សភាអឺរ៉ុបនៅថ្ងៃពុធម្សិលមិញ បានបោះឆ្នោតអនុញ្ញាតរដ្ឋាភិបាលប្រទេសសមាជិក ចាប់ផ្តើមប្រើប្រព័ន្ធ រួមមួយដើម្បី ផ្ញើសារ ប្រកាសអាសន្នពីករណីគំរាមកំហែងភេរវកម្មទៅប្រជាពលរដ្ឋរបស់ខ្លួន។ អរគុណដល់ការរីកចម្រើននៃបច្ចេកវិទ្យា សារប្រកាសអាសន្នក្នុងទូរស័ព្ទដៃ ស្មាតហ្វូននេះ នឹងទៅ ជំនួសជួង ស៊ីរ៉ែនដែលគេបានប្រើរហូតមក សម្រាប់ប្រកាសអាសន្ន ដូចជាគ្រោះថ្នាក់ធម្មជាតិ ឬការគំរាមកំហែងសន្តិសុខថ្នាក់ជាតិ។ ទូរស័ព្ទ ស្មាតហ្វូន នឹងជួយឲ្យគេបានទទួលសារដែលប្រាប់ពីកន្លែងរងការវាយប្រហារភេរវកម្ម ប៉ុន្តែ ទូរស័ព្ទ ស្មាតហ្វូនក៏ជាឧបករណ៍ដ៏ពេញនិយម ប្រើច្រើន ជាយូរណាស់មកហើយរបស់ក្រុមភេរវជន។ ស្មាតហ្វូន ជាឧបករណ៍ផ្តល់ប្រយោជន៍ ប៉ុន្តែ ក៏ជាអន្ទាក់ជាប់ ករបស់ក្រុមភេរវជនដែរ។ ហេតុអ្វីបានជាដូច្នេះ?
ការវាយប្រហារភេរវកម្មទៅលើក្រុងប៉ារីស កាលពីបីឆ្នាំមុន ១៣វិច្ឆិកា ២០១៥ គឺជាឧទាហរណ៍ចុងក្រោយមួយ ដែលបញ្ជាក់ពីការដើរតួនាទីដ៏សំខាន់របស់ស្មាតហ្វូន ក្នុងផែនការធ្វើភេរវកម្ម។ ភេរវកម្មនឹងមិនអាចប្រព្រឹត្តទៅបានទេ នៅប៉ារីស បើសិនគ្មានជំនួយពីស្មាតហ្វូន។ មន្រ្តីប្រយុទ្ធប្រឆាំងភេរវកម្មរបស់បារាំង ដែលសុំមិនបញ្ចេញឈ្មោះ បាននិយាយថា ក្រុមប្រដាប់អាវុធ ជីហាត បានប្រើជាប់ជាប្រចាំស្មាតហ្វូន ដើម្បីរៀបចំ សម្របសម្រួល សកម្មភាពវាយប្រហាររបស់ពួកគេ ដែលបានធ្វើឡើង នៅ៦កន្លែងផ្សេងៗគ្នា ក្នុងយប់តែមួយ ក្នុងទីក្រុងប៉ារីស។
នៅមុនពេលចូលទៅក្នុងសាលតន្រ្តីBataclan ជាទីដែលក្រុមភេរវជនបំផ្ទុះគ្រាប់បែក និងបាញ់រះសម្លាប់មនុស្ស៩០នាក់ គ្នីគ្នាម្នាក់របស់ភេរវជនបានផ្ញើសារទៅអ្នកផ្សំគំនិត របស់ខ្លួន នៅប្រទេសបែលហ្សិកថា ពួកគេកំពុងដើរចូលទៅក្នុងសាលតន្រ្តី ហើយនិងចាប់ផ្តើមធ្វើសកម្មភាព។
ដោយពិតទៅការប្រើទូរស័ព្ទដៃដើម្បីផែនការភេរវកម្ម មិនមែនជារឿងថ្មីនោះទេ។ នៅប្រទេសអ៊ីរ៉ាក់ ចាប់តាំងពីឆ្នាំ ២០០៣ ទូរស័ព្ទដៃដ៏សាមញ្ញដែលនៅមិនទាន់ឆ្លាតវៃ ដូចស្មាតហ្វូនសព្វថ្ងៃនេះនៅឡើយនោះ ត្រូវបានគេប្រើសម្រាប់បញ្ជូនសារ ទៅចុចបំផ្ទុះគ្រាប់បែកច្នៃ ប្រឆាំងក្បួនរថយន្តទ័ពអាមេរិកាំង។ ចាប់តាំងពីពេលនោះ ក្រុមអាល់កៃដាបានចាប់យកវិធីសាស្រ្តខាងលើមកប្រើ សម្រាប់សកម្មភាពវាយប្រហារភេរវកម្មរបស់ខ្លួន។
សូមអាន៖ ជម្ងឺប្រភេទថ្មីសម័យបច្ចេកវិទ្យាស្មាតហ្វូន
ជាមួយនឹងការវិវឌ្ឍផ្នែកបច្ចេកវិទ្យា ទូរស័ព្ទដៃសាមញ្ញដែលអាចត្រឹមតែផ្ញើសារ ត្រូវបានក្រុមភេរវជនជំនួសមកវិញ ដោយទូរស័ព្ទ ឆ្លាតវៃ ស្មាតហ្វូន ដែលមានប្រសិទ្ធិភាព និងមានមុខងារច្រើនមុខ។ ទូរស័ព្ទទំនើបបច្ចុប្បន្ន ស្មាតហ្វូនដែលភ្ជាប់ជានិច្ចទៅនឹងអ៊ីនធ័រនែត គឺប្រៀបបាននឹងម៉ាស៊ីនកុំព្យូរទ័រតូចមួយ ដែលគេអាចកាន់នៅនឹងដៃ ដាក់ជាប់តាមខ្លួន និងចុចប្រើ គ្រប់ពេលវេលា គ្រប់ទីកន្លែង។ ក្នុងបរិបទនៃបច្ចេកវិទ្យាព័ត៌មានវិទ្យាដ៏ទំនើបនេះ ស្មាតហ្វូន មានសមត្ថភាពសរសេរផ្ញើសារ ថតរូប ថតសំលេង និងចែកចាយព័ត៌មានពេញ២៤ម៉ោង។ សម្រាប់លោកLaurent Heslault ប្រធានផ្នែកយុត្តិសាស្រ្តសន្តិសុខ ទូរស័ព្ទ លែងជាទូរស័ព្ទដូចមុនទៀតហើយ ប៉ុន្តែ វាជាកុំព្យូទ័រ ដែលមានកម្លាំងសមត្ថភាពខ្លាំង ជាងកុំព្យូទ័រដែលគេប្រើ កាលពី១០ឆ្នាំមុន។
មានកន្លែងស្តុកច្រើនជាងមុន និងមានសមត្ថភាព តភ្ជាប់យ៉ាងឆាប់រហ័ស ដោយសារបណ្តាញអ៊ីនធ័រនែត មាននៅគ្រប់ទីកន្លែង ស្មាតហ្វូនបានក្លាយជាឧបករណ៍សម្រាប់ទាក់ទង ផ្សព្វផ្សាយយ៉ាងមានប្រសិទ្ធិភាពជាងអ្វីៗទាំងអស់។ គេរកឃើញថា ក្រុមភេរវជនអ៊ីស្លាមជ្រុលនិយម បានទាញប្រយោជន៍ ពីកម្មវិធី ចែកចាយព័ត៌មាន ផ្ញើសារ ដូចជា Télégram Wire WhatsAppដើម្បីទាក់ទងគ្នីគ្នា ឲ្យរត់គេចខ្លួនពីការតាមចាប់របស់ប៉ូលិស។ នៅប៉ុន្មានឆ្នាំចុងក្រោយនេះ ក្រុមជីហាតអង្គការរដ្ឋអ៊ីស្លាមដែលធ្លាប់បានវាយដណ្តើមយកទឹកដីនៅប្រទេសស៊ីរី និងអ៊ីរ៉ាក់បានបង្ហោះផ្សាយឯកសារ បកប្រែជាច្រើនភាសា ដើម្បី ពន្យល់ប្រាប់ឲ្យសកម្មជនរបស់ខ្លួន ចេះដោនឡូត ប្រើកម្មវិធីក្នុងទូរស័ព្ទ ណាដែលមិនធ្វើឲ្យពួកគេ ត្រូវចាប់សញ្ញាបាន នៅក្នុងតំបន់សង្រ្គាម។ ស្មាតហ្វូនបានជួយសម្រួលផងដែរ ការរើសបញ្ចូលទាហានឲ្យក្រុមជីហាតអង្គការរដ្ឋអ៊ីស្លាម។ ជាមួយអេក្រង់កាន់តែធំ និងអាចភ្ជាប់អ៊ីនធ័រនែត គ្រប់ពេលវេលា ស្មាតហ្វូនជាឧបករណ៍ជួយឃោសនាផ្សព្វផ្សាយមនោគមវិជ្ជារបស់ពួកភេរវជនបានយ៉ាងមានប្រសិទ្ធិភាព។
កាលពី៣០ឆ្នាំមុន ដើម្បីមើលរូបវីដេអូ គេត្រូវចុចម៉ាស៊ីនដូរកាសែត បន្ទាប់មកគេដូរឌីស។ ប៉ុន្តែ ឥលូវនេះ វីដេអូ មាននៅអ៊ីនធ័រនែត ដែលគេអាចចុចចូលមើលគ្រប់ពេលវេលា ដោយគ្រាន់ដាក់ចង្អុលដៃពីលើតែប៉ុណ្ណោះ។
ស្មាតហ្វូនផ្តល់ប្រយោជន៍ ប៉ុន្តែ វាក៏នាំរឿងចង្រៃទៅឲ្យក្រុមភេរវជនវិញដែរ។ នៅពេលដែល ស្មាតហ្វូនជួយឲ្យក្រុមភេរវជនអាចថត ឬប្រកាសខ្លួនទទួលខុសត្រូវលើការវាយប្រហារភេរវកម្មដោយផ្ទាល់តែម្តង ស្មាតហ្វូនក៏ជាអន្ទាក់សម្រាប់ចាប់ទាក់ កឧក្រិដ្ឋជនទាំងនោះដែរ។ ទីភ្នាក់ងារស៊ើបការណ៍សម្ងាត់បានបង្កើនសមត្ថភាពឆ្កឹះឆ្កៀលប្រើទូរស័ព្ទ ស្មាតហ្វូនដើម្បី កំណត់អត្តសញ្ញាណរបស់ជនសង្ស័យ តាមដានស្តាប់ រហូតដល់ចាប់ខ្លួនបាន ហើយជាញឹកញយ គឺបានប្រើទិន្នន័យដែលរកឃើញនៅក្នុងទូរស័ព្ទ សម្រាប់ ធ្វើជាភស្តុតាងដាក់បន្ទុកនៅតុលាការទៀតផង។
អតីតមន្រ្តីប្រយុទ្ធប្រឆាំងភេរវកម្មម្នាក់នៅបារាំងបានលើកឡើងពីករណី នៅឆ្នាំ ២០១៣ នៅពេលទាហានបារាំងបើកប្រតិបត្តិការយោធា វាយប្រហារទៅលើក្រុមប្រដាប់អាវុធ អ៊ីស្លាមជ្រុលនិយម នៅម៉ាលី។ យន្តហោះចម្បាំងបារាំងសំដៅបាញ់ប្រហារតែទៅលើគោលដៅ ដែលមានសញ្ញាទូរស័ព្ទដៃរបស់ពួកភេរវជនតែប៉ុណ្ណោះ។ ពីមុនគេអាចប្តូរកាតស៊ីម ដើម្បីបន្លំអត្តសញ្ញាណ ប៉ុន្តែ ឥលូវនេះ ទូរស័ព្ទស្មាតហ្វូនមានអត្តសញ្ញាណ លេខកូដសំគាល់របស់មួយដែលគេមិនអាចដូរបាននោះទេ។ នៅពេលដែលគេចាប់បានសញ្ញា លេខកូដរបស់ទូរស័ព្ទហើយនោះ ទោះជាគេដូរកាតស៊ីម រាប់រយដងក៏គ្មានប្រយោជន៍ដែរ។
នៅពេលដែលទូរស័ព្ទធ្លាក់ទៅក្នុងដៃរបស់ភ្នាក់ងារស៊ើបការណ៍ ឬប៉ូលិសស៊ើបអង្កេតហើយ រឿងអ្វីក៏អាចលេចធ្លាយបានដែរ។ ម្ចាស់ទូរស័ព្ទ ប្រហែលមិនព្រម ឆ្លើយសារភាព ប៉ុន្តែ ស្មាតហ្វូន ដែលប្រៀបបាននឹងឃ្លាំងរបស់អាលីបាបា នឹងអាចបញ្ចេញរាល់ទិន្នន័យ ព័ត៌មាន ដែលគេអាចប្រើសម្រាប់ស្រាវចាប់ បណ្តាញរបស់ភេរវជនដែលមានគម្រោងធ្វើភេរវកម្ម ឬសូម្បីតែអ្នកដែលមានសមានចិត្តគាំទ្រក្រុមភេរវនិយម។ ស្មាតហ្វូនធ្វើឲ្យភេរវជនក្លាយជាទីដៅ ចាប់ខ្លួនរបស់ប៉ូលិស។ ដោយសារតែហេតុផលនេះហើយ បានជានៅក្នុងសម័យអ៊ីនធ័រនែត បច្ចេកវិទ្យាទំនើប មេក្លោងរបស់ក្រុមភេរវនិយមមួយចំនួនត្រលប់ទៅប្រើក្បួនចាស់វិញ គឺប្រើមនុស្សជាអ្នកនាំសារ ដើម្បីជៀសវាង ការចាប់តាមដានសញ្ញាពីគូសត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ