ស៊ីរី៖លោកអាសាដចង់បន្តសង្គ្រាមទល់ពួកប្រឆាំងនៅទូទាំងប្រទេស តែក៏ចង់ចរចា
នៅក្នុងប្រទេសស៊ីរី លោកប្រធានាធិបតីអាសាដបានបញ្ជាក់ពីបំណងចង់បន្តសង្រ្គាមបង្ក្រាបពួកប្រឆាំងនៅទូទាំងប្រទេស ទោះបីជាត្រូវប្រើពេលយូរក៏ដោយ។ តែលោកក៏មិនបានទាត់ចោលពីបំណងចង់ចរចាជាមួយក្រុមប្រឆាំងដែរ។ ការបញ្ជាក់របស់ប្រមុខរដ្ឋស៊ីរីយ៉ាងដូចនេះបានធ្វើឡើងជាមួយទីភ្នាក់ងារសារព័ត៌មានបារាំង AFP នៅប៉ុន្មានម៉ោងមុនអាមេរិក និងរុស្ស៊ីបានព្រមព្រៀងគ្នាឲ្យមានបទឈប់បាញ់នៅស៊ីរីក្នុងរយៈពេលប៉ុន្មានថ្ងៃខាងមុខ។
ចុះផ្សាយនៅថ្ងៃ៖
ស្តាប់ - ០១:៥៨
បទសម្ភាសន៍ដែលលោកប្រធានាធិបតីស៊ីរីអាសាដបានផ្តល់ឲ្យទីភ្នាក់ងារសារព័ត៌មានបារាំង AFP ត្រូវបានថតទុកកាលពីថ្ងៃព្រហស្បតិ៍ ទី១១ កុម្ភៈ ពោលប៉ុន្មានម៉ោងមុនការប្រកាសចេញនូវកិច្ចព្រមព្រៀងមួយសំដៅបញ្ឈប់ការឈប់បាញ់នៅក្នុងប្រទេសស៊ីរី។ គឺជាកិច្ចព្រមព្រៀងដែលអាមេរិក និងរុស្ស៊ីបានរកឃើញនៅក្នុងទីក្រុងមុយនិច ប្រទេសអាល្លឺម៉ង់នាជំនួបរវាងលោកប្រមុខការទូតរុស្ស៊ី និងសមភាគីអាមេរិក។
អ្វីដែលលោកអាសាដបាននិយាយប្រាប់ AFP ជាដំបូងនោះ គឺយុទ្ធនាការរបស់ទ័ពរដ្ឋាភិបាលវាយប្រហារលើទីក្រុងអាឡិបដែលបានចាប់ផ្តើមនៅដើមខែកុម្ភៈជាមួយនឹងជំនួយទម្លាក់គ្រាប់បែកពីទ័ពអាកាសរុស្ស៊ី។ លោកប្រមុខរដ្ឋស៊ីរីដែលហាក់ដូចជាមានការទុកចិត្តលើខ្លួនឯងខ្លាំង និងមានសុទិដ្ឋិនិយមបានប្តេជ្ញាថា នឹងមិនរាថយក្នុងការបន្តធ្វើសង្រ្គាមដើម្បីដណ្តើមការគ្រប់គ្រងនៅទូទាំងប្រទេស។ ទន្ទឹមនឹងការបន្តសង្រ្គាម លោកអាសាដក៏មិនបដិសេធរឿងចរចាដែរ។
តែសម្រាប់លោកអាសាដ រឿងចរចាមិនមែនមានន័យស្មើនឹងការបញ្ឈប់សង្រ្គាមនោះទេ ព្រោះជាផ្លូវពីរដែលជ្រើសយកដោយមិនអាចចៀសរួចនៅក្នុងកាលៈទេសៈសព្វថ្ងៃ។ ដោយឡែក លោកអាសាដក៏បានលើកឡើងពីហានិភ័យនៃប្រតិបត្តិការយោធានៅលើសមរភូមិដឹកនាំដោយប្រទេសតួកគី និងប្រទេសអារ៉ាប៊ីសាអូឌីត។ លោកអាសាដបានបញ្ជាក់ច្បាស់ៗថា ទ័ពរបស់លោកមានសមត្ថភាព និងលទ្ធភាពគ្រប់គ្រាន់ដើម្បីប្រឈមទប់។ ទាក់ទងនឹងជនភៀសខ្លួនស៊ីរីនៅបរទេស លោកអាសាដមិនញញើតនឹងទម្លាក់កំហុសដាក់សហភាពអឺរ៉ុបថាជាអ្នកទទួលខុសត្រូវនៃការរត់ភៀសខ្លួនរបស់ប្រជាជនស៊ីរី។
និយាយពីបទឧក្រិដ្ឋកម្មប្រឆាំងមនុស្សជាតិនៅស៊ីរីដែលអង្គការសហប្រជាជាតិបានចោទរបបស៊ីរីសព្វថ្ងៃត្រូវបានលោកអាសាដច្រានចោល ព្រមទាំងបញ្ជាក់ថា លោកមិនបារម្ភពីការព្រមានរបស់អន្តរជាតិទេ ព្រោះរបាយការណ៍របស់អង្គការសហប្រជាជាតិនាពេលកន្លងមកមានលក្ខណៈនយោបាយ និងបានធ្វើឡើងដោយគ្មានភស្តុតាងជាក់ស្តែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ