដោយចោទអារ៉ាប៊ីសាអូឌីតត្រង់ៗថា ជាអ្នកដែលបានឃុំខ្លួនលោកហារីរី រារាំងលោកហារីរីមិនឲ្យត្រឡប់ចូលលីបង់វិញ និងថែមទាំងបានញុះញង់អ៊ីស្រាអែលឲ្យវាយប្រហារលីបង់ទៀតផង។ យ៉ាងណាក៏ដោយ អារ៉ាប៊ីសាអូឌីតនៅមិនទាន់បញ្ចេញប្រតិកម្មយ៉ាងណាទេ តែលោកប្រមុខការទូតបារាំង Jean-Yves Le Drian បានប្រាប់ឲ្យដឹងនាថ្ងៃសុក្រ ទី១០ វិច្ឆិកាថា លោកហារីរីមានសិទ្ធិដើរហើរដោយសេរីនៅក្នុងទឹកដីអារ៉ាប៊ីសាអូឌីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ