បាត់ខ្លួនលោកហ្សាម៉ាល់ ខាស្ហូហ្ស៊ី៖អារ៉ាប៊ីសាអូឌីតបញ្ចេញប្រតិកម្មដោយដំឡើងសម្លេងដាក់វិញ
ជិត ២សប្តាហ៍ដែលអ្នកកាសែតជនជាតិអារ៉ាប៊ីសាអូឌីតលោកហ្សាម៉ាល់ ខាស្ហូហ្ស៊ីបានបាត់ខ្លួន បន្ទាប់ពីលោកស្ហូហ្ស៊ីបានចូលក្នុងស្ថានកុងស៊ុលអារ៉ាប៊ីសាអូឌីតប្រចាំទីក្រុងអ៊ីស្តង់ប៊ូល ប្រទេសតួកគី។ រឿងរ៉ាវមួយនេះបានបង្កចេញនូវភាពតានតឹងកាន់តែខ្លាំងរវាងអារ៉ាប៊ីសាអូឌីតជាមួយក្រុមប្រទេសសម្ព័ន្ធមិត្ត ពិសេសជាមួយតួកគី និងអាមេរិក។ ក្រោយការព្រមានខ្លាំងៗពីលោកប្រធានាធិបតីតួកគីអ៊ែរដូហ្កាន និងសមភាគីអាមេរិកលោកដូណាល់ ត្រាំមក រដ្ឋាភិបាលអារ៉ាប៊ីសាអូឌីតបានបញ្ចេញប្រតិកម្មដោយព្រមាននឹងចាត់វិធានការចាស់ដៃតបវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
គេនៅមិនទាន់ដឹងថា តើមានទណ្ឌកម្មអ្វីខ្លះដែលទីក្រុងរីយ៉ាដត្រៀមសងសឹកវិញ បើអាមេរិក និងប្រទេសផ្សេងផ្តើមដាក់ទណ្ឌកម្មមុនគេនោះ។ អ្វីដែលគេដឹង អ្នកទទួលខុសត្រូវជាន់ខ្ពស់អារ៉ាប៊ីសាអូឌីតមិនបញ្ចេញឈ្មោះម្នាក់បានព្រមានទុកជាមុនថា សេដ្ឋកិច្ចអារ៉ាប៊ីសាអូឌីតបានដើរតួនាទីសំខាន់ និងមានឥទ្ធិពលលើសេដ្ឋកិច្ចពិភពលោក។ តាមអ្នកទទួលខុសត្រូវជាន់ខ្ពស់អារ៉ាប៊ីសាអូឌីតមិនបញ្ចេញឈ្មោះរូបនេះដដែល ទីក្រុងរីយ៉ាដមិនអាចទទួលការគំរាម ឬការប៉ុនប៉ងព្យាយាមដាក់គំនាបណាឡើយ ទោះបីជាក្រោមរូបភាពទណ្ឌកម្មសេដ្ឋកិច្ច ឬគំនាបនយោបាយក្តី។
ចំណែកឯកអគ្គរាជទូតអារ៉ាប៊ីសាអូឌីតប្រចាំទីក្រុងវ៉ាស៊ីនតោនបានផ្សព្វផ្សាយសេចក្តីប្រកាសព័ត៌មានមួយដោយគូសបញ្ជាក់ថា អារ៉ាប៊ីសាអូឌីតសូមកោតសរសើរចំពោះប្រទេសដែលមិនទាញសេចក្តីសន្និដ្នានផ្តេសផ្តាស់ក្នុងខណៈដែលការស៊ើបអង្កេតកំពុងបន្តធ្វើ។ ការដំឡើងសម្លេងខ្លាំងៗរបស់ទីក្រុងរីយ៉ាដពេលនេះបានកើតមានឡើង ក្រោយពីមានការព្រមានខ្លាំងៗពីលោកប្រធានាធិបតីអាមេរិកដូណាល់ ត្រាំដែលថា លោកនឹងដាក់ពិន័យចាស់ដៃ បើរកឃើញថា អារ៉ាប៊ីសាអូឌីតពិតជាអ្នកនៅពីក្រោយការបាត់ខ្លួនអ្នកកាសែតអារ៉ាប៊ីសាអូឌីតលោកហ្សាម៉ាល់ ខាស្ហូហ្ស៊ីមែននោះ។
យ៉ាងណាក៏ដោយ និងទោះបីមិនទាន់មានវិធានការទណ្ឌកម្មជាក់ស្តែងក៏ដោយ ក៏រឿងរ៉ាវមួយនេះបាន និងកំពុងជះឥទ្ធិពលអវិជ្ជមានបណ្តើរលើអារ៉ាប៊ីសាអូឌីត។ ក្រុមអ្នកវិនិយោគអារ៉ាប៊ីសាអូឌីតហាក់មិនបានមើលស្រាលលើការព្រមានរបស់លោកដូណាល់ ត្រាំទេ។ ភាពរំជើបរំជួលនៅផ្សាយភាគហ៊ុនក្នុងទីក្រុងរីយ៉ាដបានធ្វើឲ្យបាត់បង់តម្លៃសរុប ៥០ ០០០លានដុល្លារគិតពីថ្ងៃពុធ ទី១០ តុលារហូតដល់ថ្ងៃអាទិត្យ ទី១៥ តុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ