Amesty International៖ របបបាស្ឆា ព្យួរកមនុស្ស១៣០០០នាក់ ក្នុងគុកតែមួយ រវាងឆ្នាំ២០១១-២០១៥
អង្គការ Amnesty International ទើបបានចេញរបាយការណ៍មួយ ស្តីពីការសម្លាប់អ្នកទោសនយោបាយនៅស៊ីរី។ ក្នុងរវាងពីឆ្នាំ២០១១ ដល់២០១៥ របបផ្តាច់ការស៊ីរី ដឹកនាំដោយបាស្ឆា អាល់ អាសាដ បានសម្លាប់មនុស្សដោយព្យួរក ចំនួនប្រមាណជា១៣០០០ នៅក្នុងមន្ទីរឃុំឃាំងតែមួយប៉ុណ្ណោះ។ អង្គការអន្តរជាតិនេះ បានលើកឡើងពីចេតនាសម្លាប់រង្គាល ដោយឥតរើសមុខ ពីសំណាក់របបផ្តាច់ការស៊ីរី ដើម្បីបំបិទការតស៊ូមតិ និងចលនាប្រឆាំងរបស់ប្រជាជនស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
របាយការណ៍របស់ Amnesty International បានចាត់ទុករបបផ្តាច់ការរបស់បាស្ឆា អាល់ អាសាដ ថាបាននិងកំពុងតែធ្វើការសម្លាប់រង្គាល ទៅលើអ្នកទោសនយោបាយ ដែលនេះគឺជាឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ។ មន្ទីរឃុំឃាំង Saydnaya គឺ ជាគុកទាហាន គ្រប់គ្រងដោយរបបបាស្ឆា អាល់ អាសាដ ដែលស្ថិតនៅចំងាយ៣០គីឡូម៉ែត្រ ខាងជើងរដ្ឋធានីដាម៉ាស។ គឺមន្ទីរឃុំឃាំងនេះហើយ ដែលរបបផ្តាច់ការនេះ បានចាប់ប្រមូលយកអ្នកទោសមកដាក់ឃុំ ដែលភាគច្រើនគឺសុទ្ធជាប្រជាជន ដែលបានធ្វើការតស៊ូ ប្រឆាំងនឹងរដ្ឋាភិបាលស៊ីរី។
ក្នុងរវាងពីឆ្នាំ២០១១ ដល់២០១៥ មានអ្នកទោសយ៉ាងហោចណាស់ ១៣០០០នាក់ ដែលត្រូវបានគេសម្លាប់ចោល ដោយយកទៅព្យួរកនៅក្នុងមន្ទីរឃុំឃាំងមួយនេះ។ របាយការណ៍របស់ Amnesty Internationalគឺយោងទៅលើការផ្តល់ សក្ខីកម្ម ពីសំណាក់សាក្សី៨៤នាក់ ដែលក្នុងនោះមានដូចជាអតីតអ្នកយាមគុក អតីតអ្នកទោសដែលបានរួចខ្លួនមកវិញ និងចៅក្រមដែលធ្លាប់បានធ្វើការនៅទីនោះ។
យោងតាមសម្តីសាក្សី ក្នុងមួយសប្តាហ៍ យ៉ាងហោចណាស់មានមនុស្ស៥០នាក់ ដែលត្រូវបានគេយកចេញពីបន្ទប់ឃុំឃាំង ដើម្បីទៅកាត់ទោស។ អ្នកទោសត្រូវបានគេធ្វើទារុណកម្មយ៉ាងព្រៃផ្សៃ មុននឹងយកទៅព្យួរកសម្លាប់ ក្នុងវេលាយប់។ សកម្មភាពទាំងនេះ ត្រូវបានធ្វើឡើង ដោយលាក់កំបាំងបំផុត។ ចៅក្រមម្នាក់ ដែលបានឃើញហេតុការណ៍ផ្ទាល់ បានអះអាងថា ពួកទាហាន ទុកអ្នកទោសឲ្យព្យួរក រយៈពេលពី១០ ទៅ១៥នាទី ហើយក្នុងករណីអ្នកទោសដែលមានវ័យក្មេង ទំងន់មិនសូវធ្ងន់ គឺពួកទាហានបានទៅទាញជើងបន្ថែម ដើម្បីឲ្យឆាប់ស្លាប់។ អ្នកទោសទាំងអស់ត្រូវគេរុំភ្នែករហូត ចាប់តាំងពីពេលបញ្ជូនចេញពីបន្ទប់ឃុំឃាំង រហូតដល់ពេលគេយកខ្សែរមកថ្ពក់ក។
របាយការណ៍ ក៏បានរ៉ាយរ៉ាប់ផងដែរ អំពីទំរង់អមនុស្សធម៌ នៃការឃុំឃាំងអ្នកទោស។ ក្រៅពីការវាយដំ ធ្វើទារុណកម្មជាប្រចាំទៅលើអ្នកទោស ពួកទាហាន បានយកចំណីទៅបោះឲ្យអ្នកទោស ប្រៀបបានដូចសត្វធាតុ នៅលើដីដែលប្រលាក់ទៅដោយឈាម និងកាកសំណល់លាមក។ អតីតអ្នកយាមម្នាក់បានបញ្ជាក់ថា ជារៀងរាល់យប់ បើសិនជាគេយកត្រចៀកទៅផ្ទៀងស្តាប់ គេនឹងឮសំលេងថ្ងូរ ដកចង្កាមាន់របស់អ្នកទោស ដែលកំពុងតែត្រូវគេចងកសម្លាប់។
គួររំលឹកថា កន្លងមក អង្គការ Amnesty International ធ្លាប់បានសន្និដ្ឋានថាមានអ្នកទោសដែលត្រូវរបបស៊ីរីសម្លាប់ ទូទាំងប្រទេស ប្រមាណជា១៧៧០០នាក់។ យ៉ាងណាមិញ ចំនួនអ្នកស្លាប់១៣០០០នេះ គឺគ្រាន់តែនៅក្នុងគុកSaydnaya នេះមួយតែប៉ុណ្ណោះ។ ដូច្នេះ ជាមួយនឹងតួលេខចុងក្រោយនេះ គឺមានន័យថា ចំនួនអ្នកទោសដែលរបបផ្តាច់ការរបស់បាស្ឆា អាល់អាសាដ បានសម្លាប់ បានកើនឡើងកាន់តែខ្ពស់។ ពិភពលោក មិនអាចឱបដៃឈរមើលសកម្មភាពព្រៃផ្សៃរបស់រដ្ឋាភិបាលស៊ីរីនេះ តទៅទៀតបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ