តួកគី៖ អាមេរិកសន្យាឈប់ផ្តល់អាវុធឲ្យក្រុមគួកឌីស្ថាន នៅស៊ីរី
អាមេរិកបានសន្យាទៅរដ្ឋាភិបាលតួកគីថា នឹងឈប់ផ្តល់សព្វាវុធដល់ក្រុមគួកឌីស្ថាននៅស៊ីរី YPG តទៅទៀតហើយ។ ក្រុមទាហានគួកឌីស្ថាននៅស៊ីរី ដែលទាហានរដ្ឋាភិបាលតួកគីបានបើកការវាយប្រហារដ៏សន្ធឹក ចាប់តាំងពីថ្ងៃទី ២០មករាមក។ នៅបើតាមការប្រកាសរបស់វិមានប្រធានាធិបតីតួកគី នៅថ្ងៃសៅរ៍ទី២៧មករា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
ការប្រកាសរបស់វិមានប្រធានាធិបតីតួកគី ធ្វើឡើងនៅក្រោយ អ្នកនាំពាក្យរបស់លោកប្រធានាធិបតីអ៊ែរដូហ្កាន បានជួបសន្ទនាតាមទូរស័ព្ទជាមួយ ទីប្រឹក្សាផ្នែកសន្តិសុខជាតិរបស់លោក ដូណាល់ ត្រាំ កាលពីល្ងាចថ្ងៃសុក្រ។ តាមរដ្ឋាភិបាលតួកគី ទីប្រឹក្សាសន្តិសុខជាតិអាមេរិក លោកH.R.McMasterបានអះអាងថា អាមេរិកនឹងលែងផ្តល់អាវុធទៅឲ្យក្រុមទាហានគួកឌីស្ថាន ស៊ីរី។
សូមអាន៖ អាមេរិកបំពាក់អាវុធឲ្យក្រុមគួឌីស្ថាន នៅស៊ីរី ដើម្បីប្រយុទ្ធប្រឆាំងនឹងក្រុមជីហាត
កន្លងមក រដ្ឋាភិបាលតួកគី របស់លោកអ៊ែរដូហ្កាន ធ្លាប់បានអំពាវនាវទៅវ៉ាស៊ីនតោន ឲ្យឈប់ផ្តល់អាវុធ ដល់ក្រុមទាហានគួកឌីស្ថាន នៅស៊ីរី បើសិនមិនចង់ប្រឈមមុខប្រយុទ្ធជាមួយ កងទ័ពតួកគី។ តាំងពីថ្ងៃទី២០មករាមក កងទ័ពតួកគី ដែលអះអាងគាំទ្រ ក្រុមទាហានស៊ីរី សេរី បានបើកសមរភូមិប្រយុទ្ធ នៅក្នុងទឹកដី ស៊ីរី ដើម្បី វាយប្រហារតាមផ្លូវគោក និងផ្លូវអាកាសទៅលើក្រុមទាហានគួកឌីស្ថាន នៅស៊ីរី ដែលទទួលជំនួយសព្វាវុធពីអាមេរិក។ តួកគីវិញ បានចោទប្រកាន់ថា ក្រុមគួកឌីស្ថាននៅស៊ីរី ថា ជាភេរវជន បក្សពួកគាំទ្រ ក្រុមគួកឌីស្ថានតួកគី ដែលជាសត្រូវសួរពូជរបស់រដ្ឋាភិបាលតួកគី។
នៅថ្ងៃសុក្រ ប្រធានាធិបតីតួកគី លោកអ៊ែរដូហ្កាន បានព្រមានពង្រីកប្រតិបត្តិការយោធា វាយសម្រុកទៅភាគខាងកើតរបស់ស៊ីរី ដែលនៅជាប់នឹងព្រំដែនអ៊ីរ៉ាក់។ ប្រតិបត្តិការទ័ពតួកគី នៅស៊ីរី ប្រឆាំងនឹងក្រុមគួកឌីស្ថានស៊ីរី នៅព្រំដែនស៊ីរី និងអ៊ីរ៉ាក់ នឹងបង្កជាឧបសគ្គ ការលំបាកដល់ការងាររបស់អាមេរិក ដែលកំពុងពង្រាយទ័ព២ពាន់នាក់ សម្រាប់បណ្តុះបណ្តាលក្រុមគួកឌីស្ថាននៅស៊ីរី សម្រាប់ប្រយុទ្ធប្រឆាំងនឹងក្រុមជីហាតអង្គការរដ្ឋអ៊ីស្លាម នៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ