នាយករដ្ឋមន្រ្តីអ៊ីស្រាអែលបេ្តជ្ញា ប្រយុទ្ធដល់ថ្ងៃស្លាប់ ប្រឆាំងនឹងភេរវជនប៉ាឡេស្ទីន
ភាពតានតឹង នៅតែមិនថមថយ នៅតំបន់ស៊ីហ្សកដានី ដែលជាទឹកដីរបស់ប៉ាឡេស្ទីន ប៉ុន្តែ កាន់កាប់ដោយអ៊ីស្រាអែល។ បន្ទាប់ពី ជនជាតិអ៊ីស្រាអែល៤នាក់ ត្រូវគេបាញ់ និងចាក់សម្លាប់ តាំងពីថ្ងៃព្រហស្បតិ៍ នាយករដ្ឋមន្រ្តី អ៊ីស្រាអែលបានសន្យា ប្រើគ្រប់មធ្យោបាយ ដើម្បី ប្រយុទ្ធប្រឆាំងនឹងក្រុមភេរវជនប៉ាឡេស្ទីន។ នៅក្នុងកិច្ចប្រជុំបន្ទាន់ គណៈរដ្ឋមន្រ្តី កាលពីថ្ងៃអាទិត្យ លោកបិនចាមីន នេតានីញ៉ាហ៊ូ នៅបានព្រមាន បើកការបង្រ្កាប ចាស់ដៃ ដើម្បី ទប់ស្កាត់មិនឲ្យមានការងើបបះបោររបស់ប្រជាជនប៉ាឡេស្ទីន នៅតំបន់ស៊ីហ្សកដានី។
ចុះផ្សាយនៅថ្ងៃ៖
ស្តាប់ - ០១:៤៧
តាំងតែពីថ្ងៃសៅរ៍ តំបន់ស៊ីហ្សកដានី ដែលមានរួមបញ្ចូលផងដែរ ជេរូសាឡឹមខាងកើត បានក្លាយជាកន្លែងប្រយុទ្ធតបតគ្នា រវាងទាហានអ៊ីស្រាអែល និងយុវជនប៉ាឡេស្ទីន។ យុវជនប៉ាឡេស្ទីននៅតែប្រើវិធីសាស្រ្តចាស់ គឺគប់ដុំថ្ម និងដបសាំងបំផ្ទុះទៅលើប៉ូលិសអ៊ីស្រាអែល ដែលបានបាញ់តបវិញ គ្រាប់កាំភ្លើងពិតៗ ដែលអនុញ្ញាតិដោយច្បាប់ថ្មី របស់រដ្ឋាភិបាល។
នៅក្នុងខណៈដែលប៉ូលិសអ៊ីស្រាអែល រាប់រយនាក់ត្រូវបានពង្រាយ ដើម្បីស្វែងរកចាប់ឃាតករ សម្លាប់ប្តីប្រពន្ធ អ៊ីស្រាអែល នៅតំបន់ស៊ីហ្សកដានី នាយករដ្ឋមន្រ្តី អ៊ីស្រាអែលដែលកោះប្រជុំគណៈរដ្ឋមន្រ្តីតាំងពីលើយន្តហោះ មកពីទីក្រុងញូវយ៉ក បានប្រកាសបញ្ជា ឲ្យអាជ្ញាធរបង្កើនការបង្រ្កាប បំផ្លាញផ្ទះសម្បែង របស់ភេរវជន ដើម្បី បញ្ចប់ ភេរវកម្ម និងសំពងបំបាក់ស្មារតីរបស់ក្រុមជនដៃដល់។
នៅថ្ងៃអាទិត្យ យុវជនប៉ាឡេស្ទីន នៅតំបន់ស៊ីហ្សកដានី បាននាំគ្នាដុតកង់ឡាន នៅលើផ្លូវ ដើម្បីរារាំង ប៉ូលិសអ៊ីស្រាអែលមិនឲ្យចូលទៅដល់ផ្ទះរបស់យុវជន ប៉ាឡេស្ទីន ម៉ូហាណាដ ហាឡាប៊ី ដែលបានចាក់សម្លាប់បុរសអ៊ីស្រាអែល ២នាក់ កាលពីថ្ងៃសៅរ៍ នៅទីក្រុងបុរាណ របស់ជេរូសាឡឹម។ នៅថ្ងៃសៅរ៍ដដែល បន្ទាប់ពីបាញ់សម្លាប់យុវជនប៉ាឡេស្ទីន ម៉ូហាណាដ ប៉ូលិសអ៊ីស្រាអែលនៅបានបាញ់សម្លាប់យុវជនប៉ាឡេស្ទីនមួយទៀត ដែលអ៊ីស្រាអែលចោទថា បានប្រើកាំបិត ដើរចាក់សម្លាប់គេឯង។ នៅយប់ថ្ងៃអាទិត្យ អ៊ីស្រាអែលបានបើកប្រតិបត្តិការ វាយប្រហារជើងអាកាសទៅលើតំបន់ហ្កាហ្សា បន្ទាប់ពីមានគ្រាប់រ៉ុកកែតបាញ់ចេញពីតំបន់នោះ។
នៅថ្ងៃអាទិត្យដដែល យុវជនប៉ាឡេស្ទីន អាយុ ១៨ឆ្នាំម្នាក់ បានស្លាប់ នៅក្នុងការប៉ះទង្គិចគ្នាខ្លាំងរវាងប៉ូលិស អ៊ីស្រាអែល និងយុវជនប៉ាឡេស្ទីន នៅតំបន់ស៊ីហ្សកដានី។ មរណភាពរបស់យុវជនប៉ាឡេស្ទីន ធ្វើឲ្យគេបារម្ភថា នឹងអាចបណ្តាលឲ្យអំពើហិង្សា កើតឡើងកាន់តែខ្លាំង ក្នុងខណៈពេលដែលទាំងអាជ្ញាធរប៉ាឡេស្ទីន និងគណបក្សប្រឆាំងអ៊ីស្រាអែល បានពន្លយឲ្យដឹងពី គ្រោះថ្នាក់ផ្ទុះឡើង សង្រ្គាមគប់ដុំថ្ម ឬហៅថា Intifada ជាលើកទី៣ នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ