អ៊ីស្រាអែល ៖ លោកនេតាន់យ៉ាហ៊ូស្នើបង្កើតរដ្ឋាភិបាលជាមួយគូប្រជែង
ពីរថ្ងៃក្រោយការបោះឆ្នោតសភា ដែលបើតាមលទ្ធផលបណ្តោះ គ្មានគណបក្សណាឈ្នះដាច់ នាយករដ្ឋមន្ត្រីផុតអាណត្តិអ៊ីស្រាអែល លោក បេនយ៉ាមែន នេតាន់យ៉ាហ៊ូ Benjamin Netanyahuបានធ្វើសំណើដ៏ភ្ញាក់ផ្អើលមួយនៅថ្ងៃព្រហស្បតិ៍ទី ១៩ កញ្ញា ២០១៩នេះ ហៅ លោក បេនី ហ្កាង្ស Benny Gantz ជាគូប្រជែង ឱ្យមកបង្កើតរដ្ឋាភិបាលបង្រួបបង្រួមជាតិ ជាមួយគ្នា។ ដោយគ្មានបង្អង់ លោក ហ្កាង្ស បានច្រានចោលសំណើរបស់លោកនេតាន់យ៉ាហ៊ូភ្លាម។
ចុះផ្សាយនៅថ្ងៃ៖
ស្តាប់ - ០២:៣១
កាលពីថ្ងៃពុធ លោកនេតាន់យ៉ាហ៊ូ បានអះអាងថាអ៊ីស្រាអែល មានត្រូវជ្រើសរើសរវាង រដ្ឋាភិបាលស្តាំនិយមដឹកនាំដោយរូបលោក ឬរដ្ឋាភិបាលដ៏គ្រោះថ្នាក់ដែលរំពឹងលើគណបក្សអារ៉ាប់តូចៗ ដឹកនាំដោយហ្កាង្ស។
ប៉ុន្តែនៅព្រឹកថ្ងៃព្រហស្បតិ៍ លោកនេតាន់យ៉ាហ៊ូ ដែលកាន់អំណាចតាំងពីមួយទសវត្សរ៍មកហើយ បានក្រលាស់សំដី ងាកមកហៅគូប្រជែង និងស្នើបើកកិច្ចពិភាក្សាផ្ទាល់ ដើម្បីបង្កើតរដ្ឋាភិបាលបង្រួបបង្រួមជាតិ។ នៅក្នុងសារវីដេអូ លោកនាយករដ្ឋមន្ត្រីបានប្រកាសចង់បង្កើតរដ្ឋាភិបាលចម្រុះដែលមានបក្សច្រើនបំផុតចូលរួម។
បើតាមលទ្ធផលបណ្តោះអាសន្ន គណបក្ស លីគូដ របស់លោកនេតាន់យ៉ាហ៊ូ ទទួលបាន៣១អាសនៈ គណបក្សរបស់លោកហ្កាង្ស បាន៣៣អាសនៈ នៅក្នុងសភាអ៊ីស្រាអែល ដែលមានសរុប១២០អាសនៈ។ ទោះបីជាគណបក្សនាំមុខគេទាំងពីរ សហការជាមួយគណបក្សតូចៗសម្ព័ន្ធមិត្ត ក៏មិនអាចមានសំលេងភាគច្រើនដាច់ខាតសម្រាប់បង្កើតរដ្ឋាភិបាលចម្រុះបានដែរ។
ប៉ុន្តែបើគូប្រជែងទាំងពីរព្រមចាប់ដៃគ្នាបង្កើតរដ្ឋាភិបាល តើនរណានឹងត្រូវកាន់តំណែងជានាយករដ្ឋមន្ត្រី ?! សម្រាប់លោក ហ្កាង្ស ដែលក៏បានប្រកាសជំហរចង់បង្កើតរដ្ឋាភិបាលបង្រួបបង្រួមជាតិដែរ លោកបានអះអាងថា លោកនឹងដឹកនាំរដ្ឋាភិបាលដែលទទួលស្តាប់គ្រប់គ្នា តែមិនព្រមឱ្យនរណាមកបញ្ជាឡើយ ! គណបក្សរបស់លោកឈ្នះនាំមុខលំដាប់ទីមួយ ឯគណបក្សលោកនេតាន់យ៉ាហ៊ូនៅលំដាប់ទីពីរសោះ ! នេះជាចម្លើយបដិសេធ ដែលបានធ្វើឱ្យលោកនេតាន់យ៉ាហ៊ូ ខកចិត្តយ៉ាងខ្លាំង។
មុននឹងលើកសំណើហៅគូប្រជែង លោកនេតាន់យ៉ាហ៊ូ បានជួបប្រជុំជាមួយគ្រប់មេដឹកនាំបក្សស្តាំនិយមអ៊ីស្រាអែល ដោយបានចុះកិច្ចសន្យាបង្កើតរដ្ឋាភិបាលរួមគ្នា និងមានរូបលោកជាបេក្ខជននាយករដ្ឋមន្ត្រី។ លោកបានទទួលការគាំទ្រទាំងស្រុងពីក្រុមអ្នកស្តាំនិយម ដែលនេះអាចចាត់ទុកជាចំណុចខ្លាំង ប៉ុន្តែលោកនាយករដ្ឋមន្ត្រីផុតអាណត្តិក៏មានចំណុចខ្សោយដែរ ៖ លោកជាប់ពាក់ព័ន្ធនឹងតុលាការពីបទពុករលួយ រំលោភទំនុកចិត្ត និងកេងបន្លំថវិកា។ លោកកំពុងស្វែងរកអភ័យឯកសិទ្ធិសភា។ ប្រសិនបើតុលាការធ្វើការចោទប្រកាន់ តាមច្បាប់អ៊ីស្រាអែល លោកអាចធ្វើជានាយករដ្ឋមន្ត្រី តែមិនអាចមានឈ្មោះជារដ្ឋមន្ត្រីបានទេ។ ឯលោកហ្កាង្ស ធ្លាប់បានប្រកាសជាញយដងមិនព្រមបំរើរដ្ឋាភិបាលដែលមាននាយករដ្ឋមន្ត្រីជាប់ចោទឬជាប់ទោសឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ