អ.ស.ប.ពន្យារជំនួយមនុស្សធម៌នៅតំបន់ឧទ្ទាមស៊ីរី មួយឆ្នាំថែមទៀត
ក្រុមប្រឹក្សាសន្តិសុខអង្គការសហប្រជាជាតិបានអនុម័តលើសេចក្តីសម្រេចអនុញ្ញាតអោយបន្តដឹកជំនួយមនុស្សធម៌ ទៅតំបន់កាន់កាប់ដោយក្រុមឧទ្ទាមនៅស៊ីរី ថែម មួយឆ្នាំទៀត។ រុស្ស៊ី ចិននិងបូលីវី ធ្វើអនុប្បវាទ ប៉ុន្តែ គ្មានវេតូជំទាស់សេចក្តីសម្រេចនេះទេ។ ស្ថានការណ៍ស៊ីរីនៅតែបន្តដុនដាប។ ជនស៊ីវិល១៩នាក់ ក្នុងនោះមានកុមារ៧នាក់ បានស្លាប់ក្នុងការវាយប្រហារ នៅតំបន់កាន់កាប់ដោយក្រុមឧទ្ទាម ក្នុងខែត្រអ៊ីតឡេប ភាគពាយព្យប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ក្នុងចំណោមមនុស្ស១៣លាននាក់នៅស៊ីរី ដែលត្រូវការជំនួយមនុស្សធម៌ មានមនុស្សប្រហែល៣លាននាក់ ដែលបានទទួលជំនួយពីអង្គការសហប្រជាជាតិ និងអង្គការក្រៅរដ្ឋាភិបាលដែលបំពេញបេសកកម្មជួយប្រជាជនតាមតំបន់ក្រុមឧទ្ទាមស៊ីរី។ សេចក្តីសម្រេចពន្យារពេលផ្តល់ជំនួយមនុស្សធម៌ទៅតំបន់ក្រុមឧទ្ទាមស៊ីរី ត្រូវបានក្រុមប្រឹក្សាសន្តិសុខអង្គការសហប្រជាជាតិអនុម័ត ១២សម្លេង ទល់នឹងអនុប្បវាទ៣សម្លេង គឺអនុប្បវាទរបស់រុស្ស៊ី ចិន និងបូលីវី ប៉ុន្តែ គ្មានវេតូជំទាស់ទេ។ ការដឺកស្បៀងទៅជួយប្រជាជននៅតំបន់ក្រុមឧទ្ទាមនឹងពន្យារថែម១ឆ្នាំ រហូតដល់ថ្ងៃ១០មករា ឆ្នាំ២០១៩។
រុស្ស៊ីជាដៃគូរបស់រដ្ឋាភិបាលស៊ីរី ប្រាប់ថា គ្មានបំណងបង្អាក់ដំណើរការដឹកស្បៀងមនុស្សធម៌ស៊ីរីទេ គ្រាន់តែជំទាស់ការពន្យារបែបបច្ចេកទេស នៃសេចក្តីសម្រេចប៉ុណ្ណោះ។ រុស្ស៊ីទាមទារអោយពង្រឹងការត្រួតពិនិត្យការដឹកស្បៀងទាំងនោះ ដើម្បីចៀសកុំអោយមានការលួចលាក់ដឹកអាវុធ ដើម្បីលក់ក្នុងទីផ្សារងងឹត។
សេចក្តីសម្រេចពន្យារពេលដឹកជំនួយមនុស្សធម៌នេះ ស្នើដោយជប៉ុន អេហ្ស៊ីប និងស៊ុយអែត ជាសំណើសុំអោយរដ្ឋាភិបាលស៊ីរីផ្តល់ចម្លើយអោយឆាប់រហ័សដល់ការស្នើផ្សេងៗរបស់អង្គការសហប្រជាជាតិ ហើយបើអាច រដ្ឋាភិបាលស៊ីរីគួរតែផ្តល់ចម្លើយជាវិជ្ជមាន។ សេចក្តីសម្រេចគូសបញ្ជាក់ផងដែរថា ស្ថានការណ៍ស៊ីរីនៅតែបន្តធ្លាក់ដុនដាប ព្រោះស៊ីរីនៅមិនទាន់រកបានដំណោះស្រាយនយោបាយនៅឡើយ។ កិច្ចពិភាក្សាសន្តិភាពក្រុងហ្សឺណែវ រវាងរដ្ឋាភិបាល និងក្រុមឧទ្ទាមស៊ីរី ជុំទី៨ហើយ ក៏នៅតែមិនផ្តល់លទ្ធផលអ្វីយកជាការបាន។ អង្គការសហប្រជាជាតិនឹងស្នើប្រតិទិនមួយ សម្រាប់ការបោះឆ្នោត ទៅអោយគ្រប់ភាគីក្នុងជម្លោះស៊ីរី។ អង្គការសហប្រជាជាតិក៏នឹងស្នើនិតិវិធីកំណែទម្រង់ផ្សេងៗដល់ពួកគេផងដែរ។
ស្ថានការណ៍ស៊ីរីបន្តធ្លាក់ដុនដាប។ ជនស៊ីវិល១៩នាក់ ក្នុងនោះមានកុមារ៧នាក់ស្លាប់ក្នុងការវាយប្រហារ ក្នុងតំបន់មួយកន្លែងកាន់កាប់ដោយក្រុមឧទ្ទាមស៊ីរី នៅភាគពាយព្យប្រទេស។ ថ្ងៃអង្គារម្សិលមិញវិញ មនុស្ស៣នាក់ ក្នុងនោះមានកុមារម្នាក់បានសម្លាប់ក្នុងការទំលាក់គ្រាប់បែក នៅសង្កាត់មួយកន្លែងភាគខាងកើតក្រុងដាម៉ាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ