ចលនាហេស្បូឡាព្រមានសងសឹកអ៊ីស្រាអែលដែលបានវាយប្រហារលើទឹកដីលីបង់ និងស៊ីរី
នៅល្ងាចថ្ងៃអាទិត្យ ទី២៥ សីហា ប្រមុខចលនាហេស្បូឡាលីបង់លោកហាសាន ណាស្រាឡាបានចោទអ៊ីស្រាអែលពីបទបានបញ្ជូនដ្រូនចំនួន ២គ្រឿងទៅកាន់ខេត្តប៉ែកខាងត្បូងទីក្រុងបេរូត ប្រទេសលីបង់។ ក្នុងចំណោមដ្រូនទាំងពីរគ្រឿងនោះ មានមួយគ្រឿងបានធ្លាក់ផ្ទុះលើទីស្នាក់ការទំនាក់ទំនងរបស់ចលនាហេស្បូឡាដោយមិនបណ្តាលឲ្យមានមនុស្សរងរបួសទេ។ ក្រៅពីវាយប្រហារលើទឹកដីលីបង់ អ៊ីស្រាអែលក៏បានវាយប្រហារដោយប្រើដ្រូននៅប៉ែកខាងត្បូងទីក្រុងដាម៉ាស់ ប្រទេសស៊ីរីដែលបណ្តាលឲ្យស្លាប់យុទ្ធជនហេស្បូឡាចំនួន ២នាក់។ លោកហាសាន ណាស្រាឡាបានគំរាមថា ការសងសឹកលើទង្វើអ៊ីស្រាអែលជារឿងមួយចៀសមិនរួច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
អន្តរាគមន៍ជាមួយនឹងកំហឹងរបស់មេដឹកនាំចលនាហេស្បូឡាលីបង់លោកហាសាន ណា្រសាឡាបានធ្វើឡើង ប៉ុន្មានម៉ោងក្រោយពីដ្រូនអ៊ីស្រាអែលមួយគ្រឿងបានផ្ទុះឆេះ និងមួយគ្រឿងទៀតបានធ្លាក់លើខេត្តប៉ែកខាងត្បូងទីក្រុងបេរូត ប្រទេសលីបង់នាព្រលឹមស្រាងៗថ្ងៃអាទិត្យ ទី២៥ សីហា។ ប្រមុខចលនាហេស្បូឡាលីបង់បានចាត់ទុកការវាយប្រហាររបៀបនេះពីអ៊ីស្រាអែលជាការវាយប្រហារអត្តឃាតដោយប្រើដ្រូន។ បន្ទាប់មក លោកហាសាន ណាស្រាឡាបានប្រកាសនៅចំពោះមុខហ្វូងសកម្មជនរបស់លោកជាចំហ និងសាធារណៈថា ចលនាហេស្បូឡានឹងធ្វើការបាញ់ទម្លាក់គ្រប់ដ្រូនប្រភេទនេះដែលរំលោភចូលដែនអាកាសរបស់ប្រទេសលីបង់។
ប្រមុខចលនាហេស្បូឡាលីបង់រូបនេះដដែលបានយល់ឃើញថា អ្វីដែលអ៊ីស្រាអែលបានធ្វើនេះជារំលោភបំពាន និងជាការព្យាយាមកែប្រែលើកិច្ចព្រមព្រៀងដែលអ៊ីស្រាអែល និងចលនាហេស្បូឡាបានឯកភាពគ្នាក្នុងឆ្នាំ ២០០៦។ គួររម្លឹកថា បន្ទាប់ពីមានសង្រ្គាមតទល់គ្នារវាងអ៊ីស្រាអែល និងហេស្បូឡាដែលបណ្តាលឲ្យស្លាប់ ១ ២០០នាក់នៅខាងលីបង់ និង ១៦០នាក់នៅខាងអ៊ីស្រាអែលមក ភាគីទាំងពីរបានព្រមព្រៀងក្នុងឆ្នាំ ២០០៦ ដោយអ៊ីស្រាអែលសន្យាមិនបើកការវាយប្រហារផ្លូវអាកាសលើទឹកដីលីបង់ ហើយហេស្បូឡាសន្យាមិនវាយប្រហារលើអ៊ីស្រាអែលពីទឹកដីលីបង់។ គេមិនដឹងថា តើសង្រ្គាមរវាងអ៊ីស្រាអែល និងចលនាហេស្បូឡាលីបង់អាចនឹងផ្ទុះជាថ្មីឬអត់ទេ។
អ្វីដែលគេដឹង មេចលនាហេស្បូឡាលោកណាស្រាឡាហាក់បានដំឡើងសំឡេងដោយគំរាមត្រង់ៗឲ្យកងទ័ពអ៊ីស្រាអែលនៅព្រំដែនជាមួយលីបង់ត្រៀមខ្លួនចាប់ពីពេលនេះទៅ។ បន្ទាប់មក លោកណាស្រាឡាក៏បានបញ្ជូនសារបែកឌឺដងទៅកាន់ពលរដ្ឋអ៊ីស្រាអែលនៅប៉ែកខាងជើងដោយផ្តល់ជាយោបល់ថា កុំឲ្យពួកគេមានអារម្មណ៍ស្ថិតក្នុងសុវត្ថិភាព និងសន្តិសុខដូចមុនទៀតឡើយ។ ទន្ទឹមនឹងសងសឹកលើការវាយប្រហារក្នុងទឹកដីលីបង់ មេចលនាហេស្បូឡាក៏មិនភ្លេចគំរាមសងសឹកនឹងអ៊ីស្រាអែលដែលបានវាយប្រហារនៅប៉ែកខាងត្បូងទីក្រុងដាម៉ាស់ ប្រទេសស៊ីរីក្នុងយប់ថ្ងៃសៅរ៍ឆ្លងចូលថ្ងៃអាទិត្យ ទី២៥ សីហាដែលបណ្តាលឲ្យស្លាប់យុទ្ធជនហេស្បូឡាចំនួន ២នាក់។
យ៉ាងណាក៏ដោយ អ៊ីស្រាអែលមិនទាន់បានបញ្ជាក់លើការវាយប្រហារដោយប្រើដ្រូននៅខេត្តប៉ែកខាងត្បូងទីក្រុងបេរូត ប្រទេសលីបង់នាព្រលឹមស្រាងៗថ្ងៃអាទិត្យ ទី២៥ សីហាទេ។ តែបានបញ្ជាក់ថា ខ្លួនពិតជាបានប្រើដ្រូនវាយប្រហារលើប្រទេសស៊ីរីដើម្បីរារាំងការវាយប្រហារពីអ៊ីរ៉ង់ដោយប្រើដ្រូនលើទឹកដីអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ