ក្រុមជីហាតវាយដណ្តើមកាន់កាប់ទីក្រុងបុរាណស៊ីរី ដែលជាសម្បតិ្តបេតិកភណ្ឌពិភពលោក
ក្រុមជីហាត នៃអង្គការរដ្ឋអ៊ីស្លាម នៅថ្ងៃព្រហស្បតិ៍បានជោគជ័យ វាយចូលកាន់កាប់បានទាំងស្រុង ទីក្រុងបុរាណ ប៉ាល់មៀរ របស់ប្រទេសស៊ីរី។ ប៉ាលមៀរ រដ្ឋធានីបុរាណ អាយុជាង ២ពាន់ឆ្នាំនៅប្រទេសស៊ីរី ត្រូវបានអង្គការយូណេស្កូចាត់ចូលជាសម្បត្តិបេតិកភណ្ឌពិភពលោកខាងមនុស្សជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
បន្ទាប់ពីវាយបណ្តេញបានសម្រេចទ័ពរដ្ឋាភិបាលស៊ីរី និងចូលគ្រប់គ្រងបន្ទាយទាហាន រួមទាំងអគារស៊ើបការណ៍សម្ងាត់របស់រដ្ឋាភិបាល នៅយប់ថ្ងៃពុធ ក្រុមជីហាតនៃអង្គការរដ្ឋអ៊ីស្លាម នៅថ្ងៃព្រហស្បតិ៍ បានចូលកាន់កាប់ បានទាំងស្រុង ប៉ាល់មៀរ រដ្ឋធានីបុរាណរបស់ស៊ីរី។ នេះបើតាមប្រធានអង្គការឃ្លាំមើលសិទ្ធិមនុស្សស៊ីរី ដែលបានបន្ថែមថា ការប្រយុទ្ធគ្នា ដ៏បង្ហូរឈាម បានសម្លាប់ទ័ពរដ្ឋាភិបាលស៊ីរីជាង១០០នាក់ កាលពីថ្ងៃពុធ។
ទីក្រុងបុរាណ ប៉ាល់មៀរ ស្ថិតនៅប្រមាណ តែ២០០គីឡូម៉ែត្រប៉ុណ្ណោះ ពីរដ្ឋធានីដាម៉ាស ដែលមានតាំងទីស្ថាប័នរដ្ឋាភិបាលរបស់លោកបាស្ហា អាល់ អាសាដ។ កាលពីថ្ងៃពុធ ប្រធានអង្គការយូណេស្កូ លោកស្រីនាយិការ អ៊ីរីណា បូកូវ៉ាបានសំដែងក្តីបារម្ភពីជោគវាសនារបស់ប៉ាល់មៀរ និងអំពាវនាវឲ្យភាគីជម្លោះឈប់ប្រយុទ្ធគ្នាជាបន្ទាន់។ នៅថ្ងៃព្រហស្បតិ៍ ប្រធានអង្គការយូណេស្កូ បានលើកឡើងនៅក្នុងខ្សែវិដេអូ ដែលការបំផ្លិចបំផ្លាញទីក្រុងបុរាណប៉ាល់មៀរគឺជាការបាត់បង់ដ៏ធំធេងសម្រាប់ប្រវត្តិមនុស្សជាតិ។
ប៉ាល់មៀរ មានអាយុ ជាង ២ពាន់ឆ្នាំ។ ប៉ាល់មៀរ ឬគ្រាប់គុជនៅវាលខ្សាច់ ដែលល្បីខាងមានផ្នូរបុរាណ ដែលបញ្ជាក់ពីសម័យរុងរឿង ក្នុងអតីតកាល ត្រូវបានអង្គការយូណេស្កូចាត់ចូលជាសម្បត្តិបេតិកភណ្ឌពិភពលោកក្នុងទសវត្សរ៍ឆ្នាំ ១៩៨០។ ប៉ាល់មៀរ ស្ថិតនៅកណ្តាលវាលខ្សាច់ ប៉ុន្តែ ជាកន្លែងសំចតដ៏ប្រណិត របស់ក្រុមជំនួញទឹកអប់ ភ្លុក ឬសូត្រ ដែលឆ្លងកាត់វាល់ខ្សាច់។
ប៉ាល់មៀរ ធ្លាក់ទៅក្នុងកណ្តាប់ដៃគ្រប់គ្រងរបស់ក្រុមជីហាត ធ្វើឲ្យគេបារម្ភថា ទីតាំងប្រវត្តិសាស្រ្ត ដ៏ល្បីឈ្មោះ នៅដើមបូព៌ានឹងត្រូវរងការបំផ្លិចបំផ្លាញព្រោះថា ក្រុមជីហាត នៃអង្គការរដ្ឋអ៊ីស្លាម ធ្លាប់បានបង្ហាញរួចហើយ រូបភាពវីដេអូបំផ្លាញរូបចម្លាក់បុរាណ បន្ទាប់ពីពួកគេវាយចូលកាន់កាន់សារមន្ទីរក្នុងក្រុងម៉ូស៊ូល របស់ប្រទេសអ៊ីរ៉ាក់។ តាមអ្នកជំនាញ ក្រៅតែពីបំផ្លាញវត្ថុបុរាណដើម្បីបង្ហាញភាពឃោឃៅរបស់ខ្លួន ក្រុមជីហាត នៃអង្គការរដ្ឋអ៊ីស្លាមក៏តែងតែលួចគាស់យកវត្ថុបុរាណទាំងនោះទៅលក់នៅផ្សារងងឹត ដើម្បីបានលុយទិញអាវុធ មកធ្វើសង្រ្គាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ