អំពើភេរវកម្មមួយចំនួននៅអេហ្ស៊ីបក្នុងប៉ែកខាងជើងខេត្តស៊ីណៃបានសម្លាប់មនុស្សយ៉ាងតិច២៧នាក់
ក្រុមជីហាតអ៊ីស្លាមជ្រុលនិយមមួយដ៏សកម្មបំផុតនៅប្រទេសអេហ្ស៊ីប ទើបបានប្រកាសថាក្រុមខ្លួនជាអ្នកបង្កការវាយប្រហារបួនលើកកាលពីថ្ងៃព្រហស្បតិ៍ម្សិលមិញនៅខេត្តSinaï ប៉ែកខាងជើងនិងខេត្តSuez។ អំពើភេរវកម្មទាំងនេះ បានសម្លាប់មនុស្សយ៉ាងតិច២៧នាក់ដែលភាគច្រើនជាកងកម្លាំងសន្តិសុខអេហ្ស៊ីបនិងក៏បណ្តាលឲ្យមានអ្នករងរបួសយ៉ាងតិច៥៨នាក់ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ផ្ទាំងស៊ីបដ៏ចំបងមុនគេនៃការវាយប្រហាររបស់ក្រុមជីហាតអ៊ីស្លាមកាលពីម្សិលមិញ គឺអគារនានារបស់កងទ័ពអេហ្ស៊ីប ដែលស្ថិតនៅ Al-Arich ទីក្រុងដ៏ធំមួយនៅប៉ែកខាងជើងនៃខេត្ត Sinaï ។
ពួកជីហាតអ៊ីស្លាមអេហ្ស៊ីប បានប្រើអាវុធធុនធ្ងន់នៅក្នុងការវាយប្រហារម្សិលមិញដោយបានបាញ់រ៉ុកកែតជាច្រើនគ្រាប់ប្រឆាំងជាដំបូងទៅលើទីបញ្ជាការរបស់ប៉ូលីសនៅប៉ែកខាងជើងស៊ីណៃនិងមួលដ្ឋានយោធាមួយដែលស្ថិតនៅក្បែរគ្នា មុននឹងបំផ្ទុះរថយន្តបង្កប់គ្រាប់បែកមួយគ្រឿង។ ប៉ុន្មាននាទីក្រោយមកក្រុមអ៊ីស្លាមជីហាត បានបាញ់រ៉ុកកែតប្រឆាំងទៅលើនិវេសដ្ឋានដ៏ស្កឹមស្កៃមួយដែលជាទីស្នាក់អាស្រ័យនៅរបស់នាយទាហានអេហ្ស៊ីប។
ការវាយប្រហារមួយទៀត បានប្រព្រឹត្តទៅនៅត្រង់ចំណុចត្រួតពិនិត្យមួយរបស់កងទ័ពនៅតំបន់ Rafah,ជាប់ព្រំដែនជាមួយតំបន់ហ្កាហ្សានិងបានបណ្តាលឲ្យបាត់បង់ជីវិតយោធាម្នាក់។
នៅក្នុងសេចក្តីជូនដំណឹងមួយតាមបណ្តាញសង្គមTwitter ពួកភេរវជនអ៊ីស្លាម បានប្រកាសប្រាប់ថា “ពួកគេជាកងយុទ្ធជន Califat សាខាមួយនៃក្រុមរដ្ឋអ៊ីស្លាមជីហាតដែលដឹកនាំការវាយប្រហារគ្រប់ទីកន្លែងដែលជាទីតាំងប៉ូលិសនិងកងទ័ព។ ជាសរុបអំពើភេរវកម្មម្សិលមិញ បានសម្លាប់ជីវិតមនុស្សយ៉ាងតិច២៧នាក់ដែលភាគច្រើនជាកងយោធានិងក៏បណ្តាលឲ្យមានអ្នករងរបួសយ៉ាងតិច៥៨នាក់ដែរ ក្នុងនោះប្រជាជនស៊ីវិល៩នាក់។
ប្រធានាធិបតីអេហ្សីបលោក Abdel Fattah al-SiSSI ដែលកំពុងចូលរួមក្នុងជំនួបកំពូលសហភាពអាហ្វ្រិកនៅ Addis Abeba ប្រទេស Ethiopie បានសម្រេចចិត្តបង្ខើចដំណើរទស្សនកិច្ចរបស់លោកនិងវិលត្រឡប់ចូលមកកាន់ប្រទេសអេហ្ស៊ីបវិញនៅថ្ងៃសុក្រនេះ។
ពត៌មានចុងក្រោយបានឲ្យដឹងថា កូនក្មេងពីរនាក់ក្នុងនោះម្នាក់ជាទារកអាយុ៦ខែនិងម្នាក់ទៀតអាយុ៦ឆ្នាំបានស្លាប់ដោយត្រូវគ្រាប់កាំភ្លើងនិងគ្រាប់រុកកែតបន្ទាប់ពីមានការវាយប្រយុទ្ធគ្នាមួយរវាងកងទ័ពអេហ្ស៊ីបនិងក្រុមជីហាតនៅព្រឹកព្រលឹមថ្ងៃសុក្រនេះនៅតំបន់ស៊ីណៃដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ