នុយក្លេអ៊ែរអ៊ីរ៉ង់៖អាមេរិក និងសហភាពអឺរ៉ុបរៀបចំគម្រោងលើកទ័ណ្ឌកម្មសេដ្ឋកិច្ចចេញពីអ៊ីរ៉ង់
ចុះផ្សាយនៅថ្ងៃ៖
ស្តាប់ - ០៥:០៩
នៅថ្ងៃអាទិត្យ ទី១៩ តុលា សហរដ្ឋអាមេរិក និងសហភាពអឺរ៉ុបបានអនុម័តនូវវិធានការនីតិបញ្ញត្តិមួយដែលនឹងអនុញ្ញាតឲ្យមានការលើកទ័ណ្ឌកម្មសេដ្ឋកិច្ចចេញពីប្រទេសអ៊ីរ៉ង់។ ការស្នើឲ្យមានការលើកទ័ណ្ឌកម្មសេដ្ឋកិច្ចចេញពីអ៊ីរ៉ង់របស់អាមេរិក និងអឺរ៉ុបពេលនេះបានធ្វើឡើងដោយអនុឡោមតាមកិច្ចព្រមព្រៀងនុយក្លេអ៊ែរដែលបានចុះហត្ថលេខាកាលពីថ្ងៃទី១៤ កក្កដារវាងក្រុមប្រទេសមហាអំណាច និងប្រទេសអ៊ីរ៉ង់។ តែយ៉ាងណាក៏ដោយ ការផ្តើមលើកទ័ណ្ឌកម្មសេដ្ឋកិច្ចជាផ្លូវការចេញពីអ៊ីរ៉ង់របស់សហគមន៍អន្តរជាតិនឹងត្រូវធ្វើឡើងស្របពេលនឹងការអនុវត្តន៍ជាក់ស្តែងលើកិច្ចព្រមព្រៀងពីសំណាក់ប្រទេសអ៊ីរ៉ង់។ តើទីក្រុងតេហេរ៉ង់ពិតជាបានត្រៀមខ្លួនដើម្បីអនុវត្តន៍លើកិច្ចព្រមព្រៀងដែលខ្លួនបានចុះហត្ថលេខាហើយឬ?
សំណុំរឿងនុយក្លេអ៊ែរអ៊ីរ៉ង់បានឈានមកដល់ផ្លូវរបត់ថ្មីមួយទៀត ពោលជាជំហាននៃការផ្តើមអនុវត្តន៍ជាក់ស្តែងលើកិច្ចព្រមព្រៀងដែលសហគមន៍អន្តរជាតិ និងប្រទេសអ៊ីរ៉ង់បានចុះហត្ថលេខាកាលពីថ្ងៃទី១៤ កក្កដាកន្លងទៅក្នុងទីក្រុងវីយែន ប្រទេសអូទ្រីស។ នៅថ្ងៃអាទិត្យ ទី១៨ តុលា ឆ្នំា ២០១៥ គឺជាថ្ងៃនៃការបិទបញ្ចប់រយៈពេល ៣ខែក្រោយពីក្រុមប្រឹក្សាសន្តិសុខអង្គការសហប្រជាជាតិបានអនុម័តលើកិច្ចព្រមព្រៀងនោះកាលពីថ្ងៃទី២០ កក្កដា។ ដូច្នេះចាប់ពីពេលនេះតទៅ ភាគីពាក់ព័ន្ធនីមួយៗអាចផ្តើមអនុវត្តន៍លើកិច្ចព្រមព្រៀងដែលខ្លួនបានចុះហត្ថលេខា។ គឺនៅក្នុងន័យនេះហើយបានជានៅខាងភាគីសហគមន៍អន្តរជាតិ មានសហរដ្ឋអាមេរិក និងសហភាពអឺរ៉ុបបានអនុម័តនូវវិធានការនីតិបញ្ញត្តិមួយដើម្បីត្រៀមលើកចេញវិញនូវរាល់ទ័ណ្ឌកម្មសេដ្ឋកិច្ចទំាងអស់ពីប្រទេសអ៊ីរ៉ង់។
នៅថ្ងៃអាទិត្យ ទី១៨ តុលា លោកប្រធានាធិបតីអាមេរិកបារ៉ាក់ អូបាម៉ាផ្ទាល់ខ្លួនបានស្នើរដ្ឋបាលរបស់លោកឲ្យរៀបចំគម្រោងលើកទ័ណ្ឌកម្មសេដ្ឋកិច្ចអាមេរិកចេញពីអ៊ីរ៉ង់ ព្រមទំាងបានចាត់ទុកជំហានពេលនេះថា ជាជំហានមួយដ៏សំខាន់នៅក្នុងការអនុវត្តន៍លើកិច្ចព្រមព្រៀងនុយក្លេអ៊ែរអ៊ីរ៉ង់ជាប្រវត្តិសាស្រ្ត។ ក្នុងថ្ងៃអាទិត្យ ទី១៨ តុលាដដែល អ្នកនំាពាក្យការទូតរបស់សហភាពអឺរ៉ុបបានប្រកាសឲ្យដឹងពីការដែលសហភាពអឺរ៉ុបបានអនុម័តនូវវិធានការមួយឆ្ពោះទៅលើទ័ណ្ឌកម្មសេដ្ឋកិច្ច និងហិរញ្ញវត្ថុចេញពីប្រទេសអ៊ីរ៉ង់។
នៅខាងប្រទេសអ៊ីរ៉ង់ ក្រៅពីចាប់ផ្តើមអនុវត្តន៍លើកិច្ចព្រមព្រៀងនុយក្លេអ៊ែរដែលខ្លួនបានចុះហត្ថលេខាជាមួយសហគមន៍អន្តរជាតិកាលពីថ្ងៃទី១៤ កក្កដា រដ្ឋអំណាចទីក្រុងតេហេរ៉ង់ក៏បានប្រកាសឲ្យដឹងពីការផ្តើមអនុវត្តន៍ពិធីសារបន្ថែមស្តីពីសន្ធិសញ្ញាមិនសាយភាយនុយក្លេអ៊ែរ។ នៅក្នុងន័យនេះ អ៊ីរ៉ង់បានយល់ព្រមឲ្យមានការបញ្ជូនបន្ថែមនូវក្រុមអធិការរបស់ទីភ្នាក់ងារថាមពលបរមាណូអន្តរជាតិទៅកាន់ទឹកដីរបស់ខ្លួនដើម្បីត្រួតពិនិត្យលើមជ្ឈមណ្ឌលនុយក្លេអ៊ែរ ក៏ដូចជាត្រួតពិនិត្យមើលលើសកម្មភាពពិតនៃកម្មវិធីនុយក្លេអ៊ែររបស់អ៊ីរ៉ង់។ គឺផ្តើមចេញពីលទ្ធផលនៃបេសកម្មរបស់ទីភ្នាក់ងារថាមពលបរិមាណូអន្តរជាតិនោះឯងដែលសហគមន៍អន្តរជាតិអាចដឹងពីឆន្ទៈពិតប្រាកដរបស់អ៊ីរ៉ង់ ពោលថាតើអ៊ីរ៉ង់ពិតជាបានគោរពតាមពាក្យសន្យារបស់ខ្លួនដែរ ឬទេ។
រហូតមកដល់ពេលនេះ ពោលជាង ៣ខែក្រោយការចុះហត្ថលេខាលើកិច្ចព្រមព្រៀងកាលពីថ្ងៃទី១៤ កក្កដាមក អ្វីៗហាក់ដូចបាននិងកំពុងធ្វើដំណើរទៅមុខដោយរលូន។ អ្វីដែលសហគមន៍អន្តរជាតិកំពុងរង់ចំាមើលពីអ៊ីរ៉ង់ គឺការអនុវត្តន៍ជាក់ស្តែងលើកិច្ចព្រមព្រៀង ហើយអ្វីដែលអ៊ីរ៉ង់កំពុងរង់ចំាមើលពីសហគមន៍អន្តរជាតិ ពិសេសពីអាមេរិក និងសហភាពអឺរ៉ុប គឺការលើកទ័ណ្ឌកម្មសេដ្ឋកិច្ចចេញវិញ។ តែយ៉ាងណាក៏ដោយ លោកអគ្គនាយកទីភ្នាក់ងារថាមពលបរមាណូអន្តរជាតិយូគីយ៉ា អាម៉ាណូត្រូវផ្សព្វផ្សាយសេចក្តីសន្និដ្ឋានចុងក្រោយរបស់ខ្លួននៅថ្ងៃទី១៥ ធ្នូខាងមុខ។ គឺនៅក្នុងសេចក្តីសន្និដ្ឋានរបស់លោកអាម៉ាណូនាថ្ងៃខាងមុខនោះឯងដែលគេអាចដឹងច្បាស់ថា តើអ៊ីរ៉ង់ពិតជាបានគោរពត្រឹមត្រូវលើកិច្ចព្រមព្រៀងដែរឬទេ។
បន្ទាប់មក គឺតាមរយៈសេចក្តីសន្និដ្ឋានចុងក្រោយរបស់លោកអាម៉ាណូដដែលនោះឯងដែលសហគមន៍អន្តរជាតិត្រូវ ឬមិនត្រូវលើកទ័ណ្ឌកម្មសេដ្ឋកិច្ចចេញពីអ៊ីរ៉ង់។ តែលោកប្រធានអង្គការថាមពលបរិមាណូអ៊ីរ៉ង់អាលី អាក្បារ សាលេហ៊ីបានថ្លែងតាមទូរទស្សន៍រដ្ឋថា អ៊ីរ៉ង់បានត្រៀមខ្លួនរួចជាស្រេចដើម្បីគោរពតាមពាក្យសន្យារបស់ខ្លួន។ ដូច្នេះឃើញថានៅចំពោះមុខ ភាគីនីមួយៗសុទ្ធតែបានប្តេជ្ញាចិត្តគោរពកិច្ចព្រមព្រៀងដែលបានចុះហត្ថលេខា តែស្របពេលគ្នានេះ ភាពមិនទុកចិត្ត និងការមើលបណ្តាំគ្នាកំពុងបន្តមានជាប់ជាប្រចំា។ សូមបញ្ជាក់ជូនថា ការបន្តមិនទុកចិត្តគ្នារវាងសហគមន៍អន្តរជាតិ និងអ៊ីរ៉ង់មិនមែនទើបតែមានពេលនេះទេ តែមានតំាងពីថ្ងៃផ្ទុះវិបត្តិនុយក្លេអ៊ែរអ៊ីរ៉ង់ជាង ១០ឆ្នំាកន្លងទៅមកម្ល៉េះ។ ជាក់ស្តែងមិនអាចប្រកែកបាន គឺរយៈពេលនៃការចរចាប្រទាញប្រទង់គ្នារាប់សិបឆ្នំា ទម្រំាសម្រេចបាននូវកិច្ចព្រមព្រៀងស្ថាពរមួយកាលពីថ្ងៃទី១៤ កក្កដាកន្លងទៅ។
គួររម្លឹកជូនឡើងវិញថា នៅក្នុងកិច្ចព្រមព្រៀងកាលពីជាង ៣ខែមុន អ៊ីរ៉ង់បានយល់ព្រមកាត់បន្ថយចំនួនម៉ាស៊ីនចម្រើនធាតុអ៊ុយរ៉ាញ៉ូមពី ១៩ ០០០ មកនៅត្រឹម ៦ ០០០ ក្នុងរយៈពេល ១០ឆ្នំាខាងមុខ។ បន្ទាប់មក អ៊ីរ៉ង់បានយល់ព្រមកែប្រែម៉ាស៊ីនប្រតិកម្មដើរដោយទឹកធ្ងន់ដើម្បីកាត់បន្ថយផលិតកម្មភ្លុយតូញ៉ូម និងបន្ទាប់មកទៀត អ៊ីរ៉ង់នឹងត្រូវកាត់បន្ថយចំនួនស្តុកអ៊ុយរ៉ាញ៉ូមដែលចម្រើនធាតុកម្រិតទាបពី ១០តោនមកនៅត្រឹម ៣០០គីឡូក្រាមពីពេលនេះទៅ ១៥ឆ្នំាខាងមុខ។ ជាថ្នូរមកវិញ សហគមន៍អន្តរជាតិនឹងលើកទ័ណ្ឌកម្មសេដ្ឋកិច្ចចេញពីអ៊ីរ៉ង់។
ជាការពិត នុយក្លេអ៊ែរជាអាវុធដែលអ៊ីរ៉ង់បានយកទៅប្រើដើម្បីចរចាមានប្រៀបលើសហគមន៍អន្តរជាតិ តែទន្ទឹមគ្នានេះ ទ័ណ្ឌកម្មសេដ្ឋកិច្ចរបស់សហគមន៍អន្តរជាតិក៏ជាឆ្អឹងទទឹង ក សម្រាប់ការរស់នៅរបស់ប្រទេសជង្រុកប្រេងកាតនៅតំបន់ដើមបូព៌ាមួយនេះដែរ។ ដូច្នេះសម្រាប់ទីក្រុងតេហេរ៉ង់ ការលើកទ័ណ្ឌកម្មសេដ្ឋកិច្ចរបស់សហគមន៍អន្តរជាតិ គឺជាអ្វីដែលខ្លួនកំពុងទន្ទឹងរង់ចំាដើម្បីរស់ផង និងក៏ដើម្បីពង្រីកឥទ្ធិពលរបស់ខ្លួននៅក្នុងតំបន់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ