តួកគីឧបត្ថម្ភជួយពួកឧទ្ទាមស៊ីរី ឲ្យបង្កើតកងទ័ពជាតិ
ពួកឧទ្ទាមស៊ីរី នៅភាគពាយ័ព្យប្រទេសកំពុងបង្កើតកងទ័ពជាតិមួយ នៅក្រោមជំនួយឧបត្ថម្ភ ពីរដ្ឋាភិបាលតួកគី។ តាមវរសេនីយ៍ Haitham Afisi ប្រធានកងទ័ពជាតិ ដែលបាននិយាយប្រាប់ទីភ្នាក់ងារព័ត៌មានអង់គ្លេស Reuters នៅថ្ងៃអាទិត្យទី ១២សីហា កងទ័ពជាតិស៊ីរី មានសត្រូវបី គឺប្រធានាធិបតីស៊ីរី ពួកជីហាតអង្គការរដ្ឋអ៊ីស្លាម ហើយនិងគ្នីគ្នារបស់ក្រុមគួដឌីស្ថាន តួកគី ដែលជាគូសត្រូវរបស់រដ្ឋាភិបាលតួកគី។
ចុះផ្សាយនៅថ្ងៃ៖
កងទ័ពជាតិស៊ីរី ដែលប្រទេសតួកគី កំពុងជួយជ្រោមជ្រែងបង្កើតចេញជារូបរាងឡើង នឹងក្លាយជាឆ្អឹងទទឹងក របស់រដ្ឋាភិបាលស៊ីរី ដែលបានសច្ចាវាយដណ្តើមយកមកគ្រប់គ្រងវិញទាំងអស់ ទឹកដីស៊ីរី។
ចាប់តាំងពីមួយឆ្នាំមកហើយ ក្រុមឧទ្ទាមស៊ីរី នៅភាគពាយ័ព្យប្រទេសត្រូវបានតួកគី ជួយគាំទ្រ ឧបត្ថម្ភ ឲ្យបង្កើតកងទ័ពជាតិស៊ីរីមួយ ដែលប្រមូលផ្តុំ ទៅដោយ ក្រុមប្រឆាំងប្រដាប់អាវុធ ក្នុងទឹកដីស៊ីរី។ តាមប្រធានកងទ័ពជាតិ លោកវរសេនីយ៍ Haitham Afisi តាំងពីមួយឆ្នាំមកនេះ កងទ័ពជាតិបានកើនចំនួន ដល់៣៥ ០០០នាក់។ នៅក្នុងបទសម្ភាសន៍ទៅទីភ្នាក់ងារព័ត៌មានReuters ប្រធានកងទ័ពស៊ីរី ទទួលស្គាល់ថា វាមានការលំបាកក្នុងការប្រមែរប្រមូល បញ្ចុះបញ្ចូលទាហានរបស់ក្រុមប្រឆាំង ឲ្យចូលរួមគ្នា តែមួយ នៅក្នុងកងទ័ពជាតិ។
ថ្មីៗនេះ លោកបានបញ្ជាឲ្យក្រុមប្រដាប់អាវុធ ត្រូវពាក់ឯកសណ្ឋាន យោធា ឈប់បាញ់បោះដោយសេរី និងគ្មានសិទ្ធិមានពន្ធនាគារ ឬកាត់ទោស ប្រហារជីវិតមនុស្សដោយគ្មានការជំនុំជម្រះ ដូចមុន។ កងទ័ពជាតិរបស់ពួកឧទ្ទាមស៊ីរី បានអំពាវនាវផងដែរ ឲ្យសមាជិករបស់ខ្លួន ឈប់ប្រយុទ្ធ បង្ករឿង ជាមួយក្រុមឧទ្ទាមប្រឆាំងផ្សេងទៀត និងត្រូវសហការជាមួយប៉ូលិសអាវុធហត្ថ ដែលជាអ្នកតំណាងឲ្យច្បាប់ និងតុលាការ នៅក្នុង តំបន់គ្រប់គ្រងរបស់ក្រុមប្រឆាំងស៊ីរី។
កន្លងមក ពួកឧទ្ទាមបានព្យាយាមប្រមូល រួបរួមគ្នា ក្នុងចលនាប្រឆាំងតែមួយ ដើម្បីវាយប្រយុទ្ធទប់ទល់នឹងសត្រូវតែមួយ គឺកងទ័ពរបស់រដ្ឋាភិបាល បាស្ហាអាល់ អាសាដ។ ប៉ុន្តែ ការប៉ុនប៉ងទាំងឡាយ ត្រូវបរាជ័យ។ ក្រុមប្រឆាំងស៊ីរី បានបែកបាក់ គ្នាជាច្រើនក្រុម ដោយសារតែមាននិន្នាការខុសៗគ្នា និងមានជំនួយគាំទ្រ ហិរញ្ញវត្ថុពីប្រទេសផ្សេងៗ គ្នា។តាមប្រធានកងទ័ពជាតិស៊ីរី តួកគី ជួយឧបត្ថម្ភ ផ្នែកថវិកា ដូចជាប្រាក់ខែរបស់កងទ័ព បណ្តុះបណ្តាល កងទ័ព ផ្តល់ព័ត៌មានសម្ងាត់ ឬបើចាំបាច់តួកគី នឹងអាចផ្តល់សព្វាវុធទៀតផង។
គេវាយតម្លៃថា លើកនេះ កងទ័ពជាតិរបស់ពួកឧទ្ទាមស៊ីរី នៅភាគខាងជើងស៊ីរី អាចរឹងមាំ និងស្ថិតស្ថេរយូរអង្វែង ដោយសារតែមានតួកគី ប្រទេសគាំទ្រសំខាន់របស់ចលនានេះ មានទីតាំងយោធារបស់ខ្លួន ជាច្រើនកន្លែង ក្នុងទឹកដីស៊ីរី។ រដ្ឋាភិបាលស៊ីរីរបស់លោកបាស្ហាអាល់ អាសាដបានចោទប្រកាន់ក្រុងអង់ការ៉ាថា បានរំលោភឈ្លានពានទឹកដីស៊ីរី។ ក្រុងអង់ការ៉ាវិញបានយកលេស កិច្ចព្រមព្រៀងជាមួយ រុស្ស៊ី និងអ៊ីរ៉ង់ ដែលកំពុងធ្វើអន្តរាគមន៍យោធាក្នុងប្រទេសស៊ីរី ដើម្បី បើកប្រតិបត្តិការយោធា សំខាន់ពីរ ក្នុងទឹកដីស៊ីរី ក្បែរព្រំដែនតួកគី។ ចាប់តាំងពីចុងឆ្នាំមុន កងទ័ពតួកគីបានចូលទៅប្រយុទ្ធបណ្តេញ ក្រុមគួកឌីស្ថានស៊ីរី ដែលតួកគីចោទថា ជាសម្ព័ន្ធមិត្តរបស់ក្រុមគួកឌីស្ថាន តួកគី (សត្រូវរបស់របស់រដ្ឋាភិបាលតួកគី)។ គោលដៅចំបងរបស់តួកគី បោសសម្អាតរាល់ក្រុមប្រឆាំងស៊ីរី ដែលស្និទ្ធនឹងក្រុមគួកឌីស្ថាន និងលើកបន្តុប ដាក់វិញ ក្រុមឧទ្ទាមស៊ីរី ណា ដែលស្មោះស្ម័គ្រជួយប្រយុទ្ធប្រឆាំងមិនឲ្យមានពួកគួកឌីស្ថានសត្រូវរបស់រដ្ឋាភិបាលក្រុងអង់ការ៉ា មានវត្តមាននៅក្បែរព្រំដែនតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ