ចំណាប់ខ្មាំងត្រូវភេរវជនអាល់កៃដាសម្លាប់ក្នុងពេលកុម្ម៉ង់ដូអាមេរិកព្យាយាមចូលរំដោះ
ចំណាប់ខ្មាំងអាមេរិកម្នាក់ និងអាហ្វ្រិកខាងត្បូងម្នាក់ ត្រូវបានសាខាក្រុមអាល់កៃដាប្រចាំប្រទេសយេម៉ែនសម្លាប់ កាលពីថ្ងៃសៅរ៍ នៅក្នុងពេលដែលកងកុម្ម៉ង់ដូអាមេរិកមួយក្រុមព្យាយាមចូលទៅរំដោះ ប៉ុន្តែ មិនបានជោគជ័យ។ ក្រោយពីការស្លាប់ចំណាប់ខ្មាំងនេះ រដ្ឋាភិបាលក្រុងវ៉ាស៊ីងតោនបានព្យាយាមពន្យល់ថា អាមេរិកបានសម្រេចបើកប្រតិបត្តិការសង្រ្គោះចំណាប់ខ្មាំង ដោយសារតែមើលឃើញថា “អាយុជីវិតរបស់ចំណាប់ខ្មាំងកំពុងប្រឈមនឹងគ្រោះថ្នាក់”។
ចុះផ្សាយនៅថ្ងៃ៖
ស្តាប់ - ០១:៤៣
ប្រតិបត្តិការសង្រ្គោះចំណាប់ខ្មាំងត្រូវបានធ្វើឡើង នៅព្រឹកព្រលឹមថ្ងៃសៅរ៍ ដោយកុម្ម៉ង់ដូអាមេរិកមួយក្រុម មានគ្នាប្រមាណ ៤០នាក់ មកពីក្រុម SEAL Team Six ដែលធ្លាប់មានឈ្មោះល្បី នៅក្នុងប្រតិបត្តិការសង្រ្គោះចំណាប់ខ្មាំងកាលពីពេលកន្លងទៅ និងជាពិសេស ល្បីឈ្មោះ ក្នុងប្រតិបត្តិការសម្លាប់បិនឡាដិន នៅប៉ាគីស្ថាន កាលពីឆ្នាំ២០១១។
យោងតាមមន្រ្តីក្រសួងការពារជាតិអាមេរិក កងកុម្ម៉ង់ដូទាំង ៤០នាក់នេះ ត្រូវបានគេដឹកតាមឧទ្ធម្ភាគចក្រពិសេស ទៅទម្លាក់នៅចម្ងាយប្រមាណ ១០គីឡូម៉ែត្រពីទីតាំងរបស់ភេរវជន រួចហើយធ្វើដំណើរដោយថ្មើរជើង។ ក៏ប៉ុន្តែ ការលបវាយឆ្មក់នេះត្រូវបរាជ័យ ដោយសារតែក្រុមភេរវជនបានដឹងខ្លួនជាមុន ហើយបានបាញ់តដៃនឹងក្រុមកុម្ម៉ង់ដូ ព្រមទាំងឆ្លៀតបាញ់សម្លាប់ចំណាប់ខ្មាំងទាំងពីររូប។
លោកអូបាម៉ា ក្រៅពីបានថ្កោលទោសការសម្លាប់ចំណាប់ខ្មាំងដោយក្រុមភេរវជន ក៏បានពន្យល់ផងដែរថា រូបលោកផ្ទាល់ ដែលជាអ្នកបញ្ជាឲ្យបើកប្រតិបត្តិការសង្រ្គោះចំណាប់ខ្មាំងនេះ ក្រោយពីទទួលដំណឹងថា ក្រុមភេរវជនមានគម្រោងសម្លាប់ចំណាប់ខ្មាំង នៅក្នុងរយៈពេល ៧២ម៉ោងខាងមុខ។
គួរបញ្ជាក់ថា នៅក្នុងចំណោមចំណាប់ខ្មាំងទាំងពីរនាក់ មានម្នាក់ជាពលរដ្ឋអាមេរិក គឺជាអ្នកថតរូបឲ្យទូរទស្សន៍ BBC និងម្នាក់ទៀតជាគ្រូបង្រៀនមកពីអាហ្វ្រិកខាងត្បូង ហើយបម្រើការឲ្យអង្គការមនុស្សធម៌ក្រៅរដ្ឋាភិបាល។ អង្គការមនុស្សធម៌នេះបានអះអាងថា នៅមុនពេលមានប្រតិបត្តិការសង្រ្គោះចំណាប់ខ្មាំងដោយកងកុម្ម៉ង់ដូអាមេរិក គេបានចរចាត្រូវរ៉ូវគ្នារួចទៅហើយជាមួយនឹងក្រុមភេរវជនថា ចំណាប់ខ្មាំងអាហ្វ្រិកខាងត្បូងរូបនេះនឹងត្រូវដោះលែង នៅថ្ងៃអាទិត្យ។
គេមិនអាចដឹងឲ្យប្រាកដទេថា តើរដ្ឋាភិបាលក្រុងវ៉ាស៊ីងតោនបានដឹងជាមុនអំពីការចរចាដោះលែងចំណាប់ខ្មាំងអាហ្វ្រិកខាងត្បូងនេះដែរឬក៏អត់ ឬក៏អាចដឹងជាមុនថា ចំណាប់ខ្មាំងអាហ្វ្រិកខាងត្បូងរូបនេះត្រូវគេឃុំខ្លួនជាមួយនឹងចំណាប់ខ្មាំងអាមេរិក ដែលគេចង់រំដោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ