នៅយេម៉ែន ចលនាឧទ្ទាមហ៊ូទីសបញ្ជាក់ពីលទ្ធភាពអាចសំពងអារ៉ាប៊ីសាអូឌីត និងអេមីរ៉ាតអារ៉ាប់រួម
នៅក្នុងប្រទេសយេម៉ែន ក្រុមឧទ្ទាមហ៊ូទីសបានប្រកាសព្រមានក្នុងថ្ងៃអាទិត្យ ទី១៧ មីនាថា បើប្រទេសអារ៉ាប៊ីសាអូឌីត និងប្រទេសអេមីរ៉ាតអារ៉ាប់រួមមិនគោរពកិច្ចព្រមព្រៀងឈប់បាញ់នៅកំពង់ផែហូដីដាទេ នោះពួកគេនឹងបើកការវាយប្រហារត្រង់លើទីក្រុងរីយ៉ាដ និងទីក្រុងអាប៊ូដាប៊ីដោយប្រើគ្រាប់មីស៊ីលបាលីស្ទិក។ ដើម្បីអាចបញ្ជាក់ពីការគោរពបទឈប់បាញ់ពីសំណាក់អារ៉ាប៊ីសាអូឌីត និងអេមីរ៉ាតអារ៉ាប់រួម ចលនាឧទ្ទាមហ៊ូទីសបានទាមទារឲ្យមានការធានាពីអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០២:១១
ការព្រមានត្រង់លើអារ៉ាប៊ីសាអូឌីត និងអេមីរ៉ាតអារ៉ាប់រួមក៏ដោយសារតែប្រទេសទាំងពីរជាសមាជិកក្នុងកម្លាំងសម្ព័ន្ធអារ៉ាប់ដឹកនាំដោយអារ៉ាប៊ីសាអូឌីតដែលវាយប្រហារលើពួកឧទ្ទាមហ៊ូទីសតាំងពីឆ្នាំ ២០១៥។ អ្នកនាំពាក្យម្នាក់របស់ចលនាឧទ្ទាមហ៊ូទីសបានបញ្ជាក់ថា ពួកគេមានស្តុកគ្រាប់មីស៊ីលគ្រប់គ្រាន់ និងកំពុងត្រៀមខ្លួនវាយប្រហារលើទីក្រុងរីយ៉ាដ និងទីក្រុងអាប៊ូដាប៊ី ប្រសិនបើប្រទេសទាំងពីរមិនគោរពកិច្ចព្រមព្រៀងឈប់បាញ់នៅកំពង់ផែហូដីដានោះទេ។ ចំណែកវរសេនីយ៍មា្នក់របស់ឧទ្ទាមហ៊ូទីសឈ្មោះយ៉ាយ៉ា សារ៉េអាបានបញ្ជាក់ពីការមានព័ត៌មានគ្រប់គ្រាន់ដែលថា អារ៉ាប៊ីសាអូឌីត និងអេមីរ៉ាតអារ៉ាប់រួមកំពុងរៀបចំជើងព្រួលបើកការវាយប្រហារលើកំពង់ផែហូដីដា និងថា លោកកំពុងតាមដានព័ត៌មានមួយនេះយ៉ាងជាប់។
វរសេនីយ៍ឧទ្ទាមហ៊ូទីសរូបនេះដដែលមិនបានប្រាប់ឈ្មោះប្រទេសដែលបានប្រគល់គ្រាប់មីស៊ីលបាលីស្ទិកឲ្យទេ តែបានទទួលស្គាល់ថា រូបភាពនៃជម្លោះនៅយេម៉ែនសព្វថ្ងៃជាការប្រឈមមុខដាក់គ្នាផ្ទាល់រវាងអារ៉ាប៊ីសាអូឌីត និងប្រទេសអ៊ីរ៉ង់ ហើយជម្រើសប្រើគ្រាប់មីស៊ីល និងដ្រូនជាជម្រើសយុទ្ធសាស្រ្ត។ តាមវរសេនីយ៍យ៉ាយ៉ា សារ៉េអា គ្រឿងសព្វាវុធនេះជាចម្លើយដ៏មានប្រសិទ្ធិភាពតបនឹងការវាយប្រហារពីកម្លាំងសម្ព័ន្ធអារ៉ាប់ក្រោមមេបញ្ជាការអារ៉ាប៊ីសាអូឌីត។ គួររម្លឹកថា កិច្ចព្រមព្រៀងឈប់បាញ់នៅកំពង់ផែហូដីដាត្រូវបានចុះហត្ថលេខានាខែធ្នូ ឆ្នាំ ២០១៨ រវាងកម្លាំងសម្ព័ន្ធអារ៉ាប់ និងចលនាឧទ្ទាមហ៊ូទីសក្នុងទីក្រុងស្តុកខុល ប្រទេសស៊ុយអែត។
តែមកទល់ពេលនេះ ភាគីទាំងពីរបានចោទគ្នាទៅវិញ ទៅមកពីការរំលោភបំពានលើកិច្ចព្រមព្រៀង។ ភាគីឧទ្ទាមហ៊ូទីសដែលបដិសេធមិនព្រមដកខ្លួនចេញពីកំពង់ផែហូដីដាចង់ឲ្យមានការធានាបន្ថែមពីអង្គការសហប្រជាជាតិ។ ក្តីបារម្ភរបស់ពួកគេ គឺការធ្លាក់កំពង់ផែហូដីដាទៅក្នុងកណ្តាប់ដៃកម្លាំងសម្ព័ន្ធអារ៉ាប់ ក្រោយពីពួកគេដកខ្លួនចេញ។ គួររម្លឹកថា ហូដីដាជាកំពង់ផែយុទ្ធសាស្រ្ត ព្រោះវាជាច្រកចូលជំនួយមនុស្សធម៌អន្តរជាតិសម្រាប់ចិញ្ចឹមប្រជាជនយេម៉ែនជាច្រើនលាននាក់ដែលកំពុងជួបគ្រោះទុរ្ភិក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ