អ.ស.ប៖កុមារស៊ីរីរងគ្រោះកាន់តែខ្លាំងឡើងដោយសារជម្លោះនៅប្រទេសស៊ីរី
អង្គការសហប្រជាជាតិបាននិយាយនៅថ្ងៃចន្ទនេះថា បច្ចុប្បន្ននេះ កុមារស៊ីរី ប្រឈមទៅនឹងគ្រោះភ័យដោយសារសង្គ្រាមដ៏រុំារៃនៅក្នុងប្រទេសស៊ីរី ជាងពេលណាៗទាំងអស់។ ប្រជាជនស៊ីវិលស៊ីរី ដែលក្នុងនោះមានកុមារជាច្រើនផងដែរនោះ កំពុងរស់នៅក្នុងភាពភ័យខ្លាចដោយសារ សង្គ្រាមនៅតែបន្តកើតមាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
បើគិតមកដល់ពេលនេះ សង្គ្រាមនៅប្រទេសស៊ីរីដែលមានរយៈពេលជិត ៨ឆ្នាំ បានសម្លាប់មនុស្សច្រើនជាង ៣៥០,០០០ នាក់ ដែលក្នុងនោះមានកុមារចំនួនជិត ២ ម៉ឺននាក់។ ហើយបើតាម អង្គការយូនីសេស មានចំនួនកុមារស្លាប់ទ្វេដងនៅក្នុងឆ្នាំ២០១៧ បើប្រៀបធៀបទៅនឹងឆ្នាំមុនៗ។ អង្គការយូនីសេស រឮកទៀតថា តាមរយៈការវាយប្រយុទ្ឋឥតឈប់របស់កងទ័ពស៊ីរី និង ក្រុមឧទ្ទាម គេមើលឃើញថា ចំនួនកុមាររងគ្រោះ នឹងកើនឡើងជាគំហុកបន្តទៀត នៅឆ្នាំ២០១៨ នេះ។
ចំណែក ក្រុមអង្គការឃ្លាំមើលសិទ្ឋិមនុស្ស បានឲ្យដឹងថា កុមារ គឺជាបុគ្គលរងគ្រោះខ្លាំងលំដាប់ទី៥ ដោយសារសង្គ្រាមដែលអូសបន្លាយ និងចូលដល់ឆ្នាំទី ៨ ហើយនៅថ្ងៃ ព្រហស្បតិ៍ ទី ១៥ មីនា ខាងមុខនេះ។ ហើយបើគិតត្រឹមតែពីខែកុម្ភៈ ឆ្នាំ ២០១៨ មានកុមារស៊ីរីជាង ២០០ នាក់បានស្លាប់ ដោយសារតែការបំផ្ទុះគ្រាប់បែករបស់កងទ័ពរដ្ឋាភិបាលស៊ីរី ដែលមានជំនួយពីរុស្សី ទៅលើក្រុមឧទ្ទាម។
បើតាម ភ្នាក់ងារអង្គការសហប្រជាជាតិ មានកុមារស៊ីរីប្រមាណជា ៣ លាន ៣ សែន នាក់ រងគ្រោះ ពីសង្គ្រាមហែកហួរនៅទូទាំងប្រទេស។
ដោយឡែក សហគមន៍អន្តរជាតិ និង ក្រុមអង្គការឃ្លាំមើលសិទ្ឋិមនុស្សបានសម្តែងនូវការព្រួយបារម្មណ៍ជាខ្លាំងចំពោះស្ថានភាពអាក្រក់ដែលនៅតែបន្តកើតមាននៅក្នុងតំបន់ហ្គូតាខាងកើត នៃប្រទេសស៊ីរី។ បារម្មណ៍ ក៏ព្រោះតែការវាយប្រយុទ្ឋនៅតែកើតមានទោះបីជាមានការអន្តរាគមន៍ពី អង្គការសហប្រជាជាតិ និង ប្រទេសលោកខាងលិចយ៉ាងណាក៏ដោយ។
តួយ៉ាង នៅថ្ងៃអាទិត្យម្សិលមិញនេះ រដ្ឋាភិបាលស៊ីរី បានបន្តការវាយប្រហាររបស់ខ្លួន ទៅលើក្រុមឧទ្ទាម នៅតំបន់ហ្គូតាខាងកើត។ តំបន់ហ្គូតាមានប្រជាជនរស់នៅប្រមាណ ៤ សែននាក់ ហើយពួកគេ រស់នៅឡោមព័ទ្ឋដោយសូរសម្លេងគ្រាប់បែក គ្រាប់កាំភ្លើងរបស់រដ្ឋាភិបាលស៊ីរីចាប់ពីឆ្នាំ២០១៣ មកម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ