រដ្ឋអំណាចប៉ាឡេស្ទីនប្រកាសផ្តាច់ទំនាក់ទំនងសន្តិសុខជាមួយអ៊ីស្រាអែល
អង្គការដើម្បីរំដោះប៉ាឡេស្ទីន ឬរដ្ឋអំណាចប៉ាឡេស្ទីនបានសម្រេច កាលពីល្ងាចថ្ងៃព្រហស្បតិ៍ ទី ៥មីនា ឈប់សហការផ្នែកសន្តិសុខជាមួយអ៊ីស្រាអែល។ ការសម្រេចរបស់អាជ្ញាធរប៉ាឡេស្ទីន ធ្វើឡើង ដើម្បីឆ្លើយតបទៅនឹងអ៊ីស្រាអែលដែលបានផ្អាក តាំងពីខែមករា មិនបញ្ជូនលុយពន្ធ ប្រមាណ កន្លះពាន់លានដុល្លារ ដែលអ៊ីស្រាអែលត្រូវប្រមូលជំនួសឲ្យរដ្ឋអំណាចប៉ាឡេស្ទីន។
ចុះផ្សាយនៅថ្ងៃ៖
ស្តាប់ - ០២:១៦
នៅក្រោយកិច្ចប្រជុំពីរថ្ងៃ នៅទីក្រុងរ៉ាម៉ាឡា អង្គការដើម្បីរំដោះប៉ាឡេស្ទីន (OLP) ដែលគេស្គាល់ជាទូទៅថា ជារដ្ឋអំណាចប៉ាឡេស្ទីន បានសម្រេច ឈប់សហការផ្នែកសន្តិសុខជាមួយអ៊ីស្រាអែល។ នៅក្នុងការអនុវត្តន៍ជាក់ស្តែង ការសម្រេចនេះមានន័យថា អាជ្ញាធរប៉ាឡេស្ទីននឹងឈប់ចែករំលែកជាមួយអ៊ីស្រាអែល នូព័ត៌មានសម្ងាត់ តទៅទៀត ដូចជាព័ត៌មានទាក់ទងនឹងសកម្មភាពរបស់ក្រុមហាម៉ាសជាដើម។
ប៉ាឡេស្ទីនផ្តាច់ទំនាក់ទំនងសន្តិសុខជាមួយអ៊ីស្រាអែល នឹងអាចផ្តល់អាក្រក់ដល់អ៊ីស្រាអែល ព្រោះថា គ្មានព័ត៌មានសម្ងាត់ ផ្តល់ដោយអាជ្ញាធរប៉ាឡេស្ទីន អ៊ីស្រាអែលពិបាកនឹងយកការណ៍សម្ងាត់ ដើម្បីបំផ្លាញជាមុន ផែនការធ្វើភេរវកម្មប្រឆាំងនឹងអ៊ីស្រាអែល។ ក្នុងន័យម្យ៉ាងទៀត ប៉ាឡេស្ទីននឹងអាចដកកម្លាំងរក្សាសន្តិសុខរបស់ខ្លួន ចេញពីតំបន់ស៊ីហ្សកដានី ដោយទុកឲ្យទាហានអ៊ីស្រាអែលជាអ្នកចូលទៅធានាសន្តិសុខជំនួសវិញ។
ទៅតាមកិច្ចព្រមព្រៀងទីក្រុងអូស្លូ ឆ្នាំ ១៩៩៣ អ៊ីស្រាអែលធ្វើការជាមួយអាជ្ញាធរប៉ាឡេស្ទីន ដែលមានទីតាំងនៅទីក្រុងរ៉ាម៉ាឡា ទាំងក្នុងផ្នែកសន្តិសុខ និងការចរចាដើម្បីស្វែងរកសន្តិភាព រវាងប្រជាជាតិទាំងពីរ។ អ៊ីស្រាអែលបដិសេធ មិនធ្វើការចរចាជាមួយ ក្រុមហាម៉ាស ប៉ាឡេស្ទីន នៅតំបន់ហ្កាហ្សា ដែលអ៊ីស្រាអែលចាត់ទុក ក្រុមភេរវនិយម គំរាមកំហែងសន្តិសុខអ៊ីស្រាអែល។
បើសិនប៉ាឡេស្ទីន ផ្តាច់ទំនាក់ទំនងសន្តិសុខ នោះគឺអ៊ីស្រាអែលដែលអាចនឹងទទួលខាតបង់ ហើយទំនាក់ទំនងរវាងភាគីចរចាសន្តិភាពទាំងពីរនឹងរឹតតែអាក្រក់ ធ្លាក់ចុះដុនដាបមួយកម្រិតទៀត។
ប៉ាឡេស្ទីនធ្លាប់បានគំរាមឈប់សហការសន្តិសុខជាមួយអ៊ីស្រាអែល ជាច្រើនលើក ប៉ុន្តែ មិនដែលបានធ្វើឲ្យជាក់ស្តែងម្តងណាទេ។ លើកនេះ ទោះជាអង្គការដើម្បីរំដោះប៉ាឡេស្ទីន បានសម្រេចយ៉ាងដូច្នេះក្តី ប៉ុន្តែ ការសម្រេចចិត្តនៅមិនទាន់ត្រូវគេអនុវត្តភ្លាមទេ ដោយត្រូវរង់ចាំការបោះឆ្នោតរបស់គណៈកម្មាធិការរបស់អង្គការនេះ នៅពេលខាងមុខទៀត។
តាមអ្នកសង្កេតការណ៍ ប៉ាឡេស្ទីនបានជ្រើសរើសយកបញ្ហាសន្តិសុខមកធ្វើជាអាវុធ សងសឹក នឹងអ៊ីស្រាអែល ដែលបានផ្អាក មិនបញ្ជូនលុយពន្ធជាង ៤០០លានអឺរ៉ូ ដែលអ៊ីស្រាអែល ត្រូវប្រមូលជំនួសឲ្យប៉ាឡេស្ទីន។ គ្មានប្រាក់ពន្ធដែលដើរតួសំខាន់សម្រាប់សេដ្ឋកិច្ច ប៉ាឡេស្ទីនកំពុងជួបការលំបាកក្នុងការបើកប្រាក់ខែឲ្យមន្រ្តីជិតពីរសែននាក់របស់ខ្លួន។
សូមបញ្ជាក់ថា អ៊ីស្រាអែលបានសម្រេចផ្អាក មិនបញ្ជូនលុយពន្ធ ទៅឲ្យប៉ាឡេស្ទីន តាំងពីខែមករា បន្ទាប់ពីប៉ាឡេស្ទីនបានដាក់ពាក្យសុំចូលជាសមាជិករបស់តុលាការព្រហ្មទណ្ឌអន្តរជាតិ។ គោលដៅរបស់ប៉ាឡេស្ទីនគឺដាក់ពាក្យបណ្តឹងសុំឲ្យ ស្ថាប័នអន្តរជាតិមួយនេះ ស៊ើបអង្កេតលើឧក្រិដ្ឋកម្មសង្រ្គាម ក្នុងទឹកដីប៉ាឡេស្ទីន ជាពិសេសក្នុងតំបន់ហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ