ប្រមុខសាសនាអ៊ីស្លាមអ៊ីរ៉ង់ចោទសត្រូវរបស់អ៊ីរ៉ង់ថា ជាអ្នកបង្កចលាចល
នៅក្នុងប្រទេសអ៊ីរ៉ង់ បាតុកម្មប្រឆាំងរដ្ឋាភិបាលបានឈានដល់ថ្ងៃទី៦ ដោយបានបណ្តាលឲ្យមានមនុស្សស្លាប់សរុប ២១នាក់ក្នុងនោះមានបាតុករ ១៦នាក់ របួសជាច្រើននាក់ និងចាប់ខ្លួនចំនួន ៤៥០នាក់។ បន្ទាប់ពីបាននៅស្ងៀមតាំងពីថ្ងៃផ្ទុះបាតុកម្មមក លោកប្រមុខសាសនាអ៊ីស្លាមអ៊ីរ៉ង់អាលី ខាមេណីបានបញ្ចេញប្រតិកម្មនៅថ្ងៃអង្គារ ទី២ មករាដោយចោទក្រុមសត្រូវអ៊ីរ៉ង់ថា ជាអ្នកបង្កចលាចលនៅអ៊ីរ៉ង់ពេលនេះ។
ចុះផ្សាយនៅថ្ងៃ៖
ស្តាប់ - ០១:៣៧
នៅក្នុងសេចក្តីថ្លែងការណ៍លើកទី១ តាមកញ្ចក់ទូរទស្សន៍ទាក់ទងនឹងបាតុកម្មពេលនេះ លោកប្រមុខសាសនាអ៊ីស្លាមអ៊ីរ៉ង់ដ៏មានឥទ្ធិពលអាលី ខាមេណីបានចង្អុលចំមុខក្រុមសត្រូវរបស់អ៊ីរ៉ង់ថាជាអ្នកដែលស្ថិតពីក្រោយបាតុកម្ម។ « នៅក្នុងព្រឹត្តិការណ៍នារយៈពេលប៉ុន្មានថ្ងៃចុងក្រោយនេះ ក្រុមសត្រូវបានរួមកម្លាំងគ្នាដោយប្រើគ្រប់មធ្យោបាយ លុយកាក់ អាវុធ នយោបាយ និងសេវាសន្តិសុខដើម្បីបង្កើតបញ្ហាដល់របបអ៊ីស្លាមនៅអ៊ីរ៉ង់ » នេះជាការថ្លែងរបស់លោកខាមេណី។
ប្រមុខសាសនាអ៊ីស្លាមអ៊ីរ៉ង់រូបនេះដដែលបានបន្ថែមថា ក្រុមសត្រូវរបស់អ៊ីរ៉ង់រង់ចាំឱកាសតែមួយគត់ដើម្បីលូកដៃ និងវាយប្រហារលើប្រជាជនអ៊ីរ៉ង់។ ទោះបីជាលោកខាមេណីមិនបាននិយាយចំឈ្មោះសត្រូវរបស់អ៊ីរ៉ង់ក៏ដោយក៏គេដឹងថា លោកចង់សំដៅលើសហរដ្ឋអាមេរិក និងអារ៉ាប៊ីសាអូឌីត។ សហរដ្ឋអាមេរិកដែលលោកដូណាល់ ត្រាំបានបញ្ចេញប្រតិកម្មដល់ទៅ ៣ដងទាក់ទងនឹងបាតុកម្មនៅអ៊ីរ៉ង់ពេលនេះ។ លោកត្រាំបាននិយាយត្រង់ៗថា ពេលវេលានៃការផ្លាស់ប្តូរនៅអ៊ីរ៉ង់បានឈានមកដល់ហើយ។
ប្រតិកម្មរបស់លោកខាមេណីពេលនេះបានធ្វើឡើង ១ថ្ងៃក្រោយប្រតិកម្មរបស់លោកប្រធានាធិបតីអ៊ីរ៉ង់ហាសាន រ៉ូហានីដែលចោទក្រុមមួយក្តាប់តូចពីបទបង្កឲ្យមានភាពច្របូកច្របល់ និងសន្យាចាត់វិធានការចាស់ដៃ។ ក្រៅពីប្រតិកម្មរបស់ថ្នាក់ដឹកនាំកំពូល ក៏មានប្រតិកម្មពីអ្នកនយោបាយ និងយោធាគ្រប់ជាន់ថ្នាក់ដែលថា រដ្ឋអំណាចនឹងមិនអាចទទួលយកបានទៀតឡើយនូវអំពើហិង្សា និងត្រៀមខ្លួនផ្តន្ទាទោសលើក្រុម ឬជនណាដែលព្យាយាមធ្វើបាតុកម្មជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ