អ៊ីរ៉ង់រកឃើញជង្រុកប្រេងថ្មីដែលស្តុកប្រេងជាង ២២ពាន់លានបារីល
អ៊ីរ៉ង់ទើបរកឃើញជង្រុកប្រេងក្រោមដីថ្មីមួយទៀត នៅភាគនិរតីប្រទេស ក្បែរព្រំដែនជាមួយប្រទេសអ៊ីរ៉ាក់។ នៅថ្ងៃចន្ទ រដ្ឋមន្រ្តី ក្រសួងប្រេងអ៊ីរ៉ង់បានអះអាងថា អណ្តូងប្រេង ដែលគេទើបតែរកឃើញថ្មី នឹងផ្តល់ប្រេង ជាង ២២ពាន់លានបារីល ប៉ុន្តែ មិនមែន ៥៣ពាន់លានបារីល ដូចការលើកឡើងរបស់ប្រធានាធិបតីអ៊ីរ៉ង់នោះទេ។ នៅក្នុងសុន្ទរកថា ទៅកាន់ប្រជាជនអ៊ីរ៉ង់ កាលពីថ្ងៃអាទិត្យ ប្រធានាធិបតីអ៊ីរ៉ង់ លោកហាសាន់ រូហានី បានចាត់ទុកការរកឃើញអណ្តូងប្រេង ថ្មី ថា ជាអំណោយរបស់រដ្ឋាភិបាល សម្រាប់ប្រជាជនអ៊ីរ៉ង់។
ចុះផ្សាយនៅថ្ងៃ៖
រដ្ឋមន្រ្តីក្រសួងប្រេងអ៊ីរ៉ង់ នៅថ្ងៃចន្ទម្សិលមិញបានបញ្ជាក់ថា ទៅតាមសមត្ថភាព បច្ចេកទេស មានកំណត់ គេអាចបូមយកប្រេងតែជាង ២២ពាន់លានបារីលប៉ុណ្ណោះ ពីជង្រុកប្រេងដែលអ៊ីរ៉ង់ទើបរកឃើញថ្មី នៅភាគនិរតីប្រទេស។ ២២ពាន់លានបារីល គឺជាចំនួន តិចជាងពាក់កណ្តាល នៃចំនួនប្រេង ដែលលោកប្រធានាធិបតី ហាសាន់ រូហានីបានប្រកាសឲ្យដឹង កាលពីថ្ងៃអាទិត្យ ពីការរកឃើញជង្រុកប្រេងថ្មី ដែលអាចស្តុកប្រេង ដល់ទៅ៥៣ពាន់លានបារីល។
សម្រាប់ រដ្ឋមន្រ្តីអ៊ីរ៉ង់ ប្រធានាធិបតីអ៊ីរ៉ង់ចង់សំដៅដល់បរិមាណប្រេងសរុប នៅក្នុងតំបន់ភាគនិរតី ជាប់ព្រំដែនប្រទេសអ៊ីរ៉ាក់ ដែលគេទើបរកឃើញជង្រុកប្រេងថ្មី ព្រោះថា ២២ពាន់លានបារីលនឹងបន្ថែមពីលើបរិមាណប្រេងជាង ៣១ពាន់លានបារីល ដែលអ៊ីរ៉ង់មានរួចហើយ នៅក្នុងតំបន់នោះ។ តាមរដ្ឋមន្រ្តីប្រេងអ៊ីរ៉ង់ ជង្រុកប្រេងថ្មី មានកម្រាស ៨០ម៉ែត្រ និងស្ថិតក្រោមដី ក្នុងជម្រៅ ជាង ៣គីឡូម៉ែត្រ។
អ៊ីរ៉ង់ ទើបរកឃើញជង្រុកប្រេងថ្មី ដែលមានស្តុកប្រេង២២ពាន់លានបារីល។ ការណ៍នេះនឹងបង្កើនបរិមាណស្តុកប្រេងរបស់អ៊ីរ៉ង់ ដែលមានប្រមាណ ១៥៥ពាន់លានបារីល គិតត្រឹមឆ្នាំ ២០១៨ ទៅតាមការវាយតម្លៃរបស់ក្រុមហ៊ុនប្រេង អង់គ្លេស BP។
ក្នុងនាមជាសមាជិក និងស្ថាបនិក អង្គការនាំចេញប្រេង OPEC អ៊ីរ៉ង់ស្ថិតក្នុងចំណាត់ថ្នាក់ ទី ៤ បន្ទាប់ពីវ៉េណេស៊ុយអេឡា អារ៉ាប៊ី សាអូឌីត និងកាណាដា ដែលមានជង្រុកស្តុកប្រេងច្រើនជាងគេក្នុងពិភពលោក។ អ៊ីរ៉ង់ក៏ជាប្រទេសធំទី២ផងដែរ បន្ទាប់ពីកាតា ខាងមានអណ្តូងស្តុកឧស្ម័នធំជាងគេ ក្នុងលោក។
ជាមួយនឹងការរកឃើញជង្រុកប្រេងថ្មី អ៊ីរ៉ង់បានបង្ហាញបរិមាណស្តុកប្រេងដ៏សម្បើមរបស់ខ្លួន។ ប៉ុន្តែ ចំណោទនៅត្រង់ថា តើអ៊ីរ៉ង់នឹងអាចកេងចំណេញ យកប្រយោជន៍ពីប្រេងរបស់ខ្លួនបានយ៉ាងម៉េច?
ជាប្រទេសសេដ្ឋីប្រេង ប៉ុន្តែ សេដ្ឋកិច្ចរបស់អ៊ីរ៉ង់ កំពុងត្រដាបត្រដួស ដោយសារទណ្ឌកម្មសេដ្ឋកិច្ចរបស់អាមេរិក ដែល កាលពីខែឧសភាកន្លងទៅ បានប្រកាសលុបចោលទៅវិញ ករណីលើកលែង ចំនួនប្រទេសដែលជាអតិថិជនទិញប្រេងអ៊ីរ៉ង់។ អាមេរិក បានដាក់សម្ពាធ ទៅលើប្រទេសចិន ឥណ្ឌា និងតួកគី ជាដើម ឲ្យឈប់ទិញប្រេងអ៊ីរ៉ង់ បើសិនមិនចង់ រងទណ្ឌកម្ម ការដាក់ពិន័យពីអាមេរិក។ សងសឹក និងវាយបកទៅអាមេរិក និងប្រទេសអឺរ៉ុបដែលជាហត្ថលេខីនៃកិច្ចព្រមព្រៀង នុយក្លេអ៊ែរ ឆ្នាំ ២០១៥ អ៊ីរ៉ង់បានកាត់បន្ថយការសន្យារបស់ខ្លួន ដោយបានប្រកាសចម្រើនសារធាតុអ៊ុយរ៉ាញ៉ូម ឬបើកដាក់ឲ្យដំណើរការរោងចក្រនុយក្លេអ៊ែរដែលត្រូវគេហាមប្រាម នៅកិច្ចព្រមព្រៀង ឆ្នាំ ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ