អង្គការHRW៖ សកម្មជនដើម្បីសិទ្ធិមនុស្សអារ៉ាប៊ី សាអូឌីត អាចប្រឈមនឹងការប្រហារជីវិត
នៅអារ៉ាប៊ី សាអូឌីត រាជអាជ្ញា បានទាមទារឲ្យតុលាការសម្រេចកាត់ទោសប្រហារជីវិត សកម្មជន ការពារសិទ្ធិមនុស្ស៥នាក់ ដែលនៅក្នុងនោះ មាន១នាក់ បានរងចោទប្រកាន់ថា បានញុះញង់ឲ្យមានបាតុកម្មប្រឆាំងរដ្ឋាភិបាល។ នៅក្នុងសេចក្តីថ្លែងការណ៍ របស់ខ្លួន ចេញផ្សាយនៅថ្ងៃពុធទី ២២សីហានេះ អង្គការការពារសិទ្ធិមនុស្សHuman Rights Watch ដែលមានទីស្នាក់ការនៅទីក្រុងញូវយ៉ក បានបរិហាររិះគន់រាជអាជ្ញាអារ៉ាប៊ី សាអូឌីត។
ចុះផ្សាយនៅថ្ងៃ៖
“រាល់ការប្រហារជីវិតមនុស្សគឺជារឿងគួរឲ្យរន្ធត់។ ប៉ុន្តែ សុំឲ្យតុលាការសម្រេចផ្តន្ទាទោសប្រហារជីវិតសកម្មជនការពារសិទ្ធិមនុស្ស ដែលមិនបានប្រព្រឹត្តអំពើហិង្សាអ្វីសោះ គឺជារឿងដែលសាហាវព្រៃផ្សៃខ្លាំងណាស់” នេះជាប្រសាសន៍របស់លោកស្រីSarah Leah Whitson ប្រធានអង្គការការពារសិទ្ធិមនុស្ស ប្រចាំនៅតំបន់ដើមបូព៌ា។
តាមក្រុមអារ៉ាប៊ី សាអូឌីត ដើម្បី ការពារសិទ្ធិមនុស្ស ដែលមានទីតាំងនៅទីក្រុងឡុងដ៍ តុលាការអារ៉ាប៊ី សាអូឌីតកំពុងបើកសវនាការ ជំនុំជម្រះ លើករណីសកម្មជនការពារសិទ្ធិមនុស្ស៥នាក់។ អង្គការការពារសិទ្ធិមនុស្សចាប់អារម្មណ៍តាមដាន មិនដាច់ សវនការលើកនេះ ព្រោះថា នៅក្នុងចំណោមសកម្មជនសិទ្ធិមនុស្សដែលរាជអាជ្ញាទាមទារឲ្យតុលាការកាត់ទោសប្រហារជីវិត មានម្នាក់ជាស្ត្រីសកម្មជននាំមុខនៅអារ៉ាប៊ី សាអូឌីត។
លោកស្រី Israa Ghomgham សកម្មជនអ៊ីស្លាមនិកាយស្ហ៊ីអីត បានក្លាយជាគោលដៅតាមដានរបស់អាជ្ញាធរអារ៉ាប៊ី សាអូឌីត ដោយសារលោកស្រីបានប្រមូលព័ត៌មានទាំងឡាយទាក់ទងនឹងការធ្វើបាតុកម្មនៅអារ៉ាប៊ី សាអូឌីត ចាប់តាំងពីឆ្នាំ ២០១១។ សកម្មជនរូបនេះ ត្រូវបានចាប់ខ្លួន ជាមួយស្វាមី កាលពីឆ្នាំ ២០១៥ ក្នុងបទចោទប្រកាន់ថា ញុះញង់ឲ្យមានបាតុកម្ម ហើយនិងគាំទ្រលើកទឹកចិត្ត ក្រុមកុប្បករ។
បើសិនតុលាការអារ៉ាប៊ី សាអូឌីតសម្រេចទោសតាមការទាមទាររបស់រាជអាជ្ញាមែន នោះ លោកស្រី Israa Ghomgham ជាស្រ្តីអារ៉ាប៊ី សាអូឌីត លើកដំបូងគេ ដែលរងការកាត់ទោសប្រហារជីវិត ក្នុងសំណុំរឿង ទាក់ទងនឹងការគោរពសិទ្ធិមនុស្ស នៅអារ៉ាប៊ី សាអូឌីត។
នៅរាជាណាចក្រ អារ៉ាប៊ី សាអូឌីត ដែលគ្រប់គ្រងដោយព្រះចៅ សាល់ម៉ាន់ និកាយស៊ូនីត បាតុកម្ម នៅកន្លែងសាធារណៈ និងគណបក្សប្រឆាំងត្រូវបានហាមឃាត់មិនឲ្យមានដាច់ខាត។ តាមអង្គការការពារសិទ្ធិមនុស្ស Human Rights Watch ការបង្រ្កាបទៅលើក្រុមប្រឆាំង បានកើនឡើង គួរឲ្យកត់សំគាល់ ចាប់តាំងពីរាជបុត្រស្នងរាជ្យ ចាប់ផ្តើមនយោបាយកែទម្រង់នៅអារ៉ាប៊ីសាអូឌីត។ ចាប់តាំងពីដើមឆ្នាំនេះ មក អ្នកទទួលខុសត្រូវសាសនា បញ្ញវន្ត ហើយនិងសកម្មជនសិទ្ធិមនុស្សសរុបជាង១០នាក់ត្រូវបានអាជ្ញាធរចាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ