អ៊ីរ៉ាក់ រដ្ឋធានីក្លាយជាសមរភូមិប្រយុទ្ធ ក្រោយមានកិច្ចព្រមព្រៀងសម្ងាត់ជាមួយអ៊ីរ៉ង់
ជាងមួយខែក្រោយបាតុកម្មប្រឆាំងនឹងរដ្ឋាភិបាល ដែលត្រូវបង្ក្រាបដោយហិង្សា ហូរឈាម ស្ថានភាពកាន់តែធ្លាក់ដុនដាបមួយកំរិតបន្ថែមទៀតនៅថ្ងៃនេះ។ ក្រោយពីកិច្ចព្រមព្រៀង នយោបាយជាន់ខ្ពស់ ចលនាប្រឆាំងបានប្រើគ្រប់មធ្យោបាយតវ៉ា។ រដ្ឋធានីបាកដាក បានក្លាយជាសមរភូមិប្រយុទ្ធគ្នារវាង ក្រុមបាតុករនិងកម្លាំងរក្សាសន្តិសុខ ដោយមានការផ្ទុះអាវុធផង។ មានស្លាប់យ៉ាងហោចណាស់៧នាក់នៅល្ងាចមិញ។ ហេតុអ្វីបានជាមានកិច្ចព្រមព្រៀងហើយ អំពើហិង្សាផ្ទុះកាន់តែខ្លាំងទៅវិញដូច្នេះ ?!
ចុះផ្សាយនៅថ្ងៃ៖
ស្នូរបាញ់កាំភ្លើងស្វ័យប្រវត្តិបានលាន់រន្ទឺឡើងកណ្តាលរដ្ឋធានី មិនដឹងថាជាបាញ់បង្ហើលឬ បាញ់លើហ្វូងបាតុករទេ ... គឺមានតែភាពច្របូលច្របល់។ ការប៉ះទង្គិចគ្នា បានផ្ទុះឡើង នៅក្បែរទីលាន Tahrir ដែលបាតុករបាននាំគ្នាមកតាំងទី។ ដើម្បីគាស់រំលើង កងកម្លាំងនរគបាលដោយប្រើគ្រប់បែកផ្សែង ឯបាតុករក្រាញ និងបានដុតភ្នក់ភ្លើងកង់ឡាន បង្ហុយផ្សែងឱ្យកាន់តែខ្មៅខ្មួលខ្មាញ់ រកមើលអ្វីមិនយល់ និងត្រៀមលក្ខណៈវាយបកទៅលើប៉ូលិសវិញ។
អាជ្ញាធរសម្រេចចេញធ្វើអន្តរាគមន៍បំបែកហ្វូងបាតុករនេះ ក្រោយពីមេដឹកនាំនយោបាយធំៗ និងសាសនា បានរកឃើញកិច្ចព្រមព្រៀង បិទបញ្ចប់ចលនាប្រឆាំង ដោយគ្រប់មធ្យោបាយ រាប់ទាំងការប្រើកម្លាំងផង ដើម្បីរក្សារដ្ឋាភិបាលឱ្យនៅ កាន់អំណាចជាប់។ ជំនួបប្រជុំបានប្រព្រឹត្តទៅដោយសម្ងាត់ និងក្រោមវត្តមានបុរសខ្លាំងបីរូប ៖ មេដឹកនាំនយោបាយ Moqtada Sadr កូនប្រុសរបស់ ayatollah Ali al-Sisitani ជាមគ្គុទេសក៏សាសនានីកាយឈីអ៊ីតដ៏មានឥទ្ធិពលបំផុតរបស់ប្រទេស និង ឧត្តមសេនីយ៍ Qassem Souleimani ដែលជាមេបញ្ជាការប្រតិបត្តិការទ័ពអ៊ីរ៉ង់នៅបរទេស។ មេដឹកនាំកំពូលទាំងបីបានសម្រេចបិទបញ្ចប់ចលនាប្រឆាំងប្រជាជនដោយប្រើកម្លាំង និងចាប់ធ្វើកំណែទម្រង់ប្រទេស ប៉ុន្តែនាយករដ្ឋមន្ត្រី ដែលបាតុករទាមទារឱ្យចុះចេញពីតំណែងនៅកាន់អំណាចដដែល។
កិច្ចការអ៊ីរ៉ាក់ ហេតុអ្វីមានអ៊ីរ៉ង់ចូលជួយសម្រេច ?! ហេតុដូច្នេះហើយបានជាបាតុករកាន់ព្រួយបារម្ភ និងបរិហារអ៊ីរ៉ង់ថាចង់ក្រសោបអ៊ីរ៉ាក់ ព្រោះប្រទេសនេះមិនបោះបង់គំនិតចង់ទាញប្រយោជន៍នយោបាយនិងសេដ្ឋកិច្ចពីអ៊ីរ៉ាក់ឡើយ។
ចលនាប្រឆាំងអ៊ីរ៉ាក់ បានផ្ទុះឡើងតាំងពីថ្ងៃទី ១តុលាមក ដោយទាមទារឱ្យថ្នាក់ដឹកនាំប្រទេសទាំងមូល ដែលគ្មានការប្តូរផ្លាស់សោះតាំងពីជាច្រើនឆ្នាំមក ដែលសុទ្ធតែពុករលួយនិងអសមត្ថភាព ចាកចេញពីតំណែង។ ជាច្រើនថ្ងៃមកនេះ ចលនាប៉ះបោរស៊ីវិល បានបិទខ្ទប់សាលារៀន ស្ថាប័នរដ្ឋបាល និងរចនាសម្ព័ន្ធផ្សេងទៀតជាច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ