នាយករដ្ឋមន្ត្រីអ៊ីស្រាអែលសន្យាកាត់យកដីប៉ាឡេស្ទីនមួយភាគ បើលោកជាប់ឆ្នោតជាថ្មី
មួយសប្តាហ៍មុនសម័យបោះឆ្នោតសភា នាយករដ្ឋមន្ត្រីផុតអាណត្តិ លោក នេតាន់យ៉ាហ៊ូ បានប្រកាសសន្យានៅថ្ងៃអង្គារម្សិលមិញថា នឹងកាត់យកដីប៉ាឡេស្ទីន នៅតំបន់ស៊ីហ្សកដានី ក្រោមអាណានិគមអ៊ីស្រាអែល មួយភាគ មកដាក់ជាទឹកដីអ៊ីស្រាអែល។ ជាពាក្យសន្យាដែលធ្វើឡើងដើម្បីទាក់ទាញសំឡេងឆ្នោត ប៉ុន្តែវាអាចនឹងធ្វើឱ្យដំណើរស្វែងរកសន្តិភាពអ៊ីស្រាអែលប៉ាឡេស្ទីនរលត់រលាយ។
ចុះផ្សាយនៅថ្ងៃ៖ កែប្រែថ្ងៃទី៖
សម័យបោះឆ្នោតកាន់តែខិតមកដល់ លោកនេតាន់យ៉ាហ៊ូ កាន់តែចង់ទាក់ទាញមតិសាធារណៈខ្លាំងឡើងៗ។ បន្ទាប់ពីបានបង្ហើបព័ត៌មានស្តីពីវត្តមាននៃមជ្ឈមណ្ឌលនុយក្លេអ៊ែរថ្មីនៅអ៊ីរ៉ង់ ម្សិលមិញលោកបានប្រកាសថា បើសិនជាលោកជាប់ឆ្នោតជាថ្មី លោកនឹងកាត់យកដីប៉ាឡេស្ទីនមួយភាគមកធ្វើរបស់អ៊ីស្រាអែល។
“ថ្ងៃនេះ ខ្ញុំសូមប្រកាសថា នៅពេលរដ្ឋាភិបាលថ្មីកើតជារូបរាងភ្លាម អ៊ីស្រាអែលនឹងកាត់យកតំបន់ជ្រលងភ្នំJoudain និងមួយភាគនៃតំបន់ភាគខាងជើងសមុទ្ទមរណៈ (Mer morte) ឱ្យស្ថិតនៅក្រោមអធិបតេយ្យអ៊ីស្រាអែលភ្លាម”។
ជ្រលងភ្នំ Jourdain និងសមុទ្ទមរណៈ ស្ថិតនៅក្នុងតំបន់ស៊ីហ្សកដានី ជាយុទ្ធសាស្ត្រ ដែលអ្នកនយោបាយអ៊ីស្រាអែលជាទូទៅ ក៏យល់ថាទោះបីមានកិច្ចព្រមព្រៀងសន្តិភាពជាមួយប៉ាឡេស្ទីនយ៉ាងណាក៏ដោយ ក៏តំបន់នេះត្រូវតែស្ថិតក្រោមការគ្រប់គ្រងរបស់អ៊ីស្រាអែលជានិច្ច។ តំបន់នេះត្រូវបានអ៊ីស្រាអែលបានចូលធ្វើអាណានិគមតាំងពីឆ្នាំ១៩៦៧មក និងគ្មានភូមិឬពលរដ្ឋអារ៉ាបរស់នៅទេ។ ហេតុដូច្នេះហើយបានជាលោកនាយករដ្ឋមន្ត្រីចង់កាត់យកតំបន់អាណានិគមកិច្ចតែម្តង ព្រោះការកាត់ដីមួយដុំនេះ មិនរំខានដល់ជនជាតិប៉ាឡេស្ទីនណាម្នាក់ឡើយ។ នេះជាការបញ្ជាក់បន្ថែមរបស់លោកនេតាន់យ៉ាហ៊ូ ដោយសន្យាថា ការកាត់យកដីតំបន់ស៊ីហ្សកដានីនេះ នឹងក្លាយជាអាទិភាពទីមួយរបស់រដ្ឋាភិបាលអ៊ីស្រាអែលថ្មីតែម្តង។
លោកនាយករដ្ឋមន្ត្រីផុតអាណត្តិ ធ្វើសេចក្តីប្រកាសបែបទាក់ទាញខ្លាំង បានទទូចអំពាវនាវ ឱ្យអ៊ីស្រាអែលផ្តល់ទំនុកចិត្តលើលោក៥ឆ្នាំទៀត នៅក្នុងការបោះឆ្នោតសប្តាហ៍ក្រោយដែលគូប្រជែងកំពុងឡើងសំឡេងដេញយ៉ាងប្រកៀកប្រកិត។
បីម៉ោងក្រោយសេចក្តីប្រកាស ប៉ាឡេស្ទីនបានបាញ់រ៉ុកកែតចេញពីតំបន់ហ្កាហ្សាសំដៅទឹកដីអ៊ីស្រាអែល តែសំណាងល្អត្រូវយោធាអ៊ីស្រាអែលប្រើខែលមីស៊ីលកំចាត់បាន។ ប្រតិកម្មបរិហារក៏បានធ្លាក់មកជាបន្តបន្ទាប់។ អង្គការរំដោះប៉ាឡេស្ទីន បានចាត់ទុកនយោបាយរបស់លោកនេតាន់យ៉ាហ៊ូ ថាជាការរំលោភច្បាប់អន្តរជាតិ លេបទឹកដី និងបោសសម្អាតជាតិពន្ធុ។ តួកគីថាជាអ៊ីស្រាអែលប្រើពាក្យសន្យាបែបប្រកាន់ពូជសាសន៍។ ហ្សកដានី ព្រមានថាសេចក្តីសម្រេចនេះ អាចនឹងបង្កឱ្យមានអំពើហិង្សាទូទាំងតំបន់។ យល់ថាជាពាក្យសន្យាដ៏គ្រោះថ្នាក់ អារ៉ាប៊ីសាអូឌីត បានស្នើឱ្យមានជំនួបប្រជុំបន្ទាន់ ថ្នាក់រដ្ឋមន្ត្រីការបរទេសទាំង៥៧នៃក្រុមអង្គការកិច្ចសហប្រតិបត្តិការអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ