អ៊ីស្រាអែលបរិហារឃាតកម្មសម្លាប់លោកខាស្ហូហ្ស៊ី តែចង់រួមដៃជាមួយអារ៉ាប៊ីសាអូឌីតដើម្បីប្រឆាំងអ៊ីរ៉ង់
នៅថ្ងៃសុក្រ ទី២ វិច្ឆិកា លោកនាយករដ្ឋមន្រ្តីអ៊ីស្រាអែលនេតាន់យ៉ាហ៊ូបានថ្កោលទោសលើឃាតកម្មសម្លាប់អ្នកកាសែតអារ៉ាប៊ីសាអូឌីតលោកហ្សាម៉ាល់ ខាស្ហូហ្ស៊ីនៅក្នុងស្ថានកុងស៊ុលអារ៉ាប៊ីសាអូឌីតប្រចាំទីក្រុងអ៊ីស្តង់ប៊ូល ប្រទេសតួកគីកាលពីថ្ងៃទី២ តុលា។ តែទន្ទឹមគ្នានេះ លោកនេតាន់យ៉ាហ៊ូហាក់បានផ្តល់អាទិភាព និងឲ្យតម្លៃខ្លាំងលើកិច្ចសហប្រតិបត្តិការរវាងអ៊ីស្រាអែល និងអារ៉ាប៊ីសាអូឌីតក្នុងការប្រឆាំងនឹងប្រទេសអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:១៣
« ឃាតកម្មសម្លាប់លោកហ្សាម៉ាល់ ខាស្ហូហ្ស៊ីជារឿងអាក្រក់ និងត្រូវស្វែងរកការពិត » នេះជាប្រតិកម្មលើកទី១ និងជាសាធារណៈរបស់លោកប្រមុខរដ្ឋាភិបាលអ៊ីស្រាអែលនេតាន់យ៉ាហ៊ូ។ លោកនេតាន់យ៉ាហ៊ូបានថ្លែងយ៉ាងដូចនេះទៅកាន់ហ្វូងអ្នកកាសែត បន្ទាប់ពីកិច្ចប្រជុំជាមួយថ្នាក់ដឹកនាំនៃប្រទេសប៊ុលហ្ការី ក្រិក រ៉ូម៉ានី និងស៊ែរប៊ីក្នុងទីក្រុងវ៉ារណា ប្រទេសប៊ុលហ្ការី។ គួររម្លឹកថា លោកខាស្ហូហ្ស៊ីដែលជាអ្នកកាសែត និងជាអ្នកប្រឆាំងអារ៉ាប៊ីសាអូឌីតត្រូវបានគេសម្លាប់នៅក្នុងស្ថានកុងស៊ុលអារ៉ាប៊ីសាអូឌីតប្រចាំទីក្រុងអ៊ីស្តង់ប៊ូល ប្រទេសតួកគីក្នុងថ្ងៃទី២ តុលា បន្ទាប់ពីរូបគាត់បានចូលទៅធ្វើក្រដាសស្នាមរៀបការ។ តែទន្ទឹមនឹងការថ្កោលទោសជាចំហ លោកនេតាន់យ៉ាហ៊ូមិនភ្លេចឲ្យតម្លៃខ្លាំងលើកិច្ចសហប្រតិបត្តិការរវាងអ៊ីស្រាអែល និងអារ៉ាប៊ីសាអូឌីតក្នុងការប្រឆាំងនឹងប្រទេសអ៊ីរ៉ង់ទេ។
« ដើម្បីស្ថិរភាពនៅក្នុងពិភពលោក និងនៅក្នុងតំបន់ វាពិតជាសំខាន់ខ្លាំងណាស់ដែលអារ៉ាប៊ីសាអូឌីតត្រូវតែមានស្ថិរភាព » នេះជាការបន្ថែមរបស់លោកនេតាន់យ៉ាហ៊ូ។ ប្រតិកម្មស្រដៀងគ្នានេះក៏មានពីរដ្ឋមន្រ្តីថាមពលអ៊ីស្រាអែលដែលថា ក្រុមប្រទេសអារ៉ាប់ទាំងអស់ រួមទាំងអារ៉ាប៊ីសាអូឌីតផងសុទ្ធសឹងជាសម្ព័ន្ធមិត្តរបស់អ៊ីស្រាអែលក្នុងការប្រឆាំងទប់នឹងឥទ្ធិពល និងការគំរាមកំហែងនុយក្លេអ៊ែររបស់អ៊ីរ៉ង់នារយៈពេលប៉ុន្មានឆ្នាំចុងក្រោយនេះ។ តាំងពីឆ្នាំ ២០១៤ មក លោកនេតាន់យ៉ាហ៊ូតែងចាត់ទុកទំនាក់ទំនងរវាងទីក្រុងតេឡាវី និងទីក្រុងរីយ៉ាដជាទំនាក់ទំនងពាក់កណ្តាលផ្លូវការ។
តែបញ្ហានៅត្រង់ថា ភាគីអារ៉ាប៊ីសាអូឌីតមិនដែលបានបញ្ជាក់លើការអះអាងរបស់អ៊ីស្រាអែលរបៀបនេះម្តងណាឡើយ ហើយពេលខ្លះថែមទាំងបានបដិសេធទៀតផង។ សូមជម្រាបថារហូតមកដល់ពេលនេះ មានប្រទេសអារ៉ាប់តែពីរគត់ គឺអេហ្ស៊ីប និងហ្សកដានីដែលមានកិច្ចព្រមព្រៀងសន្តិភាពជាមួយអ៊ីស្រាអែល។ តែគេមិនត្រូវភ្លេចនិយាយទេថា អ៊ីស្រាអែលបាននិងកំពុងព្យាយាមងាកទៅប្រទេសអារ៉ាប់ផ្សេងទៀត។ ថ្មីៗនេះ លោកនេតាន់យ៉ាហ៊ូបានទៅទស្សនកិច្ចភ្ញាក់ផ្អើលមួយនៅក្នុងប្រទេសអូម៉ង់ ហើយក្នុងសប្តាហ៍នេះ គណៈប្រតិភូអ៊ីស្រាអែលក៏បានទៅទស្សនកិច្ចនៅក្នុងប្រទេសអេមីរ៉ាអារ៉ាប់រួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ