អ្នកជំនាញថា អ៊ីរ៉ង់កំពុងបង្កើនគំនាបលើសហភាពអឺរ៉ុប និងសហរដ្ឋអាមេរិកនៅមុនមហាសន្និបាតអង្គការសហប្រជាជាតិ
អ៊ីរ៉ង់ត្រៀមខ្លួននឹងឈប់គោរពតាមកិច្ចសន្យាមួយចំនួនទៀតដែលមានចែងនៅក្នុងកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥។ កិច្ចសន្យាទាំងអស់នោះមានអ្វីខ្លះនឹងត្រូវអ៊ីរ៉ង់ប្រាប់លំអិតនៅថ្ងៃសៅរ៍ ទី៧ កញ្ញា នេះជាការប្រកាសរបស់អ្នកនាំពាក្យអង្គការថាមពលបរមាណូអ៊ីរ៉ង់នាថ្ងៃព្រហស្បតិ៍ ទី៥ កញ្ញា។ ការប្រកាសរបស់អ្នកនាំពាក្យអង្គការថាមពលបរមាណូអ៊ីរ៉ង់ដូចនេះបានធ្វើឡើងតាមបញ្ជារបស់ប្រធានាធិបតីអ៊ីរ៉ង់លោករ៉ូហានីកាលពីថ្ងៃពុធ ទី៤ កញ្ញា។ កន្លងមក អ៊ីរ៉ង់បានឈប់គោរពកិច្ចសន្យាមួយចំនួនដូចយ៉ាងបង្កើនបរិមាណស្តុកសារធាតុអ៊ុយរ៉ាញ៉ូមលើសកម្រិត និងបង្កើនសកម្មភាពចម្រើនធាតុអ៊ុយរ៉ាញ៉ូមលើសពីអត្រា ៣,៦៧% ដែលកំណត់ក្នុងកិច្ចព្រមព្រៀងឆ្នាំ ២០១៥។ ទង្វើរបស់អ៊ីរ៉ង់បានធ្វើឡើង បន្ទាប់ពីសហរដ្ឋអាមេរិកបានដកខ្លួនចេញពីកិច្ចព្រមព្រៀងកាលពីឆ្នាំ ២០១៨ ព្រមទាំងដាក់ទណ្ឌកម្មសេដ្ឋកិច្ចលើអ៊ីរ៉ង់។ បន្ទាប់មក អ៊ីរ៉ង់ខឹងសម្បារនឹងប្រទេសហត្ថលេខីផ្សេងទៀត ពិសេសអឺរ៉ុបដែលមិនបានជួយគិតគូរអ៊ីរ៉ង់នៅចំពោះមុខទង្វើរបស់អាមេរិកាំង។ តើកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ កំពុងឈានទៅរកសេចក្តីស្លាប់ឬ?។ សម្រាប់អ្នកជំនាញ លោកវាំងសង់ អេ្វវ្លីង កិច្ចព្រមព្រៀងមួយនេះកំពុងស្ថិតក្នុងរណ្តៅ តែនៅមិនទាន់បានលុបដីកប់ទាំងស្រុងទេ។ តាមលោកវាំងសង់ អ៊ីរ៉ង់កំពុងបង្កើនគំនាបដាក់គ្រប់គ្នា ទាំងលើអឺរ៉ុប និងសហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
« ខ្ញុំចង់និយាយថា យើងហាក់កំពុងតែស្ថិតនៅក្នុងស្ថានភាពមួយដែលអ៊ីរ៉ង់កំពុងបង្កើនការវាយប្រហារកាន់តែខ្លាំងប្រឈមនឹងភាពស្ពឹកស្រពន់ និងសកម្មភាពមិនបានផលរបស់សហភាពអឺរ៉ុប។ ដូចគ្រប់គ្នាបានដឹងហើយថា តាំងពីលោកដូណាល់ ត្រាំបានដកសហរដ្ឋអាមេរិកចេញពីកិច្ចព្រមព្រៀងឆ្នាំ ២០១៥ និងដាក់ទណ្ឌកម្មសេដ្ឋកិច្ចជាថ្មីលើរបបអ៊ីរ៉ង់មក ប្រទេសហត្ថលេខីផ្សេង ពិសេសក្រុមប្រទេសអឺរ៉ុបបានព្យាយាមគ្រប់រូបភាពដើម្បីស្រោចស្រង់កិច្ចព្រមព្រៀង។
តែអ៊ីរ៉ង់បានមើលឃើញថាមកទល់ពេលនេះ ក្រុមប្រទេសអឺរ៉ុបទាំងនោះហាក់មិនបានធ្វើអ្វីធំដុំដើម្បីជួយអ៊ីរ៉ង់ ពិសេសផ្នែកសេដ្ឋកិច្ចទប់នឹងទង្វើរបស់អាមេរិកាំងទេ។ អ៊ីចឹងហើយបានជាពេលនេះ អ៊ីរ៉ង់បានបង្កើនគំនាបដាក់អឺរ៉ុបផង និងសហរដ្ឋអាមេរិកផង។ ចំណែកជម្រើសបង្កើនគំនាបពេលនេះក៏មិនមែនជារឿងចៃដន្យដែរ។ មិនចៃដន្យព្រោះអង្គការសហប្រជាជាតិនឹងរៀបចំមហាសន្និបាតប្រចាំឆ្នាំនៅប៉ុន្មានសប្តាហ៍ខាងមុខ។
មហាសន្និបាតអង្គការសហប្រជាជាតិគឺជាព្រឹត្តិការណ៍ការទូតសកលយ៉ាងសំខាន់ និងដែលអ្វីៗអាចមានការផ្លាស់ប្តូរនៅក្នុងសំណុំរឿងអ៊ីរ៉ង់។ អ៊ីចឹងហើយបានជាពេលនេះ អ៊ីរ៉ង់ព្យាយាមដាក់គំនាបអតិបរមាលើគ្រប់គ្នាទាំងអស់ មុននឹងមហាសន្និបាតអង្គការសហប្រជាជាតិចាប់ផ្តើម។ ខ្ញុំយល់ថា កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ កំពុងស្ថិតក្នុងរណ្តៅ តែនៅមិនទាន់បានលុបដីកប់ទាំងស្រុងទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ