ទីភ្នាក់ងារថាមពលបរិមាណូអន្តរជាតិមាននាយកថ្មី តែសំណុំរឿងនុយក្លេអ៊ែរអ៊ីរ៉ង់បន្តជាអាទិភាពចម្បង
ចុះផ្សាយនៅថ្ងៃ៖
ស្តាប់ - ០៥:២១
ចាប់ពីថ្ងៃចន្ទ ទី២ ធ្នូ ទីភ្នាក់ងារថាមពលបរិមាណូអន្តរជាតិហៅកាត់ជាភាសាបារាំង AIEA មាននាយកថ្មីជាបុរសជនជាតិអាហ្សង់ទីនមានឈ្មោះ រ៉ាហ្វាអែល ក្រូស៊ី (Rafael Grossi)។ ការចូលកាន់តំណែងជាប្រធានថ្មី AIEA របស់លោករ៉ាហ្វាអែល ក្រូស៊ីពេលនេះបានធ្វើឡើង ក្នុងពេលដែលភាពតានតឹងជុំវិញសំណុំរឿងនុយក្លេអ៊ែរអ៊ីរ៉ង់កំពុងបន្តមានយ៉ាងផុសផុល។ ដូច្នេះការងារអាទិភាពនៅចំពោះមុខរបស់លោកក្រូស៊ី គឺការបន្តជជែកជាមួយភាគីអ៊ីរ៉ង់នៅជុំវិញកិច្ចព្រមព្រៀងនុយក្លេអ៊ែរដែលអ៊ីរ៉ង់បានចុះចុះហត្ថលេខាជាមួយសហគមន៍អន្តរជាតិក្នុងឆ្នាំ ២០១៥។ តាមរយៈកិច្ចព្រមព្រៀងមួយនេះ លោកក្រូស៊ីមានសិទ្ធិចូលទៅពិនិត្យផ្ទាល់លើទីតាំងមជ្ឈមណ្ឌលនុយក្លេអ៊ែររបស់អ៊ីរ៉ង់។ តើនាយកថ្មី AIEA ជានរណា និងថា តើអ្វីទៅជាការងាររបស់ AIEA នៅអ៊ីរ៉ង់?
មានអាយុ ៥៨ឆ្នាំ និងជាជនជាតិអាហ្សង់ទីន លោករ៉ាហ្វាអែល ក្រូស៊ីជានាយកទីភ្នាក់ងារថាមពលបរមាណូអន្តរជាតិទី៦ គិតតាំងពីទីភ្នាក់ងារមួយនេះបានប្រសូត្រឡើងក្នុងឆ្នាំ ១៩៥៧ និងដែលនាយកទី១ មានប្រភពពីប្រទេសមួយនៅអាមេរិកខាងត្បូង។ ម្យ៉ាងទៀត ការបោះឆ្នោតជ្រើសរើសនាយកថ្មី AIEA បានធ្វើឡើង បន្ទាប់ពីមរណៈភាពក្នុងខែកក្កដារបស់ជនជាតិជប៉ុនលោកយូគីយ៉ា អាម៉ាណូដែលបានកាន់តំណែងនាយក AIEA រយៈពេល ១០ឆ្នាំ។ តាមពិតទៅ លោករ៉ាហ្វាអែល ក្រូស៊ីដែលជាមន្រ្តីការទូតម្នាក់បានស្គាល់ AIEA ច្បាស់ណាស់ ព្រោះលោកធ្លាប់បានទទួលតួនាទីជាអ្នកចរចាផ្ទាល់ជាមួយអ្នកទទួលខុសត្រូវអ៊ីរ៉ង់ពីឆ្នាំ ២០១០ ដល់ឆ្នាំ ២០១៣។
ជាមន្រ្តីការទូត ព្រោះលោករ៉ាហ្វាអែល ក្រូស៊ីជាឯកអគ្គរដ្ឋទូតអាហ្សង់ទីនប្រចាំប្រទេសអូទ្រីសតាំងពីឆ្នាំ ២០១៣ ហើយក្នុងតំណែងមួយនេះ លោករ៉ាហ្វាអែល ក្រូស៊ីក៏ជាអ្នកតំណាងឲ្យប្រតេសអាហ្សង់ទីននៅក្នុង AIEA ដែរ។ ទាក់ទងនឹងសំណុំរឿងមិនសាយភាយនុយក្លេអ៊ែរត្រូវបានអតីតឯកអគ្គរដ្ឋទូតបារាំងប្រចាំអ៊ីរ៉ង់វាយតម្លៃលើលោករ៉ាហ្វាអែល ក្រូស៊ីថា ជាមន្រ្តីការទូតគួរឲ្យស្ញប់ស្ញែង និងមានចរិតថ្លៃថ្នូរណាស់។ ចំណែកមន្រ្តីការទូតផ្សេងទៀតដែលបានស្គាល់ និងធ្លាប់បានសន្ទនាជាមួយលោករ៉ាហ្វាអែល ក្រូស៊ីបានសរសើរពីក្រមសីលធម៌វិជ្ជាជីវៈ និងថាមពលរបស់គាត់។ មន្រ្តីការទូតម្នាក់ជឿជាក់ថា លោករ៉ាហ្វាអែល ក្រូស៊ីនឹងប្រើនុយក្លេអ៊ែរនៅក្នុងយុទ្ធនាការប្រឆាំងនឹងបម្រែបម្រួលអាកាសធាតុជាប្រធានបទសំខាន់មួយ។
អ្វីជាការកត់សម្គាល់ ការចូលកាន់តំណែងជាប្រធានថ្មី AIEA របស់លោករ៉ាហ្វាអែល ក្រូស៊ីពេលនេះបានធ្វើឡើង ក្នុងពេលដែលភាពតានតឹងជុំវិញបញ្ហានុយក្លេអ៊ែរអ៊ីរ៉ង់កំពុងបន្តមានយ៉ាងក្តៅគគុក។ ទីភ្នាក់ងារអន្តរជាតិមួយនេះមានតួនាទីជាអ្នកផ្ទៀងផ្ទាត់ ពិនិត្យមើលលើការអនុវត្តន៍កិច្ចព្រមព្រៀងនុយក្លេអ៊ែរអ៊ីរ៉ង់ដែលអ៊ីរ៉ង់បានចុះហត្ថលេខាជាមួយសហគមន៍អន្តរជាតិកាលពីឆ្នាំ ២០១៥។ តែគេមិនត្រូវភ្លេចនិយាយថា កិច្ចព្រមព្រៀងជាប្រវត្តិសាស្រ្តមួយនេះកំពុងស្ថិតលើផ្លូវដ៏ផុយស្រួយមួយ តាំងពីអាមេរិករបស់លោកដូណាល់ ត្រាំបានដកខ្លួនក្នុងឆ្នាំ ២០១៨ និងថែមទាំងបានដាក់ទណ្ឌកម្មសេដ្ឋកិច្ចជាថ្មីលើអ៊ីរ៉ង់។ ជាការឆ្លើយបកវិញ អ៊ីរ៉ង់ក៏បានប្រកាសឈប់អនុវត្តតាមកិច្ចសន្យាមួយចំនួនដែលមានចែងនៅក្នុងកិច្ចព្រមព្រៀងនោះ។
មានដូចជា ដំឡើងបរិមាណស្តុកសារធាតុអ៊ុយរ៉ាញ៉ូមចម្រើនរួច ដំឡើងអត្រាចម្រើនធាតុអ៊ុយរ៉ាញ៉ូម និងបរិមាណទឹកធ្ងន់ រួមទាំងធ្វើទំនើបកម្មលើឧបករណ៍សម្រាប់ចម្រើនធាតុអ៊ុយរ៉ាញ៉ូម។ ដូច្នេះតួនាទីអាទិភាពនៅចំពោះមុខរបស់លោករ៉ាហ្វាអែល ក្រូស៊ី គឺព្យាយាមទប់កុំឲ្យកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ រលាយទៅវិញ ព្រោះទំរាំសម្រេចបាន ភាគីនីមួយៗបានចំណាយពេលចរចា និងធ្វើសម្បទានឲ្យគ្នាទៅវិញ ទៅមកច្រើនណាស់។ គួរបញ្ជាក់ថារហូតមកដល់ពេលនេះ ដំណើរទៅកាន់ទីតាំងមជ្ឈមណ្ឌលនុយក្លេអ៊ែរអ៊ីរ៉ង់របស់ក្រុមអធិការ AIEA មិនត្រូវបានរារាំងដោយភាគីអ៊ីរ៉ង់ទេ។ តែទោះជាយ៉ាងនេះក្តី ចំណុចខ្វែងគំនិតគ្នាស្តីពីកិច្ចសហប្រតិបត្តិការរវាង AIEA និងអ៊ីរ៉ង់កំពុងបន្តមាន។
AIEA បានទាមទារឲ្យអ៊ីរ៉ង់បំភ្លឺជុំវិញសកម្មភាពនៅក្នុងអតីតកាលលើមជ្ឈមណ្ឌលនុយក្លេអ៊ែរមួយដែលមិនបានរាយការណ៍ និងដែលក្រុមអធិការ AIEA បានរកឃើញដានសារធាតុអ៊ុយរ៉ាញ៉ូម។ អ៊ីរ៉ង់បានផ្តល់ចម្លើយ តែចម្លើយចុងក្រោយត្រូវបាន AIEA ចាត់ទុកជាចម្លើយមិនពេញចិត្តទេ។ សូមរម្លឹកថា ក្រៅពីភាគីអាមេរិក ភាគីហត្ថលេខីផ្សេងទៀត មានប្រទេសបារាំង អង់គ្លេស ចិន រុស្ស៊ី និងអាល្លឺម៉ង់មិនបានដកខ្លួន និងប្តេជ្ញារក្សាទុកកិច្ចព្រមព្រៀង។ តែបញ្ហានៅត្រង់ថា ក្រុមប្រទេសហត្ថលេខីនៅសេសសល់ទាំងអស់នេះនៅមិនទាន់អាចនិយាយជំនះអ៊ីរ៉ង់ឲ្យត្រឡប់ទៅគោរពត្រឹមត្រូវលើកិច្ចព្រមព្រៀងនោះនៅឡើយទេ។ អ៊ីចឹងហើយបានជាថ្មីៗនេះ ប្រទេសអឺរ៉ុបមិនញញើតដំឡើងសម្លេងខ្លាំងៗដាក់អ៊ីរ៉ង់ដោយគំរាមបញ្ឆេះយន្តការណ៍មួយដែលអាចឈានទៅដាក់ឡើងវិញនូវទណ្ឌកម្មរបស់អង្គការសហប្រជាជាតិប្រឆាំងអ៊ីរ៉ង់។ ប្រសិនបើឈានដល់ដំណាក់កាលនេះមែន វាជាសក្ខីកម្មមួយដែលបញ្ជាក់ពីការស្លាប់កិច្ចព្រមព្រៀងឆ្នាំ ២០១៥ ជាស្ថាពរ។
តែពេលនេះ យន្តការណ៍នៃការចរចាកំពុងត្រូវបានភាគីពាក់ព័ន្ធបន្តយកទៅប្រើ ព្រោះនៅថ្ងៃសុក្រ ទី៦ ធ្នូ មានកិច្ចប្រជុំថ្មីរវាងអ្នកតំណាងប្រទេសហត្ថលេខីនៅសេសសល់ និងអ៊ីរ៉ង់នៅក្នុងទីក្រុងវីយែន ប្រទេសអូទ្រីស។ តើជាមួយនឹងនាយកថ្មីនៃទីភ្នាក់ងារថាមពលបរមាណូអន្តរជាតិលោករ៉ាហ្វាអែល ក្រូស៊ី សំណុំរឿងនុយក្លេអ៊ែរអ៊ីរ៉ង់នឹងធូរស្រាលជាងមុនដែរ ឬទេ?។ វាដូចជារហ័សពេកដែលគេហ៊ានទាញសេចក្តីសន្និដ្ឋានយ៉ាងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ