អ៊ីស្រាអែលបានប្រកាសពីការរកឃើញរូងក្រោមដីទាំងអស់ដែលជីកដោយពួកហេស្បូឡា
ប្រទេសអ៊ីស្រាអែលបានប្រកាសឲ្យដឹងនៅថ្ងៃអាទិត្យ ទី១៣ មករាពីការរកឃើញរូងក្រោមដីទាំងអស់ដែលពួកហេស្បូឡាបានជីកតាំងពីទឹកដីលីបង់។ បើយោងតាមរដ្ឋាភិបាលអ៊ីស្រាអែល ពួកហេស្បូឡាបានប្រើរូងក្រោមដីទាំងអស់នេះដើម្បីលួចឆ្លងទៅវាយប្រហារក្នុងទឹកដីអ៊ីស្រាអែល។ គួររម្លឹកថា ប្រតិបត្តិការស្វែងរករូងក្រោមដីជីកដោយពួកហេស្បូឡាដែលជាសម្ព័ន្ធមិត្តរបស់ប្រទេសអ៊ីរ៉ង់មួយនេះត្រូវបានទាហានអ៊ីស្រាអែលចាប់ផ្តើមតាំងពីដើមខែធ្នូ ឆ្នាំ ២០១៨។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ព័ត៌មានស្តីពីការរកឃើញរូងក្រោមដីទាំងអស់ដែលជីកដោយពួកហេស្បូឡាត្រូវបានប្រកាសដោយលោក Jonathan Conricus អ្នកនាំពាក្យកងទ័ពអ៊ីស្រាអែល។ តាមលោក Jonathan រូងក្រោមដីទាំងអស់ដែលបានរកឃើញត្រូវបានកម្ទេចចោល និងកំពុងបន្តកម្ទេចចោល រួចបន្ថែមថា លែងមានសល់រូងក្រោមដីដែលឆ្លងពីទឹកដីលីបង់ចូលក្នុងទឹកដីអ៊ីស្រាអែលទៀតឡើយ។ តែស្របពេលគ្នានេះ អ្នកនាំពាក្យកងទ័ពអ៊ីស្រាអែលរូបនេះដដែលបានទទួលស្គាល់ថា ពួកហេស្បូឡាកំពុងបន្តមានរូងក្រោមដីជាច្រើនទៀតនៅក្នុងទឹកដីលីបង់។
យោងតាមក្រសួងស៊ើបការណ៍សម្ងាត់អ៊ីស្រាអែល រូងក្រោមដីទាំងអស់នេះត្រូវបានពួកហេស្បូឡាលួចជីកយ៉ាងសម្ងាត់ដោយប្រើពេលអស់ជាច្រើនឆ្នាំ និងថា ជាមួយនឹងរូងក្រោមដីទាំងអស់នេះ ចលនាហេស្បូឡាអាចបញ្ជូនកម្លាំងប្រដាប់អាវុធខ្លួនដល់ទៅ ១ ៥០០នាក់ដើម្បីវាយប្រហារលើទីតាំង និងមូលដ្ឋានយោធាអ៊ីស្រាអែលនៅប៉ែកខាងជើង។ លោក Jonathan បានប្រាប់ឲ្យដឹងថា ទាហានអ៊ីស្រាអែលបានរកឃើញរូងក្រោមដីទាំងអស់ចំនួន ៦ ហើយរូងក្រោមដីទី៦ ចុងក្រោយទើបបានរកឃើញក្នុងថ្ងៃសៅរ៍ ទី១២ មករាដែលមានជម្រៅ ៥៥ម៉ែត្រ និងដែលច្រកចូលរបស់វាមានចម្ងាយប្រមាណជា ៨០០ម៉ែត្រពីទឹកដីលីបង់។
តាមលោក Jonathan រូងក្រោមដីចុងក្រោយមួយនេះជារូងក្រោមដីដែលមានជម្រៅជ្រៅជាងគេ វែងជាងគេ និងធំជាងគេ។ គួររម្លឹកថា កងទ័ពអ៊ីស្រាអែលបានប្រកាសឲ្យដឹងជាសាធារណៈនាដើមខែធ្នូ ឆ្នាំ ២០១៨ ពីការបើកប្រតិបត្តិការស្វែងរករូងក្រោមដីទាំងអស់ដែលជីកដោយពួកហេស្បូឡានៅតាមព្រំដែនរវាងអ៊ីស្រាអែល និងលីបង់។ ការប្រកាសកាលណោះបានបំផុសឲ្យមានក្តីបារម្ភពីការផ្តើមមានភាពតានតឹងជាថ្មីរវាងអ៊ីស្រាអែល និងចលនាហេស្បូឡាដែលធ្លាប់ផ្ទុះសង្រ្គាមនឹងគ្នាក្នុងឆ្នាំ ២០០៦ ហើយដែលសង្រ្គាមមួយនេះបានបិទបញ្ចប់តាមរយៈសេចក្តីសម្រេចរបស់ក្រុមប្រឹក្សាសន្តិសុខលេខ ១៧០១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ