អ៊ីស្រាអែលព្រមានអ៊ីរ៉ង់នៅក្រោយយន្តហោះចម្បាំងរបស់ខ្លួនផ្ទុះធ្លាក់ដោយសារមីស៊ីលស៊ីរី
ចុះផ្សាយនៅថ្ងៃ៖
ស្តាប់ - ០៧:១៣
ប្រតិកម្មមានធ្លាក់ព្រោងព្រាត នៅបន្ទាប់ពីអ៊ីស្រាអែលបានបើកប្រតិបត្តិការយោធាទ្រង់ទ្រាយធំ វាយប្រហារទៅលើទីតាំងកងទ័ពចំនួន ១២កន្លែង ក្នុងទឹកដីស៊ីរី។ នៅថ្ងៃសៅរ៍ម្សិលមិញ យន្តហោះចម្បាំងអ៊ីស្រាអែលបានបាញ់បំផ្លាញប្រព័ន្ធការពារមីស៊ីលរបស់ស៊ីរី ចំនួន៨ ហើយនិងវាយប្រហារទៅលើទីតាំងយោធារបស់អ៊ីរ៉ង់ ក្នុងទឹកដីស៊ីរី។ នេះបើតាមការប្រកាសរបស់ក្រសួងការពារជាតិអ៊ីស្រាអែល។ នៅក្នុងសេចក្តីថ្លែងការណ៍រួម អ៊ីរ៉ង់ ក្រុមអេស្បូឡាលីបង់ និងស៊ីរីបានថ្កោលទោសសកម្មភាពរំលោភឈ្លានពានរបស់អ៊ីស្រាអែលលើអធិបតេយ្យភាពស៊ីរី។
អ៊ីស្រាអ៊ែលនៅថ្ងៃសៅរ៍ម្សិលមិញបានបញ្ជូនយន្តហោះចម្បាំងរបស់ខ្លួន ទៅបាញ់ប្រហារជាបន្តបន្ទាប់ លើទីតាំងយោធាចំនួន១២ របស់រដ្ឋាភិបាលស៊ីរី អ៊ីរ៉ង់ ក្នុងទឹកដីស៊ីរី នៅបន្ទាប់ពីយន្តហោះចម្បាំងរបស់ខ្លួនត្រូវបានមីស៊ីលស៊ីរី បាញ់ទម្លាក់ ហើយនិងនៅក្រោយអ៊ីស្រាអែលបាញ់កម្ទេចយន្តហោះដ្រូនរបស់អ៊ីរ៉ង់។
អ៊ីរ៉ង់ ស៊ីរី និងក្រុមទាហានអេស្បូឡា នៅលីបង់បានចេញសេចក្តីថ្លែងការណ៍រួម ចោទប្រកាន់អ៊ីស្រាអែលថា បានរំលោភឈ្លានពានដែនអធិបតេយ្យភាពរបស់ស៊ីរី។ រុស្ស៊ី ដែលកំពុងធ្វើប្រតិបត្តិការយោធានៅក្នុងទឹកដីស៊ីរីបានអំពាវនាវឲ្យភាគីជម្លោះ អត់ធ្មត់ ឈប់ធ្វើសកម្មភាព ដែលអាចញុះញង់បង្កសង្រ្គាម។ ក្រសួងការបរទេសអាមេរិកវិញ បានចេញមុខការពារជំហរអ៊ីស្រាអែល ដែលជាសម្ព័ន្ធមិត្ត និងបានអំពាវនាវប្រាប់ឲ្យអ៊ីរ៉ង់ឈប់ធ្វើសកម្មភាព ដែលបំផ្លាញដល់សន្តិភាព ហើយនិងស្ថិរភាពនៅតំបន់ដើមបូព៌ា។ អគ្គលេខាធិការអង្គការសហប្រជាជាតិ នៅថ្ងៃអាទិត្យនេះ បានអំពាវនាវឲ្យគ្រប់ភាគីឈប់បង្កជម្លោះ និងត្រូវគិតគូរដល់អាយុជីវិតរបស់ប្រជាជនស៊ីវិលស៊ីរី ដែលនៅក្នុងតែខែកុម្ភៈនេះ បានរងគ្រោះ ស្លាប់ជីវិតដល់ទៅ ១ពាន់នាក់ ដោយសារការវាយប្រហារពីលើអាកាស។
យន្តហោះដ្រូនបើកយកការណ៍របស់អ៊ីរ៉ង់ បានក្លាយជាដើមហេតុ ដំបូង ធ្វើឲ្យអ៊ីស្រាអែល សម្រេចបញ្ជូនយន្តហោះចម្បាំងទៅវាយប្រហារក្នុងទឹកដីស៊ីរី។ ចាប់តាំងពីសង្រ្គាមស៊ីវិល សង្រ្គាមជាមួយក្រុមជីហាតអង្គការរដ្ឋអ៊ីស្លាម ចាប់ផ្ទុះឡើងនៅឆ្នាំ ២០១១នៅស៊ីរី នេះជាលើកទី១ដែលអ៊ីស្រាអែលបើកប្រតិបត្តិការយោធា ទ្រង់ទ្រាយធំ ក្នុងទឹកដី ស៊ីរី។ កន្លងមក គេមិនដែលឃើញអ៊ីស្រាអែល ចេញមុខ លូកដៃជាផ្លូវការ ក្នុងវិបត្តិផ្ទៃក្នុងរបស់ស៊ីរី ដែលតាមពិតជាសត្រូវមួយរបស់អ៊ីស្រាអែល នោះទេ។
អ៊ីស្រាអែលធ្លាប់បានលួចវាយប្រហារម្តងម្កាលតាមផ្លូវអាកាស ទៅក្នុងទឹកដីស៊ីរី ដើម្បី កម្ទេច ក្បួនរថយន្តដឹកមីស៊ីល ដែលអ៊ីស្រាអែលចោទថា មានទិសដៅ បម្រើប្រយោជន៍របស់សម្រាប់ក្រុមអេស្បូឡា លីបង់ ឬទីតាំងយោធាស៊ីរី ដែលអ៊ីស្រាអែលចោទថា កំពុងត្រូវបានអ៊ីរ៉ង់យកទៅប្រើដើម្បីផលិតមីស៊ីលសម្រាប់គ្រោងបាញ់ប្រហារអ៊ីស្រាអែលទៅថ្ងៃមុខ។
សូមអាន៖ អ៊ីស្រាអែលចោទអ៊ីរ៉ង់ថា បានចាយលុយរាប់លានដុល្លារ ដើម្បីចិញ្ចឹមក្រុមអ៊ីស្លាម នៅដើមបូព៌ា
ការវាយប្រហារក្នុងទ្រង់ទ្រាយធំនៅថ្ងៃសៅរ៍ម្សិលមិញ ត្រូវបានរដ្ឋាភិបាលអ៊ីស្រាអែលចេញមុខទទួលខុសត្រូវពេញមាត់ ក្នុងហេតុផលថា អ៊ីរ៉ង់ ដែលជាសត្រូវសួរពូជរបស់អ៊ីស្រាអែលបានរំលោភឈ្លានពាន តាមរយៈការបញ្ជូនយន្តហោះដ្រូន ក្នុងដែនអាកាសអ៊ីស្រាអែល។ តាំងពីណាពីមក អ៊ីស្រាអែលបានព្រមានរួចហើយ មិនឲ្យអ៊ីរ៉ង់ដែលកំពុងជួយផ្នែកយោធាដល់រដ្ឋាភិបាលស៊ីរី យកប្រទេសស៊ីរីដើម្បីតាំងមូលដ្ឋានទ័ពដើម្បីវាយប្រហារអ៊ីស្រាអែល។
មួយវិញទៀត គេឃើញថា អ៊ីស្រាអែលដែលសម្រេចបញ្ចេញសាច់ដុំយោធា នៅពេលនេះ ក៏ដោយសារតែកត្តាប្រែប្រួលក្នុងសង្រ្គាមនៅស៊ីរីដែរ។ ដោយសារមានជំនួយពីអ៊ីរ៉ង់ ទាហានអេស្បូឡា ហើយនិងរុស្ស៊ី ទ័ពរដ្ឋាភិបាលស៊ីរី ដែលជាសត្រូវរបស់អ៊ីស្រាអែល សព្វថ្ងៃនេះកំពុងឈ្នះ លើសមរភូមិ គឺមិនមែនចុះខ្សោយដូចមុននោះទេ។ អាចនិយាយបានថា បើរដ្ឋាភិបាលស៊ីរី រងគ្រោះកាន់តែយូរអង្វែងដោយសារសង្រ្គាម នោះអ៊ីស្រាអែលកាន់តែសប្បាយចិត្ត។ ទី២ ទៀត បើទោះបីជាអ៊ីស្រាអែល មិនលូកដៃកន្លងមក ប៉ុន្តែ អ៊ីស្រាអែល បានតាមដានជាប់ជានិច្ចសង្រ្គាម វិវឌ្ឍទៅ ក្នុងទឹកដីស៊ីរី ព្រោះថា ទាហានអេស្បូឡា ហើយនិងអ៊ីរ៉ង់ ដែលកំពុងជួយប្រយុទ្ធ ដើម្បីទ័ពរដ្ឋាភិបាលឈ្នះលើក្រុមប្រឆាំង ស៊ីរី ក៏កំពុងឆ្លៀតប្រើសង្រ្គាមស៊ីរី ដើម្បីពង្រឹងសមត្ថភាពយោធា ដែលអាចនឹងគ្រោះថ្នាក់ខ្លាំងសម្រាប់សន្តិសុខរបស់អ៊ីស្រាអែល។
បិនចាមីន នេតានីញ៉ាហ៊ូ៖ អ៊ីស្រាអែលចង់បានសន្តិភាព ប៉ុន្តែ មិនបណ្តោយឲ្យអ៊ីរ៉ង់បុកគ្រឹះមូលដ្ឋានយោធាក្នុងទឹកដីស៊ីរី
អ៊ីស្រាអែល មានព្រំដែនជាប់ជាមួយ លីបង់ ហើយនិងស៊ីរី។ ស៊ីរី និងអ៊ីស្រាអែលនៅមិនទាន់ចុះសន្ធិសញ្ញាសន្តិភាព ជាមួយ គ្នា ពោលគឺអាចផ្ទុះសង្រ្គាមដាក់គ្នា គ្រប់ពេលវេលា ដោយសារតែអ៊ីស្រាអែលបានកាត់យកដីហ្គោឡង់របស់ស៊ីរី មកធ្វើជាទឹកដីរបស់ខ្លួន កាលពីសង្រ្គាមរយៈពេល៦ថ្ងៃជាមួយប្រទេសអារ៉ាប់ នៅឆ្នាំ ១៩៦៧
នៅយប់ថ្ងៃសៅរ៍ម្សិលមិញ នាយករដ្ឋមន្រ្តីអ៊ីស្រាអែលនិយាយថា អ៊ីស្រាអែលចង់បានសន្តិភាព ប៉ុន្តែ ជាមួយ គ្នានោះ អ៊ីស្រាអែល នឹងមិនអនុញ្ញាតឲ្យអ៊ីរ៉ង់ ដែលជាសត្រូវគំរាមកំហែងជីវិតរបស់អ៊ីស្រាអែល អាចឆ្លៀតឱកាស បុកគ្រឹះទីតាំងយោធារបស់អ៊ីរ៉ង់ ក្នុងទឹកដីស៊ីរី ដែលស្ថិតនៅក្បែរមាត់ទ្វារផ្ទះរបស់អ៊ីស្រាអែលដែរ។
ទោះជានាយករដ្ឋមន្រ្តីអ៊ីស្រាអែលលើកឡើងបែបព្រមាន យ៉ាងដូច្នេះ ប៉ុន្តែ គេមិនគិតទេថា សង្រ្គាមអ៊ីស្រាអែលជាមួយអ៊ីរ៉ង់ និងស៊ីរី អាចផ្ទុះឡើង នៅពេលនេះ។ នៅថ្ងៃសៅរ៍ អ៊ីស្រាអែលគ្រាន់តែចង់បញ្ចេញសាច់ដុំ ជាសញ្ញាព្រមានដល់សត្រូវរបស់ខ្លួន ដូចជាអ៊ីរ៉ង់ ស៊ីរី និងពួកអេស្បូឡា លីបង់ថា មិនត្រូវមើលស្រាលអ៊ីស្រាអែលនោះទេ។ ប៉ុន្តែ ជាមួយគ្នានោះដែរ ឧប្បទ្ទវហេតុនៅថ្ងៃសៅរ៍បង្ហាញផងដែរថា អ៊ីស្រាអែលលែងអាចចេញចូលទៅវាយប្រហារតាមចិត្តចង់ដូចមុន លើទឹកដីស៊ីរី ព្រោះថា ស៊ីរីនៅពេលនេះ មានបំពាក់ដោយប្រព័ន្ធការពារមីស៊ីលរបស់រុស្ស៊ី និងរបស់អ៊ីរ៉ង់ ដែលជាក់ស្តែង បានបាញ់ទម្លាក់យន្តហោះចម្បាំងរបស់អ៊ីស្រាអែល មួយគ្រឿងនៅថ្ងៃសៅរ៍ទី១០កុម្ភៈ។ នេះជាលើកទី១ ក្នុងរយៈពេល៣០ឆ្នាំចុងក្រោយនេះ ដែលយន្តហោះចម្បាំងអ៊ីស្រាអែលត្រូវគូសត្រូវបាញ់ទម្លាក់ក្នុងពេលធ្វើប្រតិបត្តិការ។
រុស្ស៊ីត្រូវប្រឈមនឹងជម្រើសដ៏ស្មុគស្មាញ ដោយសារមិនចង់កាន់ជើងភាគីម្ខាងៗ
នៅក្រោយប្រតិបត្តិការទ័ពរបស់អ៊ីស្រាអែលក្នុងទឹកដីស៊ីរី រដ្ឋមន្រ្តីការបរទេសរុស្ស៊ីបានបង្ហាញក្តីព្រួយបារម្ភ និងបានអំពាវនាវឲ្យភាគីជម្លោះបញ្ឈប់វាយប្រហារគ្នាទៅវិញ ទៅមក ព្រោះថា វាអាចគ្រោះថ្នាក់ដល់ជីវិតរបស់ទាហានរុស្ស៊ី ដែលកំពុងមានវត្តមានក្នុងទឹកដីស៊ីរី។ រវាង អ៊ីស្រាអែល និងអ៊ីរ៉ង់ រួមជាមួយស៊ីរី រុស្ស៊ីជ្រើសរើសយកផ្លូវកណ្តាល មិនចង់កាន់ជើងភាគីណាមួយទេ។ គេអាចនិយាយបានថា បើសិនរុស្ស៊ីមិនបើកភ្លើងខៀវទេ អ៊ីរ៉ង់ ក៏មិនអាចបញ្ជូនយន្តហោះដ្រូនទៅយកការណ៍សម្ងាត់ក្នុងទឹកដីអ៊ីស្រាអែលដែរ ព្រោះថាកន្លងមក អ៊ីស្រាអែលបានទទូចរួចហើយ សុំឲ្យរដ្ឋាភិបាលម៉ូស្គូជួយអន្តរាគមន៍ ធ្វើយ៉ាងណាកុំឲ្យអ៊ីរ៉ង់ពង្រឹងទ័ពក្នុងទឹកដីស៊ីរី ដែលអាចគ្រោះថ្នាក់សម្រាប់សន្តិសុខអ៊ីស្រាអែល។
ដោយសារតែមិនចង់កាន់ជើងភាគីណាមួយ រុស្ស៊ីក៏ទំនងជាបានបិទភ្នែក បណ្តោយឲ្យយន្តហោះចម្បាំងរបស់អ៊ីស្រាអែលចូលទៅបាញ់កម្ទេចទីតាំងយោធារបស់អ៊ីរ៉ង់ និងស៊ីរីនៅថ្ងៃសៅរ៍។ បើសិនរុស្ស៊ីមិនបើកភ្លើងខៀវ ម្ល៉េះយន្តហោះអ៊ីស្រាអែលមិនអាចហោះបានដោយស្រួលចូលទៅក្នុងដែនអាកាសរបស់ស៊ីរី ទេ ព្រោះថា ដែនអាកាសរបស់ស៊ីរី ត្រូវបានការពារយ៉ាងមុតមាំដោយរុស្ស៊ី ដែលបានបំពាក់យ៉ាងក្រាស់ ប្រព័ន្ធខែលមីស៊ីលសម្រាប់ទាហានរដ្ឋាភិបាលស៊ីរី។ ប្រព័ន្ធខែលមីស៊ីលរបស់រុស្ស៊ីអាចបាញ់ទម្លាក់យ៉ាងងាយ យន្តហោះចម្បាំងរបស់អ៊ីស្រាអែល
រុស្ស៊ី មិនចង់លូកដៃក្នុងភាពតានតឹងរវាងអ៊ីស្រាអែល និងអីរ៉ង់ទេ។ ប៉ុន្តែ អាចដើរតួសំខាន់ ដើម្បីបញ្ជៀសកុំឲ្យមានផ្ទុះសង្រ្គាមដាក់គ្នារវាងអ៊ីស្រាអែល ជាមួយប្រទេសជិតខាងដូចជាលីបង់ ស៊ីរី ហើយនិងអ៊ីរ៉ង់។ ព្រោះថា សង្រ្គាមរវាងប្រទេសទាំងបួននេះ នឹងធ្វើឲ្យរុស្ស៊ីខាតបង់ប្រយោជន៍។ ដើម្បីកុំឲ្យអ៊ីស្រាអែលវាយប្រហារយោធាជាថ្មីទៅក្នុងទឹកដីស៊ីរី រុស្ស៊ី ត្រូវតែធានាទៅអ៊ីស្រាអែលថា នឹងបញ្ចុះបញ្ចូលកុំឲ្យអ៊ីរ៉ង់នៅបន្តតាំងទីយោធាក្នុងទឹកដីស៊ីរី នៅក្រោយចប់សង្រ្គាមនៅស៊ីរី។ ជាមួយគ្នានេះ រុស្ស៊ីក៏ចង់បានពីអ៊ីស្រាអែលវិញថា ត្រូវឈប់វាយប្រហារទៅលើក្រុមអេស្បូឡា ឬទាហានរដ្ឋាភិបាលស៊ីរី ដែលជាសម្ព័ន្ធមិត្តរបស់រុស្ស៊ីតទៅទៀតដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ