ឆ្មាំបដិវត្តអ៊ីរ៉ង់ព្រមានថា ប្រទេសណាវាយប្រហារអ៊ីរ៉ង់ ប្រទេសនោះនឹងក្លាយជាសមរភូមិប្រយុទ្ធ
នៅថ្ងៃសៅរ៍ ទី២១ កញ្ញា ប្រមុខឆ្មាំបដិវត្តអ៊ីរ៉ង់ឧត្តមសេនីយហូសេន សាឡាមីបានព្រមានថា ប្រទេសណាដែលហ៊ានវាយប្រហារលើអ៊ីរ៉ង់ ប្រទេសនោះនឹងក្លាយជាសមរភូមិប្រយុទ្ធ។ តាមលោកសាឡាមី អ៊ីរ៉ង់នឹងមិនអនុញ្ញាតឲ្យមានសង្រ្គាមមួយកើតនៅលើទឹកដីអ៊ីរ៉ង់ឡើយ។ ការប្រកាសព្រមានរបស់ឧត្តមសេនីយសាឡាមីពេលនេះបានធ្វើឡើង មួយថ្ងៃក្រោយពីប្រធានាធិបតីអាមេរិកលោកត្រាំបានប្រកាសបញ្ជូនកម្លាំងទ័ពបន្ថែមទៅកាន់តំបន់ឈូងសមុទ្រពែក្ស។ ការប្រកាសបញ្ជូនទ័ពអាមេរិកបន្ថែមនេះត្រូវបានប្រមុខការពារជាតិអាមេរិកលោក Mark Esper បញ្ជាក់ថា ដើម្បីតបតាមការស្នើសុំរបស់ប្រទេសអារ៉ាប៊ីសាអូឌីត និងអេមីរ៉ាតអារ៉ាប់រួម។
ចុះផ្សាយនៅថ្ងៃ៖
ស្តាប់ - ០២:២៧
« នរណាក៏ដោយដែលចង់ឃើញទឹកដីរបស់ខ្លួនក្លាយជាសមរភូមិប្រយុទ្ធ ចូរវាយប្រហារអ៊ីរ៉ង់មក » នេះជាការព្រមានរបស់ប្រមុខឆ្មាំបដិវត្តអ៊ីរ៉ង់ឧត្តមសេនីយហូសេន សាឡាមីនៅក្នុងសន្និសីទកាសែតមួយក្នុងទីក្រុងតេហេរ៉ង់។ ដោយមិននិយាយចំឈ្មោះប្រទេសណាមួយ ឧត្តមសេនីយហូសេន សាឡាមីបានបញ្ជាក់ថា អ៊ីរ៉ង់នឹងធ្វើការបាញ់ទម្លាក់ដ្រូនទាំងអស់ដែលហោះចូលក្នុងដែនអាកាសអ៊ីរ៉ង់។ បន្ទាប់មក ប្រមុខឆ្មាំបដិវត្តអ៊ីរ៉ង់រូបនេះដដែលបាននិយាយចំឈ្មោះអាមេរិកដោយសង្ឃឹមថា រដ្ឋបាលទីក្រុងវ៉ាស៊ីនតោននឹងមិនប្រព្រឹត្តកំហុសយុទ្ធសាស្រ្តដូចក្នុងអតីតកាលម្តងទៀត រួចព្រមានត្រង់ថា អ៊ីរ៉ង់បានត្រៀមខ្លួនទប់ទល់នឹងគ្រប់សេណារីយ៉ូទាំងអស់។
សម្តីព្រមានខ្លាំងៗរបស់ប្រមុខឆ្មាំបដិវត្តអ៊ីរ៉ង់ពេលនេះជាចម្លើយតបនឹងប្រធានាធិបតីអាមេរិកលោកត្រាំដែលបានប្រកាសក្នុងថ្ងៃសុក្រ ទី២០ កញ្ញាពីការបញ្ជូនកម្លាំងទ័ព និងគ្រឿងសព្វាវុធបន្ថែមទៅកាន់តំបន់ឈូងសមុទ្រពែក្ស។ ប្រមុខការពារជាតិអាមេរិកលោក Mark Esper បានប្រាប់ឲ្យដឹងថា លោកត្រាំបានសម្រេចដូចនេះដើម្បីឆ្លើយតបនឹងសំណើរបស់ប្រទេសអារ៉ាប៊ីសាអូឌីត និងអេមីរ៉ាតអារ៉ាប់រួម។ ចំណែកចំនួនទ័ព និងប្រភេទអាវុធដែលត្រូវបញ្ជូនបន្ថែមត្រូវបានមេបញ្ជាការទ័ពអាមេរិកឧត្តមសេនីយ Joe Dunford បញ្ជាក់ថា មិនទាន់បានសម្រេចនៅឡើយទេ។
ក្រៅពីប្រកាសបញ្ជូនទ័ព និងគ្រឿងសព្វាវុធបន្ថែមទៅកាន់តំបន់ឈូងសមុទ្រពែក្ស លោកត្រាំក៏បានប្រកាសដាក់ទណ្ឌកម្មថ្មីលើអ៊ីរ៉ង់ ពិសេសប្រឆាំងនឹងធនាគារកណ្តាលអ៊ីរ៉ង់។ ទណ្ឌកម្មប្រឆាំងធនាគារកណ្តាលនេះត្រូវបានគេមើលឃើញថា ជាវិធានការធ្ងន់ធ្ងរខ្លាំងដែលមិនធ្លាប់ដាក់លើប្រទេសណាមួយទេ។ តាមរដ្ឋមន្រ្តីក្រសួងសេដ្ឋកិច្ចអាមេរិកលោក Steven Mnuchin ទណ្ឌកម្មប្រឆាំងធនាគារកណ្តាលអ៊ីរ៉ង់នឹងធ្វើឲ្យកងឆ្មាំបដិវត្តអ៊ីរ៉ង់លែងទទួលលុយដើម្បីផ្តល់ឲ្យក្រុមភេរវជនទៀតឡើយ។ តែប្រមុខការទូតអ៊ីរ៉ង់លោកហ្សារីស្វបានចាត់ទុកទណ្ឌកម្មរបៀបនេះថាជាការរារាំងមិនពលរដ្ឋអ៊ីរ៉ង់ទទួលស្បៀងអាហារ និងថ្នាំសង្កូវ។
គួររម្លឹកថា ការកំញើញដាក់គ្នារវាងអាមេរិក និងអ៊ីរ៉ង់បានកើតមានឡើង ក្រោយពីពួកឧទ្ទាមហ៊ូទីនៅយេម៉ែនបានប្រើដ្រូនវាយប្រហារលើស្ថានីយចម្រាញ់ប្រេងអារ៉ាប៊ីសាអូឌីទចំនួនពីរកាលពីថ្ងៃសៅរ៍ ទី១៤ កញ្ញា។ ការវាយប្រហារនោះត្រូវបានអាមេរិក និងអារ៉ាប៊ីសាអូឌីតទម្លាក់កំហុសដាក់អ៊ីរ៉ង់ តែអ៊ីរ៉ង់បន្តបដិសេធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ