លោកម៉ាក្រុងប្រាប់លោកអ៊ែរដូហ្កាន ថាបទឈប់បាញ់ស៊ីរី ត្រូវអនុវត្តនៅតំបន់Afrineដែរ
ថ្ងៃចន្ទនេះ ប្រធានាធិបតីបារាំង បានជជែកតាមទូរសព្ទជាមួយប្រធានាធិបតីតួកគី គូសបញ្ជាក់ថា បទឈប់បាញ់នៅស៊ីរី ដែលអង្គការសហប្រជាតិអនុម័តកាលពីថ្ងៃសៅរ៍ ត្រូវអនុវត្តនៅតំបន់Afrine ភាគខាងជើងស៊ីរីដែរ។ មូលហេតុគឺដោយសារតែនៅតំបន់នេះ កងទ័ពតួកគីកំពុងប្រតិបត្តិការកំចាត់ក្រុមគួដឌីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ក្នុងពេលជជែកតាមទូរសព្ទជាមួយប្រធានាធិបតីតួកគី អ៊ែរដូហ្កាន ប្រធានាធិបតីបារាំង អេម៉ានុយអែល ម៉ាក្រុង បានគូសបញ្ជាក់ពីខ្លឹមសារបទឈប់បាញ់ដែលក្រុមប្រឹក្សាសន្តិសុខអង្គការសហប្រជាជាតិ បានអនុម័តកាលពីថ្ងៃសៅរ៍។ ជាបទឈប់បាញ់រយៈពេល៣០ថ្ងៃ ដើម្បីបញ្ជូនជំនួយមនុស្សធម៌អោយប្រជាជន និងជម្លៀសអ្នករបួស។ បទឈប់បាញ់នេះត្រូវតែអនុវត្តភ្លាមៗ នៅទូទាំងប្រទេសស៊ីរី មិនមែនអនុវត្តនៅតែតំបន់ហ្គូតា ដែលរងការទំលាក់គ្រាប់បែករាល់ថ្ងៃនោះទេ។ បទឈប់បាញ់នេះ ត្រូវតែអនុវត្តនៅតំបន់Afrine ភាគខាងជើងស៊ីរីដែរ។
តួកគីបានបើកការវាយលុក នៅAfrine ភាគខាងជើងស៊ីរី កាលពីថ្ងៃ២០មករា ដើម្បីគាស់រំលើងក្រុមប្រយុទ្ធគួដឌីស្ថានYPG។ ក្រុមគួដឌីស្ថាននេះត្រូវបានតួកគីចាត់ទុកថាជាក្រុមភេរវជន ព្រោះក្រុមនេះមានទំនាក់ទំនងជាមួយក្រុមបក្សការងារគួដឌីស្ថាន ដែលកំពុងបង្កហិង្សាបះបោរក្នុងស្រុកតួកគី។ ដោយសារមូលហេតុនេះ តួកគីលើកឡើងកាលពីថ្ងៃអាទិត្យថា បទឈប់បាញ់មិនទាក់ទងប្រតិបត្តិការកងទ័ពតួកគី ក្នុងការកំចាត់ក្រុមភេរវជនទេ។ ទោះជាស៊ីរីត្រូវការបទឈប់បាញ់ក្តី ប្រធានាធិបតីតួកគីអ៊ែរដូហ្កាន បានលើកឡើងថា គ្មានបទឈប់បាញ់នៅតំបន់Afrineទេ។ ការវាយលុកនៅAfrine នៅតែបន្តរហូតកំចាត់បានភេរវជនចុងក្រោយ។ យោងតាមលោកអ៊ែរដូហ្កាន កងទ័ពតួកគីបានគំចាត់បានភេរវជនជាង២០០០នាក់ហើយ។
គួរបញ្ជាក់ដែរថា អង្គការសហប្រជាជាតិបានអនុម័តបទឈប់បាញ់៣០ថ្ងៃ សម្រាប់ស៊ីរី កាលពីថ្ងៃសៅរ៍។ ប៉ុន្តែ ការទំលាក់គ្រាប់បែកពីសំណាក់កងទ័ពស៊ីរីនៅតែបន្តរហូតដល់ថ្ងៃចន្ទ ក្នុងតំបន់ហ្គូតា។ តែក្នុងមួយសប្តាហ៍ប៉ុណ្ណោះ ហិង្សាតំបន់ហ្គូតាបានសម្លាប់ជនស៊ីវិលជាង៥០០នាក់ ក្នុងនោះមានកុមារជាង១០០នាក់។ សង្គ្រាមស៊ីរីជិត៧ឆ្នាំមកនេះ បានសម្លាប់មនុស្សជាង៣៤ម៉ឺននាក់ ធ្វើអោយមនុស្សរាប់លាននាក់ភៀសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ