Unicef ស្រែកអាសន្ននឹងការប្រហារជីវិតក្មេងនៅអារ៉ាប៊ីសាអូឌីត និងអ៊ីរ៉ង់
មូលនិធិអង្គការសហប្រជាជាតិដើម្បីកុមារ (UNICEF) បានស្រែកអាសន្ននៅពេលទទួលដំណឹងថាមានករណីប្រហារជីវិតក្មេងមិនទាន់ពេញវ័យចំនួន៥នាក់ ក្នុងរយៈពេលពីរសប្តាហ៍នេះ នៅក្នុងប្រទេសអ៊ីរ៉ង់ និងប្រទេសអារ៉ាប៊ីសាអូឌីត។ ជាការអនុវត្តទោសប្រហារជីវិត ក្រោយពីសវនាការដែលប្រកបទៅដោយភាពមិនប្រក្រតី ! នេះជាការគូសបញ្ជាក់យ៉ាងរន្ធត់របស់ឧត្តមស្នងការការពារសិទ្ធិមនុស្សអង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
បើតាមព័ត៌មានដែលអង្គការការពារសិទ្ធិមនុស្សនិងអង្គការយូនីសេហ្វទទួលបាន សាធារណរដ្ឋអ៊ីស្លាមអ៊ីរ៉ង់ បានប្រហារជីវិតក្មេងជំទង់ពីរនាក់ ដែលមានអាយុទើបតែ១៧ឆ្នាំ និងដែលអាជ្ញាធរចាប់ខ្លួនបានកាលពីឆ្នាំ២០១៧ ពីបទចាប់រំលោភ និងលួចប្លន់។ ជាងនេះទៅទៀត អ៊ីរ៉ង់ មិនបានជូនដំណឹងប្រាប់ក្រុមគ្រួសារនិងមេធាវីឱ្យបានដឹងជាមុនទេ អំពីថ្ងៃខែនៃការប្រហារជីវិតទេ។ នេះជាទង្វើរំលោភសិទ្ធិដ៏ងងើលមួយ ព្រោះអ៊ីរ៉ង់បានចុះហត្ថលេខាលើសន្ធិសញ្ញាអន្តរជាតិស្តីពីសិទ្ធិស៊ីវិលនិងនយោបាយ និងសន្ធិសញ្ញាស្តីពីសិទ្ធិរបស់កុមារ ដែលហាមដាច់ខាតមិនឱ្យប្រហារជីវិតក្មេងមិនទាន់ពេញវ័យ (ក្រោមអាយុ១៨ឆ្នាំ)។
ចំណែកនៅអារ៉ាប៊ីសាអូឌីតវិញ ប្រទេសនេះទំនងជាបានប្រហារជីវិតក្មេងអស់បីនាក់ នៅថ្ងៃទី ២៣មេសា។ នេះបើតាមអង្គការយូនីសេហ្វដដែលដែលមិនបានបញ្ជាក់អំពីអាយុរបស់អ្នកទោសទាំងបីនោះឡើយ តែសូមធ្វើការថ្កោលទោសទង្វើរំលោភសិទ្ធិកុមាររបស់ប្រទេសទាំងពីរ ដោយបានរំលឹកថា សន្ធិសញ្ញាអង្គការសហប្រជាជាតិ ស្តីពីសិទ្ធិកុមារ បានបញ្ជាក់យ៉ាងច្បាស់ថាគ្មានទេ ទោសប្រហារជីវិត គ្មានទេការដាក់ទោសក្នុងពន្ធនាគារអស់មួយជីវិតដោយគ្មានលទ្ធភាពបានទទួលសេរីភាពចំពោះក្មេងក្រោមអាយុ១៨ឆ្នាំ។
នេះមិនមែនជាលើកទីមួយទេ ដែលអង្គការយូនីសេហ្វ បានទាញសញ្ញាអាសន្នស្តីពីការប្រហារជីវិតក្មេង។ អង្គការតែងបានជូនដំណឹងជាញយៗទាក់ទងនឹងការប្រហារជីវិតក្មេងនៅតំបន់ដើមបូព៌ា និងអាហ្វ្រិកខាងជើង។
កាលពីចុងខែមេសា អារ៉ាប៊ីសាអូឌីតបានប្រហារជីវិតអ្នកទោសចំនួន៣៧នាក់ ពីបទភេរវនិយម ដែលជាត្រូវ១០០នាក់បើគិតតាំងពីដើមឆ្នាំ២០១៩មក។ នេះបើតាមតួលេខផ្លូវការ។ ឯនៅក្នុងរបាយការណ៍ពិភពលោក ស្តីពីទោសប្រហារជីវិត ប្រចាំឆ្នាំ២០១៨វិញ អង្គការ Amnesty International បានបញ្ជាក់ថា បន្ទាប់ពីចិន ដែលគ្មានបង្ហាញតួលេខសម្លាប់អ្នកទោស ប្រទេសដែលប្រើអនុវត្តទោសប្រហារជីវិតច្រើនជាងគេគឺអ៊ីរ៉ង់ (២៥៣នាក់) និងអារ៉ាប៊ីសាអូឌីត (១៤៩នាក់)នេះឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ