អ៊ីស្រាអែលពង្រឹងការបិទខ្ទប់លើតំបន់ហ្កាហ្សាក្នុងបរិបទនៃកំណើនភាពតានតឹងខ្លាំង
ទឹកដីប៉ាឡេស្ទីននៅតំបន់ហ្កាហ្សាកំពុងបន្តឯកោកាន់ខ្លាំងលើឆាកអន្តរជាតិ។ បន្ទាប់ពីត្រូវបានប្រទេសអេហ្ស៊ីបបិទព្រំដែននាថ្ងៃចន្ទ ទី១៦ កក្កដាមក អ៊ីស្រាអែលក៏បានសម្រេចចិត្តពង្រឹងការបិទខ្ទប់លើតំបន់គ្រប់គ្រងដោយចលនាប៉ាឡេស្ទីនហាម៉ាស់មួយនេះក្នុងថ្ងៃអង្គារ ទី១៧ កក្កដា។ កាលពីសប្តាហ៍កន្លងទៅ នាយករដ្ឋមន្រ្តីអ៊ីស្រាអែលបានប្រកាសបិទស្ពានដឹកទំនិញដែលត ភ្ជាប់រវាងតំបន់ហ្កាហ្សា និងទឹកដីអ៊ីស្រាអែល។ តាំងពីយប់ថ្ងៃចន្ទ ទី១៦ កក្កដាមក ការដឹកជញ្ជូនគ្រឿងឧបភោគ បរិភោគ រួមទាំងផលិតផលប្រើប្រាស់ចាំបាច់មួយចំនួនទៅឲ្យពលរដ្ឋប៉ាឡេស្ទីនក្នុងតំបន់ហ្កាហ្សាត្រូវបានអ៊ីស្រាអែលដាក់កម្រិត។
ចុះផ្សាយនៅថ្ងៃ៖
ស្តាប់ - ០២:៣០
ពីពេលនេះដល់ថ្ងៃអាទិត្យ ទី២២ កក្កដា ប្រេងសាំង និងឧស្ម័នហ្កាស់មិនត្រូវបានអ៊ីស្រាអែលអនុញ្ញាតឲ្យដឹកចូលតំបន់ហ្កាហ្សាទៀតឡើយ។ ចំណែកការបញ្ជូនគ្រឿងឧបភោគ បរិភោគ រួមទាំងផលិតផលប្រើប្រាស់ចាំបាច់មួយចំនួន ដូចយ៉ាងថ្នាំពេទ្យក៏ត្រូវមានកម្រិត និងមានការសិក្សាត្រួតពិនិត្យច្បាស់លាស់ នេះជាការបញ្ជាក់របស់ក្រសួងការពារជាតិអ៊ីស្រាអែល។ ចំណាត់ការចាស់ដៃរបស់អ៊ីស្រាអែលពេលនេះ គឺដើម្បីប្រឆាំងទប់នឹងការដែលសកម្មជនប៉ាឡេស្ទីននៅតំបន់ហ្កាហ្សាបន្តបញ្ជូនដបសាំងចងភ្ជាប់នឹងក្លែង និងគោមហោះទៅទម្លាក់ឆាបឆេះលើដែនដីអ៊ីស្រាអែលជាង ២ ៦០០ហិចតាតាំងពីជាង ១សប្តាហ៍កន្លងមក។
គួររម្លឹកជូនថាបន្ទាប់ពីដុំថ្ម ការប្រើដបសាំងចងភ្ជាប់នឹងក្លែង និងគោមហោះបានក្លាយជានិមិត្តរូបនៃការប្រឆាំងរបស់ពលរដ្ឋប៉ាឡេស្ទីនលើអ៊ីស្រាអែល ហើយដែលទង្វើថ្មីមួយនេះកំពុងធ្វើឲ្យរដ្ឋអំណាចអ៊ីស្រាអែលពិបាកទប់ស្កាត់ខ្លាំងណាស់។ វិធានការដែលអ៊ីស្រាអែលបានប្រើក្នុងតបវិញ គឺបិទខ្ទប់ច្រកសេដ្ឋកិច្ចដើម្បីដាក់គំនាបលើថ្នាក់ដឹកនាំចលនាហាម៉ាស់ដែលកំពុងគ្រប់គ្រងតំបន់ហ្កាហ្សាសព្វថ្ងៃ។ សម្រាប់អ៊ីស្រាអែល មានតែពួកហាម៉ាស់ទេដែលអាចរារាំងការបង្ហោះក្លែង និងគោមហោះដែលចងភ្ជាប់ដោយដបសាំងចូលក្នុងទឹកដីអ៊ីស្រាអែលបាន។
ធនាគារពិភពលោកបានយល់ឃើញថា វិធានការពង្រឹងការបិទខ្ទប់លើតំបន់ហ្កាហ្សារបស់អ៊ីស្រាអែលពេលនេះនឹងធ្វើឲ្យស្ថានការណ៍មនុស្សធម៌នៅទីនោះដែលកំពុងដុនដាបស្រាប់រឹតតែធ្លាក់ដុនដាបថែមទៀត ពិសេសចំពេលដែលមានពលរដ្ឋប៉ាឡេស្ទីនរស់ក្នុងតំបន់ហ្កាហ្សាចំនួន ៨០% ក្នុងចំណោម ២លាននាក់កំពុងរស់នៅដោយពឹងលើជំនួយមនុស្សធម៌។ ប្រឈមមុខនឹងវិធានការរឹតបន្តឹងរបស់អ៊ីស្រាអែលពេលនេះ រដ្ឋអំណាចតំបន់ហ្កាហ្សាបានចាត់វិធានការចាំបាច់មួយចំនួន ដូចយ៉ាងផ្តល់អាទិភាពឲ្យហាងធ្វើនំបុ័ងជាទទួលបានប្រេង និងឧស្ម័នហ្កាស់មុនគេដើម្បីបន្តផលិតនំបុ័ង។ ចំណែកពលរដ្ឋបាននាំគ្នាសម្រុកទិញប្រេងស្តុកទុក រួមទាំងផលិផលចាំបាច់ប្រចាំថ្ងៃមួយចំនួនផង។
ទន្ទឹមគ្នានេះ អ្នកនាំពាក្យចលនាហាម៉ាស់ក៏បានព្រមានពីផលវិបាកដ៏គ្រោះថ្នាក់ដែលអាចកើតមានពីការសម្រេចរបស់អ៊ីស្រាអែលពេលនេះ។ សូមជម្រាបជូនថា តំបន់ហ្កាហ្សាដែលស្ថិតចន្លោះទឹកដីអ៊ីស្រាអែល អេហ្ស៊ីប និងសមុទ្រមេឌីទែររ៉ាណេបានត្រូវអ៊ីស្រាអែលបិទខ្ទប់ផ្លូវគោក ផ្លូវទឹក និងផ្លូវអាកាសតាំងពី ១០ឆ្នាំមកហើយ។ ចំណែកព្រំដែនជាមួយប្រទេសអេហ្ស៊ីបក៏ត្រូវបានរដ្ឋអំណាចអេហ្ស៊ីបបិទ បើកស្រេចតែចិត្តដោយមិនបានបញ្ជាក់ហេតុផលច្បាស់លាស់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ