អ៊ីស្រាអែលថាត្រៀមធ្វើគ្រប់យ៉ាងនិងខ្លាំងៗលើតំបន់ហ្កាហ្សារបស់ប៉ាឡេស្ទីន
នាយករដ្ឋមន្ត្រីអ៊ីស្រាអែល នេតាន់យ៉ាហ៊ូ បានព្រមានជាថ្មីនៅថ្ងៃអង្គារនេះ ថាដើម្បីការពារប្រជាជននិងប្រទេសជាតិ អ៊ីស្រាអែលត្រៀមជាស្រេចនឹងធ្វើសកម្មភាពយោធាថ្មី ខ្លាំងនិងច្រើនជាងមុនទៅទៀត សង្គ្រប់លើតំបន់ហ្កាហ្សា។ សេចក្តីព្រមាននេះធ្វើឡើងបន្ទាប់ពី អ៊ីស្រាអែលបានបើកការវាយប្រហារផ្លូវអាកាសយ៉ាងសន្ធាប់ ទៅលើដែនដីហ្កាហ្សារបស់ប៉ាឡេស្ទីន ដែលបានបាញ់រ៉ូកែត កាលពីយប់ថ្ងៃអាទិត្យឆ្លងចូលថ្ងៃចន្ទ ធ្លាក់ចំលើផ្ទះពលរដ្ឋអ៊ីស្រាអែល ក្បែរក្រុងTel-Aviv។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
បន្ទាប់ពីបានបាញ់តបតគ្នារវាងយោធាអ៊ីស្រាអែលនិងកងប្រដាប់អាវុធប៉ាឡេស្ទីន ដោយម្ខាង ប្រើយន្តហោះ ឧទ្ធម្ភាគចក្រវាយប្រហារតាមផ្លូវអាកាស ប្រើរថគ្រោះបាញ់ផ្លោងយ៉ាងសន្ធាប់ និងម្ខាងទៀតដោយប្រើរ៉ុកកែត និងកាំភ្លើងត្បាល់ អស់ពេលស្ទើរពេញមួយថ្ងៃមួយយប់មក តំបន់ហ្កាហ្សាបានស្គាល់ភាពស្ងប់ស្ងាត់មកវិញ នៅថ្ងៃព្រឹកថ្ងៃអង្គារទី ២៦មីនា នេះ។
ប៉ុន្តែនាយករដ្ឋមន្ត្រីអ៊ីស្រាអែល មិនស្ងប់ចិត្តទេ ! លោក នេតាន់យ៉ាហ៊ូ ត្រូវសម្រេចចិត្តថាតើត្រូវបញ្ចប់ការបាញ់តបត ឬត្រូវធ្វើសកម្មភាពយោធាថ្មីបន្ថែមទៀត ? “អ៊ីស្រាអែលត្រៀមធ្វើសកម្មភាពខ្លាំងនិងច្រើនជាងនេះ ! យើងនឹងធ្វើគ្រប់យ៉ាងដើម្បីការពារប្រជាជននិងពលរដ្ឋអ៊ីស្រាអែល !” នេះជាចម្លើយរបស់លោកនាយករដ្ឋមន្ត្រីអ៊ីស្រាអែល ទៅកាន់អង្គសន្និសីទប្រចាំឆ្នាំនៃក្រុមអ្នកគាំទ្រអ៊ីស្រាអែលនៅសហរដ្ឋអាមេរិក American Israel Public Affairs Committee (Aipac) តាមរយៈវីដេអូកុងហ្វេរ៉ង់។ តាមការពិត លោកនេតាន់យ៉ាហ៊ូ ត្រូវធ្វើជាអធិបតី និងថ្លែងសុន្ទរកថាដោយផ្ទាល់ នៅកាន់សន្និសីទAipac តែដោយហេតុតែមានការបាញ់រ៉ូកែតរបស់ប៉ាឡេស្ទីន ទើបលោកត្រូវបង្រួញពេលបំពេញទស្សនកិច្ចនៅសហរដ្ឋអាមេរិក និងត្រលប់ចូលមាតុប្រទេសដោយបន្ទាន់ ដើម្បីគ្រប់គ្រងស្ថានការណ៍។
នៅចំពោះមុខអង្គសន្និសីទ លោកនាយករដ្ឋមន្ត្រីបានឆ្លៀតថ្លែងអំណរគុណជាថ្មីដល់ លោកប្រធានាធិបតីអាមេរិក ដែលបានទទួលស្វាគមន៍លោកនៅសេតវិមាន និងដែលបានចេញក្រិត្យ ជាប្រវត្តិសាស្ត្រ ទទួលស្គាល់តំបន់ខ្ពង់រាបGolanស៊ីរី ជារបស់អ៊ីស្រាអែល។ សូមបញ្ជាក់ថា តំបន់ខ្ពង់រាបនេះ ត្រូវបានអ៊ីស្រាអែលបានចូលឈ្លានពានធ្វើអាណានិគមនៅឆ្នាំ១៩៦៧ និងបានក្រសោបបញ្ចូលជាដែនដីខ្លួន នៅក្នុងឆ្នាំ១៩៨១ ប៉ុន្តែគ្មានសហគមន៍អន្តរជាតិណាទទួលស្គាល់ថាជារបស់អ៊ីស្រាអែលឡើយ។
ការប្រកាសទទួលស្គាល់ជាឯកតោភាគីរបស់លោក ត្រាំ បានបង្កបង្កើតឱ្យមានប្រតិកម្មយ៉ាងខ្លាំងពីសំណាក់អ៊ីរ៉ង់។ អ៊ីរ៉ង់បានចោទលោកត្រាំថាមនុស្សអាណានិគមនិយម។ ចំណែកអារ៉ាប៊ីសាអូឌីត ដែលជាសម្ព័ន្ធមិត្តដ៏ជិតស្និទ្ធរបស់អាមេរិកក៏បានថ្កោលទោសសេចក្តីសម្រេចចិត្តទទួលស្គាល់តំបន់ខ្ពង់រាបហ្កូឡាន លោកដូណាល់ត្រាំ ថាជាការរំលោភច្បាប់អន្តរជាតិ។ ស៊ីរីវិញ បានស្នើសុំឱ្យមានការបើកប្រជុំបន្ទាន់មួយ ស្តីពីស្ថានភាពនៅតំបន់ខ្ពង់រាបហ្កូឡាន នៅក្រុមប្រឹក្សាសន្តិសុខអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ