អ៊ីរ៉ង់ទាមទារឲ្យអ៊ីស្រាអែលបោះបង់ចោលអាវុធនុយក្លេអ៊ែរ
សន្និសីទនៃសន្ធិសញ្ញាមិនរីកសាយភាយអាវុធនុយក្លេអ៊ែរបានចាប់បើកធ្វើ នៅទីក្រុងញូវយ៉កសហរដ្ឋអាមេរិក កាលពីថ្ងៃចន្ទម្សិលមិញ ហើយនឹងត្រូវបន្តធ្វើរហូតដល់ថ្ងៃទី២២ឧសភាខាងមុខ។ នៅក្នុងឱកាសបើកសន្និសីទនេះ អ៊ីរ៉ង់បានទាមទារដោយទទូចឲ្យអ៊ីស្រាអែលបោះបង់ចោលអាវុធនុយក្លេអ៊ែររបស់ខ្លួន ហើយឈានទៅបង្កើតតំបន់គ្មានអាវុធនុយក្លេអ៊ែរនៅមជ្ឈិមបូព៌ា។
ចុះផ្សាយនៅថ្ងៃ៖
លោក Javad Zarif រដ្ឋមន្រ្តីការបរទេសអ៊ីរ៉ង់ បានធ្វើការកត់សម្គាល់ថា អ៊ីស្រាអែលគឺជាប្រទេសតែមួយគត់ នៅក្នុងតំបន់មជ្ឈិមបូព៌ាដែលមិនមែនជាសមាជិកសន្ធិសញ្ញាមិនរីកសាយភាយអាវុធនុយក្លេអ៊ែរ ហើយក៏មិនដែលបង្ហាញពីជំហរចង់ចូលក្នុងសន្ធិសញ្ញានេះ។ លោករដ្ឋមន្រ្តីការបរទេសអ៊ីរ៉ង់ ដែលបានថ្លែងក្នុងនាមប្រទេសចំនួន ១២០ ក្នុងចលនាមិនចូលបក្សសម្ព័ន្ធ បានទាមទារថា អ៊ីស្រាអែលត្រូវតែបោះបង់ចោលអាវុធនុយក្លេអ៊ែររបស់ខ្លួន ហើយចុះហត្ថលេខាលើសន្ធិសញ្ញាមិនរីកសាយភាយអាវុធនុយក្លេអ៊ែរ។ លោកក៏បានលើកឡើងផងដែរថា ប្រទេសក្នុងចលនាមិនចូលបក្សសម្ព័ន្ធទាមទារដោយទទូចឲ្យបង្កើតតំបន់គ្មានអាវុធនុយក្លេអ៊ែរនៅមជ្ឈិមបូព៌ា។
ការទាមទាររបស់អ៊ីរ៉ង់នៅពេលនេះ គឺដូចគ្នាទាំងស្រុងទៅនឹងសេចក្តីសម្រេចរបស់ប្រទេសជាសមាជិកសន្ធិសញ្ញាមិនរីកសាយភាយអាវុធនុយក្លេអ៊ែរ នៅក្នុងអំឡុងសន្និសីទកាលពីឆ្នាំ២០១០កន្លងទៅ។ នៅពេលនោះ ប្រទេស ចំនួន១៨៩ ដែលជាសមាជិកសន្ធិសញ្ញាមិនរីកសាយភាយអាវុធនុយក្លេអ៊ែរ (លើកលែងតែសហរដ្ឋអាមេរិកមួយចេញ) បានទាមទារឲ្យបើកធ្វើសន្និសីទមួយ នៅឆ្នាំ២០១២ ដើម្បីបង្កើតតំបន់គ្មានអាវុធនុយក្លេអ៊ែរនៅមជ្ឈិមបូព៌ា ក៏ប៉ុន្តែ រហូតមកទល់នឹងពេលបច្ចុប្បន្ន សន្និសីទនេះនៅតែមិនអាចបើកធ្វើទៅបាន ដោយសារតែអ៊ីស្រាអែលមិនព្រមចូលរួម។
គួររំឭកឡើងវិញថា សន្ធិសញ្ញាមិនរីកសាយភាយអាវុធនុយក្លេអ៊ែរ ដែលត្រូវបានបង្កើតឡើង កាលពីជាង ៤០ឆ្នាំមុន មានគោលដៅទប់ស្កាត់កុំឲ្យប្រទេសថ្មីៗផ្សេងទៀតផលិតអាវុធនុយក្លេអ៊ែរ ក្រៅពីប្រទេសទាំង ៥ ដែលមានអាវុធនុយក្លេអ៊ែររួចទៅហើយ គឺសហរដ្ឋអាមេរិក រុស្ស៊ី អង់គ្លេស បារាំង និងចិន។ ក៏ប៉ុន្តែ ប្រទេសចំនួន ៣ គឺ ប៉ាគីស្ថាន ឥណ្ឌា និងអ៊ីស្រាអែល បានបដិសេធមិនចុះហត្ថលេខាលើសន្ធិសញ្ញានេះ ហើយបាននាំគ្នាផលិតអាវុធនុយក្លេអ៊ែររៀងៗខ្លួន។ កូរ៉េខាងជើងវិញបានចូលជាសមាជិកសន្ធិសញ្ញានេះរួចហើយ ក៏ប៉ុន្តែ បានដកខ្លួនចេញទៅវិញ ដើម្បីទៅបង្កើតកម្មវិធីនុយក្លេអ៊ែរយោធា។
គិតរហូតមកទល់នឹងពេលនេះ អ៊ីស្រាអែលមិនដែលទទួលស្គាល់ជាផ្លូវការថាខ្លួនមានអាវុធនុយក្លេអ៊ែរនោះទេ ក៏ប៉ុន្តែ គ្រប់ប្រទេសផ្សេងៗទៀតសុទ្ធតែចាត់ទុកអ៊ីស្រាអែលថាជាមហាអំណាចនុយក្លេអ៊ែរ ហើយអ្នកជំនាញបានធ្វើការប៉ាន់ស្មានថា នៅក្នុងពេលបច្ចុប្បន្ននេះ អ៊ីស្រាអែលមានក្បាលគ្រាប់នុយក្លេអ៊ែរប្រមាណជា ២០០គ្រាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ