ស៊ីរី៖ស្លាប់ទាហានស៊ីរី ២៦នាក់ និងយុទ្ធជនរុស្ស៊ី ៩នាក់នៅក្នុងការវាយប្រហារពីអង្គការរដ្ឋអ៊ីស្លាម
នៅក្នុងប្រទេសស៊ីរី មានស្លាប់កម្លាំងរដ្ឋាភិបាលយ៉ាងតិច ២៦នាក់ និងយុទ្ធជនរុស្ស៊ីចំនួន ៩នាក់នៅក្នុងការវាយប្រហាររបស់ពួកជីហាតអង្គការរដ្ឋអ៊ីស្លាមនៅប៉ែកខាងកើតស៊ីរី។ ឧប្បត្តិហេតុនេះបានកើតមានកាលពីថ្ងៃពុធ ទី២៣ ឧសភា តែស្ថាប័នឃ្លាំមើលសិទ្ធិមនុស្សស៊ីរីទើបបានប្រកាសឲ្យដឹងនាថ្ងៃអាទិត្យ ទី២៧ ឧសភា។ ព្រឹត្តិការណ៍មួយនេះជាសក្ខីកម្មថ្មីដែលបញ្ជាក់ថា អង្គការរដ្ឋអ៊ីស្លាមនៅតែសកម្ម និងមានសមត្ថភាពវាយប្រហារនៅតាមតំបន់មួយចំនួនក្នុងទឹកដីស៊ី។
ចុះផ្សាយនៅថ្ងៃ៖
ស្តាប់ - ០២:២១
តាមស្ថាប័នឃ្លាំមើលសិទ្ធិមនុស្សស៊ីរី ពួកជីហាតអង្គការរដ្ឋអ៊ីស្លាមបានបើកការវាយប្រហារលើកម្លាំងស៊ីរី និងរុស្ស៊ីនៅក្នុងតំបន់ដាច់ស្រាយាលមួយស្ថិតក្នុងខេត្ត Deir Ezzor ក្បែរស្រុក Mayadine។ នាយកស្ថាប័នឃ្លាំមើលសិទ្ធិមនុស្សស៊ីរីលោក Rami Abdel Rahmane បានថ្លែងប្រាប់ AFP ថា មានស្លាប់កម្លាំងគាំទ្ររដ្ឋាភិបាលស៊ីរីចំនួន ៣៥នាក់ ក្នុងនោះមានយុទ្ធជនរុស្ស៊ីចំនួន ៩នាក់ ហើយក្នុងចំណោមយុទ្ធជនរុស្ស៊ីទាំង ៩នាក់មានមួយភាគជាទាហានដោយមិនបានប្រាប់ពីចំនួនពិតប្រាកដទេ។ បើយោងតាមក្រសួងការពារជាតិរុស្ស៊ីក្នុងថ្ងៃអាទិត្យ ទី២៧ ឧសភា មានស្លាប់ទាហានរុស្ស៊ី ៤នាក់ តែមិនបានបញ្ជាក់ពីថ្ងៃខែ និងទីកន្លែងឡើយ។
ទោះជាយ៉ាងនេះក្តី ស្ថាប័នឃ្លាំមើលសិទ្ធិមនុស្សស៊ីរីដែលមានបណ្តាញនៅសឹងទូទាំងប្រទេសស៊ីរីបានអះអាងថា អ្វីដែលក្រសួងការពារជាតិរុស្ស៊ីបានលើកឡើង គឺជាហេតុការណ៍ដូចគ្នានៃការវាយប្រហាររបស់ពួកជីហាតអង្គការរដ្ឋអ៊ីស្លាមកាលពីថ្ងៃពុធ ទី២៣ ឧសភា។ ចំណែកកាសែតមួយក្នុងស្រុកនៅស៊ីរីបានបញ្ជាក់បន្ថែមពីពិធីបញ្ចុះសពទាហានរុស្ស៊ី ៤នាក់ដែលស្លាប់ក្នុងថ្ងៃទី២៣ ឧសភា។ សូមជម្រាបជូនថា រុស្ស៊ីដែលជាសម្ព័ន្ធមិត្តរបស់ស៊ីរីបានជួយគាំទ្រផ្លូវយោធាដល់ក្រុងដាម៉ាស់តាំងពីខែកញ្ញា ឆ្នាំ ២០១៥ នៅក្នុងយុទ្ធនាការប្រឆាំងពួកជីហាតអង្គការរដ្ឋអ៊ីស្លាម។
តែក្រោមភ្នែក ច្រមុះរបស់បស្ចិមលោក អន្តរាគមន៍របស់រុស្ស៊ីនៅស៊ីរី គឺជួយកម្លាំងរបស់រដ្ឋាភិបាលក្រុងដាម៉ាស់របស់លោកប្រធានាធិបតីស៊ីរីអាសាដដើម្បីប្រយុទ្ធទល់នឹងក្រុមប្រឆាំងស៊ីរីដែលគាំទ្រដោយសហគមន៍អន្តរជាតិ។ បច្ចុប្បន្ន មានទាហានរុស្ស៊ីប្រមាណជា ៣ ០០០នាក់កំពុងឈរជើងក្នុងទឹកដីស៊ីរី ពិសេសនៅប៉ែកភាគពាយព្យ ហើយតាមតួលេខផ្លូវការ មានទាហានរុស្ស៊ីចំនួន ៩២នាក់បានចោលជីវិតនៅក្នុងទឹកដីស៊ីរី។
ពិតណាស់ថា ក្រោមអន្តរាគមន៍របស់កម្លាំងរដ្ឋាភិបាលស៊ីរី រួមជាមួយសម្ព័ន្ធមិត្តរបស់លោកអាសាដ និងក្រោមអន្តរាគមន៍របស់កម្លាំងសហគមន៍អន្តរជាតិដឹកនាំដោយអាមេរិក អង្គការរដ្ឋអ៊ីស្លាមបានបាត់បង់ដែនដី និងយុទ្ធជនរបស់ខ្លួនយ៉ាងច្រើននៅស៊ីរី តែឥទ្ធិពល និងសមត្ថភាពវាយប្រហាររបស់អង្គការភេរវនិយមមួយនេះនៅមិនបាត់បង់ទាំងស្រុងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ