អ៊ីរ៉ង់ត្រៀមបើកទីផ្សារអ៊ីនធឺនែតទទួលក្រុមហ៊ុនអាមេរិកំាង Google និងក្រុមហ៊ុនបរទេសផ្សេងទៀត
នៅក្នុងប្រទេសអ៊ីរ៉ង់ លោកអនុរដ្ឋមន្រ្តីក្រសួងគមនាគមន៍ណាស្រូឡា យ៉ាហានហ្គាដបានប្រាប់ឲ្យដឹងនៅថ្ងៃអាទិត្យ ទី១ មីនាថា រដ្ឋាភិបាលបានត្រៀមខ្លួនរួចជាស្រេចដើម្បីបើកទីផ្សារអ៊ីនធឺនែតឲ្យក្រុមហ៊ុនបម្រើសវាអ៊ីនធឺណែតបរទេសអាចចូលទៅបោះទុនរកស៊ីនៅក្នុងប្រទេសអ៊ីរ៉ង់បាន ដូចយ៉ាងក្រុមហ៊ុនអាមេរិកំាង Google ឬមួយក៏ក្រុមហ៊ុនបរទេសបម្រើសេវាអ៊ីនធឺនែតដទៃទៀត។ តែលោកណាស្រូឡា យ៉ាហានហ្គាដបានបញ្ជាក់ជាមុនថា ក្រុមហ៊ុនបម្រើសេវាអ៊ីនអឺនែតបរទេសដែលចង់ទៅរកស៊ីនៅអ៊ីរ៉ង់ត្រូវតែគោរពវប្បធម៌របស់អ៊ីរ៉ង់ដោយខានមិនបាន។
ចុះផ្សាយនៅថ្ងៃ៖
ស្តាប់ - ០២:០៦
ការថ្លែងរបស់លោកអនុរដ្ឋមន្រ្តីក្រសួងគមនាគមន៍អ៊ីរ៉ង់ណាស្រូឡា យ៉ាហានហ្គាដបានធ្វើឡើងនៅក្នុងកិច្ចសន្ទនាមួយជាមួយទីភ្នាក់ងារព័ត៌មានក្នុងស្រុកឈ្មោះ Fars។ នៅក្នុងកិច្ចសន្ទនានោះ លោកណាស្រូឡាបានអះអាងច្បាស់ៗថា រដ្ឋាភិបាលទីក្រុងតេហេរ៉ង់បានត្រៀមខ្លួនរួចជាស្រេចក្នុងការចរចាជាមួយក្រុមហ៊ុនអ៊ីនធឺនែតបរទេសល្បីៗដើម្បីឲ្យគេផ្តល់សេវាអ៊ីនធឺនែតនៅក្នុងទឹកដីអ៊ីរ៉ង់ ដោយមានការគោរពលក្ខខណ្ឌវប្បធម៌របស់ប្រទេសអ៊ីរ៉ង់។ តែលោកណាស្រូឡាមិនបានបញ្ជាក់ថា តើលក្ខខណ្ឌវប្បធម៌អ៊ីរ៉ង់ដែលក្រុមហ៊ុនបរទេសត្រូវគោរពនោះមានអ្វីខ្លះទេ។ បើយោងតាមលោកណាស្រូឡា ក្រុមហ៊ុនបរទេសបម្រើសេវាអ៊ីនធឺនែតទំាងអស់អាចចូលទៅបោះទុនរកស៊ីក្នុងប្រទេសអ៊ីរ៉ង់បាន រាប់ទំាងក្រុមហ៊ុន Google របស់អាមេរិកំាងផង។
សព្វថ្ងៃនេះ អ៊ីរ៉ង់មានអ្នកប្រើអ៊ីនធឺនែតប្រមាណជា ៤០លាននាក់ក្នុងចំណោមប្រជាពលរដ្ឋអ៊ីរ៉ង់សរុបជិត ៧៨លាននាក់។ ជាទូទៅ រដ្ឋអំណាចបានបិទខ្ទប់គេហទំព័រណាដែលមានលក្ខណៈនយោបាយ ឬបង្កប់ដោយរូបភាពអាសអាភាស ពិសេសបណ្តាញសង្គម ដូចយ៉ាង Twitter និង Facebook។ គឺបណ្តាញសង្គមទំាងនេះហើយដែលក្រុមប្រឆំាងបានប្រើដើម្បីអំពាវនាវឲ្យមនុស្សចុះផ្លូវធ្វើបាតុកម្មប្រឆំាងនឹងការជាប់ឆ្នោតប្រធានាធិបតីជាថ្មីរបស់លោក Mahmoud Ahmadinejad កាលពីខែមិថុនា ឆ្នំា ២០០៩។ អ្វីជាការកត់សម្គាល់ ការដែលអ៊ីរ៉ង់បានបើកទីផ្សារសេវាអ៊ីធឺនែតឲ្យក្រុមហ៊ុនបរទេសពេលនេះបានធ្វើឡើង ចំពេលដែលអ៊ីរ៉ង់កំពុងជាប់ទ័ណ្ឌកម្មបរទេសដោយសារតែសំណុំរឿងនុយក្លេអ៊ែរ។
ចំណុចនេះត្រូវបានលោកអនុរដ្ឋមន្រ្តីក្រសួងគមនាគមន៍អ៊ីរ៉ង់ណាស្រូឡាបញ្ជាក់ថា អាចជាឧបសគ្គចំពោះក្រុមហ៊ុនអាមេរិកំាង Google។ តែសម្រាប់ក្រុមហ៊ុនបរទេសផ្សេងទៀតត្រូវបានលោកណាស្រូឡាអះអាងថា រដ្ឋាភិបាលបានផ្តើមកិច្ចចរចាហើយ ដោយលោកមិនបានលំអិតអ្វីបន្ថែមទេ។ គួរជម្រាបជូនថា ជិត ២ឆ្នំាកន្លងទៅនេះ រដ្ឋាភិបាលទីក្រុងតេហេរ៉ង់បានបន្តឹងការឃ្លំាមើលលើបណ្តាញសង្គម ព្រមទំាងបានបង្កើតឲ្យមានប៉ូលិសអ៊ីនធឺនែតដើម្បីត្រួតពិនិត្យរាល់ខ្លឹមសារនៅលើគេហទំព័រ ប្លុកនានា ដោយបានឃាត់ខ្លួនអ្នករិះគន់រដ្ឋាភិបាលដោយចំហជាច្រើននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ