តើរដ្ឋាភិបាលអ៊ីរ៉ង់កំពុងទទួលរងថ្មបាក់ពីនយោបាយដំឡើងថ្លៃតម្លៃប្រេងឬ?
ចុះផ្សាយនៅថ្ងៃ៖
ស្តាប់ - ០៤:៥៩
នៅក្នុងប្រទេសអ៊ីរ៉ង់ ក្បួនបាតុកម្មប្រឆាំងនឹងការដំឡើងថ្លៃតម្លៃប្រេងបាន និងកំពុងបន្តកើតមានយ៉ាងខ្លាំងក្លានៅតាមបណ្តាទីក្រុងសំខាន់ជាច្រើននៅទូទាំងប្រទេស។ គិតត្រឹមថ្ងៃទី១៨ វិច្ឆិកា បាតុកម្មដែលបានចាប់ផ្តើមតាំងពីថ្ងៃទី១៦ វិច្ឆិកាបានបណ្តាលឲ្យមានមនុស្សស្លាប់ចំនួន ២នាក់។ តែអ្វីជាការកត់សម្គាល់ បាតុកម្មដែលផ្តោតសំខាន់លើការទាមទារផ្នែកសេដ្ឋកិច្ចហាក់កំពុងប្រែរូបភាពទៅជាបាតុកម្មនយោបាយដោយក្រុមបាតុករបានទាមទារឲ្យមានការផ្លាស់ប្តូរប្រព័ន្ធដឹកនាំសព្វថ្ងៃ។ តើរដ្ឋាភិបាលអ៊ីរ៉ង់មិនមែនកំពុងទទួលរងថ្មបាក់ពីនយោបាយដំឡើងថ្លៃតម្លៃប្រេងទេ ឬយ៉ាងណា?
ប្រភពដើមនៃបាតុកម្មនៅអ៊ីរ៉ង់ពេលនេះ គឺការសម្រេចចិត្តរបស់រដ្ឋាភិបាលក្នុងការដំឡើងថ្លៃតម្លៃប្រេង។ នេះពិតជារឿងចំឡែក និងគួរឲ្យឆ្ងល់ខ្លាំងណាស់សម្រាប់ប្រទេសជង្រុកប្រេងឆៅមួយក្នុងលោក។ តាំងពីថ្ងៃទី១៦ វិច្ឆិកាមក មានពលរដ្ឋអ៊ីរ៉ង់នៅក្នុងខេត្ត ក្រុងប្រមាណជា ១០០កន្លែងនៅទូទាំងប្រទេសបាននាំគ្នាចុះផ្លូវប្រឆាំងនឹងនយោបាយដំឡើងតម្លៃប្រេងរបស់រដ្ឋាភិបាល។ គិតត្រឹមថ្ងៃទី១៨ វិច្ឆិកា មានមនុស្សស្លាប់ចំនួន ២នាក់ ក្នុងនោះម្នាក់ជាបាតុករ និងម្នាក់ទៀតជាប៉ូលិស។ តែតុល្យការអាចនឹងមានច្រើនជាងនេះ ព្រោះរូបភាពវីដេអូដែលគេពិបាកផ្ទៀងផ្ទាត់បានបង្ហាញបាតុករជាច្រើននាក់ត្រូវគ្រាប់កាំភ្លើងដេកដួលលើដី។ ទន្ទឹមគ្នានេះ មានការដុតបំផ្លាញទីតាំងសំខាន់ៗជាច្រើនកន្លែង ដូចជាធនាគារ អាគាររដ្ឋាភិបាល ស្ថានីយ៍លក់ប្រេង ប៉ុស្តិ៍ប៉ូលិស រថយន្ត និងរថយន្តក្រុង។
បើគេជឿលើរបាយការណ៍របស់ទីភ្នាក់ងារ Fars ដែលស្និទ្ធនឹងឆ្មាំបដិវត្តអ៊ីរ៉ង់ មានមនុស្សចំនួន ៨៧ ០០០នាក់បានចូលរួមនៅក្នុងក្បួនបាតុកម្ម និងមានមនុស្សប្រមាណ ១ ០០០នាក់ត្រូវបានចាប់ខ្លួន។ ទន្ទឹមនឹងវិធានការបង្រ្កាបចាស់ដៃ រដ្ឋអំណាចក៏បានកាត់ផ្តាច់ប្រព័ន្ធអ៊ីនធ័រនែត និងប្រព័ន្ធទូរស័ព្ទដៃនៅក្នុងតំបន់យុទ្ធសាស្រ្តមួយចំនួន។ គួររម្លឹកថា ក្រុមប្រឹក្សាមួយដែលដឹកនាំដោយប្រមុខនៃអំណាចទាំង ៣ គឺអំណាចនីតិបញ្ញតិ អំណាចនីតិប្រតិបត្តិ និងអំណាចតុលាការបានសម្រេចដំឡើងថ្លៃតម្លៃប្រេងនាយប់ជ្រៅក្នុងថ្ងៃទី១៤ វិច្ឆិកា។ ចំណែកប្រមុខសាសនាអ៊ីស្លាមអ៊ីរ៉ង់លោកអាលី ខាមេណីក៏បានគាំទ្រលើវិធានការមួយនេះ និងបញ្ជាក់ថា ការសម្រេចនេះបានធ្វើឡើងដោយប្រមុខនៃអំណាចទាំង ៣ ដែលលោកគ្មានសិទ្ធិអំណាចអ្វីនឹងដកចេញវិញទេ។
ទន្ទឹមគ្នានេះ ប្រមុខសាសនាអ៊ីស្លាមអ៊ីរ៉ង់ដ៏មានឥទ្ធិពលរូបនេះដដែលថែមទាំងបានចាត់ទុកក្រុមវាយបំផ្លាញទ្រព្យសម្បត្តិសាធារណៈជាក្រុមមនុស្សពាលដែលទទួលបានការលើកទឹកចិត្តពីក្រុមសត្រូវរបស់អ៊ីរ៉ង់។ ក្នុងថ្ងៃចន្ទ ទី១៨ វិច្ឆិកា ទីក្រុងតេហេរ៉ង់បានចង្អុលចំមុខទីក្រុងវ៉ាស៊ីនតោនពីបទបានលូកដៃកកូរកកាយកិច្ចការផ្ទៃក្នុងរបស់អ៊ីរ៉ង់។ នេះជាចម្លើយដែលអ៊ីរ៉ង់តបនឹងសាររបស់ប្រមុខការទូតអាមេរិកលោកម៉ែ ប៉ុមប៉េអូកាលពីថ្ងៃសៅរ៍ ទី១៦ វិច្ឆិកាដែលថា អាមេរិកស្ថិតជាមួយពលរដ្ឋអ៊ីរ៉ង់។ បន្ទាប់មកក្នុងថ្ងៃអាទិត្យ ទី១៧ វិច្ឆិកា សេតវិមានបានចាក់សាំងបន្ថែមដោយបញ្ជាក់ពីការគាំទ្រចំពោះបុព្វហេតុរបស់បាតុករអ៊ីរ៉ង់ និងបានថ្កោលទោសលើចំណាត់ការចាស់ដៃរបស់កម្លាំងប៉ូលិសលើហ្វូងបាតុករ។
មែនទែនទៅ និងនៅក្នុងបរិបទនៃភាពតានតឹងរវាងអាមេរិក និងអ៊ីរ៉ង់សព្វថ្ងៃ ប្រតិកម្មម៉ាំងទៅ ម៉ាំងមករវាងទីក្រុងតេហេរ៉ង់ និងទីក្រុងវ៉ាស៊ីនតោនរបៀបនេះមិនមានអ្វីគួរឲ្យភ្ញាក់ផ្អើលឡើយ ហើយអ្នកដែលកំពុងឆ្លៀតកេងចំណេញពីភាពក្តៅក្រហាយរបស់ពលរដ្ឋអ៊ីរ៉ង់ពេលនេះ គឺគ្មាននរណាក្រៅពីអាមេរិកដែលចង់ឃើញការដួលរលំរបបអ៊ីរ៉ង់សព្វថ្ងៃនេះទេ។ ចូរកុំភ្លេចថា បើគេពិនិត្យមើលឲ្យបានស៊ីជម្រៅបន្តិចទៅ ការងើបបះបោររបស់ពលរដ្ឋអ៊ីរ៉ង់ក្រោមហេតុផលតម្លៃប្រេងថ្លៃគ្រាន់ជារឿងមួយតូចតាចប៉ុណ្ណោះ។ តាមពិតទៅនោះ ពលរដ្ឋអ៊ីរ៉ង់ទូទៅហាក់អស់សង្ឃឹម និងគ្មានជំនឿទុកចិត្តលើការដឹកនាំរបស់រដ្ឋាភិបាលបច្ចុប្បន្នទាំងនៅក្នុងវិស័យនយោបាយ និងសេដ្ឋកិច្ច។ សេដ្ឋកិច្ចដែលត្រូវបានញាំញីដោយទណ្ឌកម្មអាមេរិកាំង និងដោយការគ្រប់គ្រងមិនបានល្អ។
អសមត្ថភាពក្នុងការធ្វើកំណែទម្រង់ប្រទេសរបស់ប្រធានាធិបតីលោកហាសាន រ៉ូហានីបានប្រសូត្រចេញនូវបរិយាកាសនៃក្តីអស់សង្ឃឹមរបស់ពលរដ្ឋអ៊ីរ៉ង់។ អ៊ីចឹងហើយបានជាគេសង្កេតឃើញថា ក្បួនបាតុកម្មក្រោមហេតុផលតម្លៃប្រេងថ្លៃហាក់បានប្រែរូបភាពយ៉ាងឆាប់រហ័សទៅជាក្បួនបាតុកម្មនយោបាយដោយបានទាមទារឲ្យមានការផ្លាស់ប្តូរប្រព័ន្ធដឹកនាំសព្វថ្ងៃ។ សម្លេងប្រឆាំងនឹងលោករ៉ូហានីមានកាន់តែច្រើនឡើងៗរាប់ទាំងក្រុមដែលធ្លាប់គាំទ្រ និងបោះឆ្នោតឲ្យលោកទៀតផង។ គួររម្លឹកថានៅដំណាច់ឆ្នាំ ២០១៧ ពលរដ្ឋអ៊ីរ៉ង់ក៏ធ្លាប់បានចុះផ្លូវទាមទារឲ្យរដ្ឋាភិបាលគិតគូរពីជីវភាពរស់នៅប្រចាំថ្ងៃរបស់ខ្លួនដែរ។ តែអ្វីដែលខុសគ្នានៅលើកនេះ បាតុកម្មមហាជនហាក់មានទ្រង់ទ្រាយធំ និងមានការចូលរួមពីពលរដ្ឋសឹងពីគ្រប់មជ្ឈដ្ឋានទាំងអស់នៅតាមខេត្ត ក្រុងតូច ធំនៅទូទាំងប្រទេស។ កំណត់សម្គាល់មួយទៀត បាតុកម្មលើកនេះបានកើតមានឡើងនៅ ៣ខែមុនអ៊ីរ៉ង់រៀបចំបោះឆ្នោតសភាដែលគ្រោងរៀបចំនៅក្នុងខែកុម្ភៈ ឆ្នាំ ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ