អ៊ីរ៉ង់បន្តផ្គើនសហគមន៍អន្តរជាតិតាមរយៈការសាកល្បងគ្រាប់មីស៊ីលថ្មីប្រកបដោយជោគជ័យ
នៅថ្ងៃសៅរ៍ ទី២ កុម្ភៈ ប្រទេសអ៊ីរ៉ង់បានប្រកាសពីការបាញ់សាកល្បងប្រកបដោយជោគជ័យនូវគ្រាប់មីស៊ីលថ្មីដែលអាចបាញ់បានចម្ងាយជាង ១ ៣០០គីឡូម៉ែត្រ។ ដំណឹងមួយនេះត្រូវបានផ្សព្វផ្សាយដោយទូទស្សន៍ជាតិដែលស្រង់សម្តីលោករដ្ឋមន្រ្តីក្រសួងការពារជាតិអាមៀរ ហាតាមីនៅក្នុងពិធីប្រារព្ធខួបគម្រប់ ៤០ឆ្នាំនៃបដិវត្តអ៊ីស្លាមអ៊ីរ៉ង់ឆ្នាំ ១៩៧៩។ ទង្វើបាញ់សាកល្បងគ្រាប់មីស៊ីលរបស់អ៊ីរ៉ង់ពេលនេះនឹងបង្កឲ្យការវាយប្រហាររិះគន់ពីសហគមន៍អន្តរជាតិ ពិសេសពីសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:០៨
លោករដ្ឋមន្រ្តីការពារជាតិអាមៀរ ហាតាមីបានប្រកាសជាផ្លូវការនៅក្នុងឱកាសពិធីប្រារព្ធខួបគម្រប់ ៤០ឆ្នាំនៃបដិវត្តអ៊ីរ៉ង់ថា គ្រាប់មីស៊ីលថ្មីដែលមានឈ្មោះ Hoveizeh បានហោះក្នុងចម្ងាយ ១ ២០០គីឡូម៉ែត្រ និងធ្លាក់ចំគោលដៅដែលបានកំណត់។ សម្រាប់លោកហាតាមី គ្រាប់មីស៊ីល Hoveizeh ជាជោគជ័យផ្នែកការពារ និងជាដៃរបស់សាធារណរដ្ឋអ៊ីស្លាមអ៊ីរ៉ង់។ គួរបញ្ជាក់ថាក្នុងឆ្នាំ ២០១៥ អ៊ីរ៉ង់ក៏ធ្លាប់បានបង្ហាញនូវប្រភេទគ្រាប់មីស៊ីលស្រដៀងគ្នានេះដែរ តែអាចបាញ់បានចម្ងាយត្រឹម ៧០០គីឡូម៉ែត្រប៉ុណ្ណោះ។ ដូច្នេះគេអាចនិយាយបានថា បច្ចេកវិទ្យាគ្រាប់មីស៊ីលរបស់អ៊ីរ៉ង់ហាក់មិនខុសនឹងរបាយការណ៍របស់វិទ្យាសា្ថនផ្នែកយុទ្ធសាស្រ្តអន្តរជាតិនៃទីក្រុងឡុងដ៏ចេញផ្សាយក្នុងឆ្នាំ ២០១៧ ទេ។
របាយការណ៍កាលណោះបានឲ្យដឹងថា ទីក្រុងតេហេរ៉ង់ផលិតគ្រាប់មីស៊ីលប្រមាណជា ១២គ្រាប់ដែលអាចបាញ់បានចម្ងាយពី ២០០ ទៅ ២ ០០០គីឡូម៉ែត្រ និងដែលអាចពាំក្បាលនុយក្លេអ៊ែរក្នុងទម្ងន់ពី ៤៥០ ទៅ ១ ២០០គីឡូក្រាម។ កម្មវិធីផលិតគ្រាប់មីស៊ីលរបស់អ៊ីរ៉ង់បានបង្កក្តីបារម្ភយ៉ាងខ្លាំងដល់បស្ចិមលោកដែលចោទអ៊ីរ៉ង់ពីបទមានឆន្ទៈបង្កអស្ថិរភាពនៅក្នុងតំបន់មជ្ឈិមបូព៌ា។ តែទីក្រុងតេហេរ៉ង់បានបដិសេធ និងរម្លឹកជាថ្មីថា កម្មវិធីគ្រាប់មីស៊ីលរបស់ខ្លួនមានគោលដៅការពារខ្លួន ហើយបញ្ហាមួយនេះមិនអាចចរចាបានទេ។ គួរបញ្ជាក់ថា បើផ្អែកតាមសេចក្តីសម្រេចរបស់ក្រុមប្រឹក្សាសន្តិសុខលេខ ២២៣១ អ៊ីរ៉ង់មិនត្រូវមានសកម្មភាពអ្វីពាក់ព័ន្ធនឹងគ្រាប់មីស៊ីលបាលីស្ទិកណាដែលអាចពាំក្បាលនុយក្លេអ៊ែរទៅជាមួយទេ។
តែក្រុមប្រទេសបស្ចិមលោក និងអ៊ីរ៉ង់បានធ្វើការបកស្រាយខុសគ្នាលើសេចក្តីសម្រេចចិត្តលេខ ២២៣១ មួយនេះ។ នៅថ្ងៃអង្គារ ទី២៩ មករា លេខាធិការនៃឧត្តមក្រុមប្រឹក្សាសន្តិសុខជាតិនៅអ៊ីរ៉ង់បានបញ្ជាក់ថា អ៊ីរ៉ង់គ្មានឆន្ទៈណាមួយដើម្បីបង្កើនចម្ងាយបាញ់គ្រាប់មីស៊ីលឡើយ ពិសេសចំពេលដែលកម្មវិធីអភិវឌ្ឍគ្រាប់មីស៊ីលបាលីស្ទិកអ៊ីរ៉ង់កំពុងស្ថិតក្រោមគំនាបរបស់សហគមន៍អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ