អង្គការសហប្រជាជាតិ៖ ការវាយប្រហារមួយចំនួននៅយេម៉ែនមានចរិតជាឧក្រិដ្ឋកម្មសង្រ្គាម
នៅក្នុងរបាយការណ៍មួយ ចេញផ្សាយ កាលពីថ្ងៃអង្គារម្សិលមិញ អ្នកស៊ើបអង្កេតរបស់អង្គការសហប្រជាជាតិបានវាយតម្លៃថា ប្រតិបត្តិការកងទ័ពរបស់សម្ព័ន្ធអារ៉ាប់ដឹកនាំដោយអារ៉ាប៊ី សាអូឌីត នៅប្រទេសយេម៉ែន មានលក្ខណៈជាឧក្រិដ្ឋកម្មសង្រ្គាម។ ក្រុមឧទ្ទាមហ៊ូទី ដែលជាផ្ទាំងស៊ីបវាយប្រហាររបស់កងទ័ពសម្ព័ន្ធអារ៉ាប់ ជាប់មានឈ្មោះផងដែរ នៅក្នុងបញ្ជីខ្មៅ របស់អ្នកស៊ើបអង្កេតរបស់អង្គការសហប្រជាជាតិ ក្នុងនាមជាអ្នកធ្វើទារុណកម្មលើទាហានយេម៉ែនដែលជាគូសត្រូវ។
ចុះផ្សាយនៅថ្ងៃ៖ កែប្រែថ្ងៃទី៖
នៅរយៈពេល៣ឆ្នាំមកនេះ នៅក្នុងប្រតិបត្តិការរបស់ខ្លួន នៅប្រទេសយេម៉ែន កម្លាំងទ័ពអាកាសរបស់សម្ព័ន្ធអារ៉ាប់បង្កឲ្យមានការបាត់បង់យ៉ាងធ្ងន់ធ្ងរ ខាងអាយុជីវិតមនុស្ស ដោយបានសំដៅ វាយប្រហារទៅលើតំបន់ ទីតាំង ដែលសំបូររស់នៅរបស់ប្រជាជនស៊ីវិល ដូចជា ផ្សារ រោងការ ពិធីបុណ្យសព មន្ទីរពេទ្យ ឬមន្ទីរឃុំឃាំង។ តាមការវាយតម្លៃរបស់មន្រ្តីស៊ើបអង្កេតរបស់អង្គកាសហប្រជាជាតិ ការវាយប្រហារមួយចំនួនរបស់កងទ័ពសម្ព័ន្ធអារ៉ាប់ មានលក្ខណៈដូចជាការប្រព្រឹត្តិឧក្រិដ្ឋកម្មសង្រ្គាម។
ចាប់តាំងពីឆ្នាំ ២០១៥ កងកម្លាំងរបស់សម្ព័ន្ធអារ៉ាប់ ដឹកនាំដោយអារ៉ាប៊ី សាអូឌីត បានធ្វើអន្តរាគមន៍ យោធា ជួយកងទ័ពរដ្ឋាភិបាលយេម៉ែន ដើម្បីប្រយុទ្ធតទល់នឹងពួកឧទ្ទាមហ៊ូទី គាំទ្រដោយកងទ័ពអ៊ីរ៉ង់ នៅយេម៉ែន។ ទៅតាមការសម្រេចរបស់អារ៉ាប៊ីសាអូឌីត កងកម្លាំងរបស់សម្ព័ន្ធអារ៉ាប់ ក្រៅតែពីវាយប្រហារទៅលើទីតាំង របស់ពួកឧទ្ទាមហ៊ូទី បានបិទផងដែរ ច្រកដឹកជញ្ជូនសំខាន់ របស់យេម៉ែន ដូចជាកំពង់ផែ និងព្រលានយន្តហោះនៅរដ្ឋធានី សាណាជាដើម។
នៅក្នុងរបាយការណ៍កម្រាស៤១ទំព័រ ក្រុមស៊ើបអង្កេតរបស់អង្គការសហប្រជាជាតិរកឃើញផងដែរ សកម្មភាពធ្វើទារុណកម្មរបស់ពួកឧទ្ទាមហ៊ូទី ដែលគេអាចចាត់ទុកផងដែរ ជាឧក្រិដ្ឋកម្មសង្រ្គាម។ សម្រាប់អ្នកសរសេររបាយការណ៍ ភាគីជម្លោះទាំងពីរនៅយេម៉ែន គឺទាំងពួកឧទ្ទាមហ៊ូទី ហើយនិងកងទ័ពរដ្ឋាភិបាលយេម៉ែន បានប្រព្រឹត្តឧក្រិដ្ឋកម្មសង្រ្គាម ក្នុងរឿងដែលបានចាប់បង្ខំបញ្ជូនកុមារ អាយុ ពី១១ទៅ ១៧ឆ្នាំ ទៅជួរមុខ ក្នុងសមរភូមិ។
សម្រាប់អ្នកនាំពាក្យរបស់កងទ័ពសម្ព័ន្ធអារ៉ាប់ ក្រុមអ្នកច្បាប់នឹងពិនិត្យ សិក្សាលើរបាយការណ៍ស៊ើបអង្កេត ដែលត្រូវបានបញ្ជូនរួចហើយទៅក្រុមប្រឹក្សាសិទ្ធិមនុស្ស។
អេមីរ៉ា អារ៉ាប់រួម ដែលបានចូលរួមជាមួយអារ៉ាប៊ី សាអូឌីត បើកប្រតិបត្តិការយោធា នៅយេម៉ែន អះអាងថា នឹងឆ្លើយតបឲ្យបានឆាប់ទៅរបាយការណ៍របស់អ្នកជំនាញ។ ប៉ុន្តែ ប្រមុខការបរទេសរបស់ប្រទេសនេះបញ្ជាក់សាជាថ្មីពីតួនាទីសម្ព័ន្ធអារ៉ាប់ ក្នុងការជួយគាំទ្ររដ្ឋាភិបាលយេម៉ែន និងជួយស្តារកសាងអនាគតរបស់យេម៉ែនមួយ ដែលគ្មានការលូកដៃរបស់អ៊ីរ៉ង់ ដែលជាសត្រូវប្រជែងរបស់សម្ព័ន្ធអារ៉ាប់។
របាយការណ៍របស់អ្នកជំនាញ ចេញផ្សាយនៅតែប៉ុន្មានថ្ងៃមុន ការបើកចរចាសន្តិភាព រវាង រដ្ឋាភិបាលយេម៉ែន និងពួកឧទ្ទាមហ៊ូទី នៅទីក្រុងហ្សឺណែវ នៅថ្ងៃ ទី ៦ខែកញ្ញាក្រោយ។ របាយការណ៍របស់ជំនាញ បានសិក្សាទៅលើទីតាំងចំនួន១១កន្លែង ដែលរងការវាយប្រហារពីកងទ័ពសម្ព័ន្ធអារ៉ាប់ ប៉ុន្តែ អ្នកជំនាញមិនបានយោងដល់សម្ព័ន្ធអន្តរជាតិ ប្រទេសលោកខាងលិច ឬអ៊ីរ៉ង់ ដែលតាមពិត ជាអ្នកបានផ្តល់ លក់ អាវុធ និងព័ត៌មានសម្ងាត់ ដល់ក្រុមជម្លោះប្រដាប់អាវុធ នៅក្នុងសង្រ្គមស៊ីវិលនៅយេម៉ែននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ