អង្គការសហប្រជាជាតិទាញសញ្ញាអាសន្នពីកំណើនចំនួនជីហាតបរទេសនៅក្នុងប្រទេសស៊ីរី និងអ៊ីរ៉ាក់
ចុះផ្សាយនៅថ្ងៃ៖
អង្គការសហប្រជាជាតិទើបបានផ្សព្វផ្សាយរបាយការណ៍ស្តីពីកំណើនចំនួនជីហាតបរទេសដែលកំពុងមានវត្តមាននៅក្នុងប្រទេសស៊ីរី និងប្រទេសអ៊ីរ៉ាក់។ របាយការណ៍បានឲ្យដឹងថា មាន ១០០ប្រទេសក្នុងចំណោម ១៩៣ប្រទេសជាសមាជិកដែលមានជនជាតិរបស់ខ្លួនបានទៅចូលរួមជាមួយអង្គការរដ្ឋអ៊ីស្លាមនៅស៊ីរី និងអ៊ីរ៉ាក់។ កាលពីថ្ងៃទី២៤ ខែកញ្ញា ឆ្នំា ២០១៤ ក្រុមប្រឹក្សាសន្តិសុខអង្គការសហប្រជាជាតិបានអនុម័តនូវសេចក្តីសម្រេចចិត្តមួយក្នុងការបិទខ្ទប់ហិរញ្ញប្បទាន ការជ្រើសរើស និងការបន្លាស់ទីរបស់ពួកជីហាត។ តែ ៨ខែក្រោយការអនុម័តសេចក្តីសម្រេចចិត្តនោះមក ចំនួនជីហាតបរទេសមានកាន់តែច្រើន និងដែលកំពុងធ្វើឲ្យរដ្ឋាភិបាលរបស់ប្រទេសពាក់ព័ន្ធឈឺក្បាលយ៉ាងខ្លំាង។
១០០ប្រទេស នេះជាតួលេខនិមិត្តរូបមួយដែលអង្គការសហប្រជាជាតិចង់ទាញសញ្ញាអាសន្នថា សុទ្ធសឹងជាប្រទេសដែលមានពលរដ្ឋខ្លួនតិច ឬច្រើនបានទៅចូលរួមជាមួយអង្គការរដ្ឋអ៊ីស្លាមនៅក្នុងប្រទេសស៊ីរី និងនៅក្នុងប្រទេសអ៊ីរ៉ាក់។ កាលពីខែកញ្ញា ឆ្នំា ២០១៤ អង្គការសហប្រជាជាតិបានប៉ាន់ប្រមាណថា មានយុទ្ធជនបរទេសចំនួន ១៥ ០០០នាក់ដែលកំពុងមានវត្តមាននៅក្នុងទឹកដីអ៊ីស្លាមស៊ីរី និងអ៊ីរ៉ាក់ដើម្បីបំពេញចំណង់របស់ខ្លួនឲ្យក្លាយជាជីហាតជាមួយអង្គការរដ្ឋអ៊ីស្លាម។ តែសព្វថ្ងៃ ចំនួននេះបានកើនជាង ២៥ ០០០នាក់ ពោលបានកើនរហូតដល់ទៅ ៧១% បើគិតតំាងពីខែមីនា ឆ្នំា ២០១៤។ គឺវត្តមានពួកជីហាតបរទេសដ៏ច្រើនសម្បើមនេះហើយដែលបានធ្វើឲ្យអង្គការរដ្ឋអ៊ីស្លាមអាចក្តោបក្តាប់ទឹកដីស៊ីរីបានជាងពាក់កណ្តាល។
ក៏ប៉ុន្តែ ការគំរាមកំហែងរបស់ក្រុមយុទ្ធជនបរទេសមិនមែនជារឿងថ្មីថ្មោងទេ នេះបើយោងតាមរបាយការណ៍របស់គណៈកម្មាធិការនៃទ័ណ្ឌកម្មប្រឆំាងអាល់កៃដាដែលបានធ្វើការសិក្សាដោយផ្អែកលើទិន្នន័យផ្តល់ដោយក្រសួងស៊ើបការណ៍សម្ងាត់ចំនួន ២៧ក្រសួង។ ផ្អែកតាមរបាយការណ៍របស់អង្គការសហប្រជាជាតិ មាន ៦ប្រទេសដែលប្រទេសមួយៗមានពលរដ្ឋរបស់ខ្លួនជាង ១ ០០០នាក់បានទៅចូលរួមជាមួយអង្គការរដ្ឋអ៊ីស្លាម ពិសេសគឺបារំាង សហព័ន្ធរុស្ស៊ី ម៉ារ៉ុក និងប្រទេសទុយនីស៊ី។ ចំណែក ៤២ប្រទេស គឺមានជាង ១០០នាក់សម្រាប់ប្រទេសនីមួយៗ ក្នុងនោះមានទំាងប្រទេសដែលមិនធា្លប់ទំាងមានចំណងទាក់ទងជាមួយភេរវនិយមទៀតផង ដូចករណីប្រទេសម៉ាល់ឌីវ ឬទ្រីនីដាដ និងតូបាហ្គោ។
ទោះបីជាគេពិបាកសន្មត់ និងកំណត់ឲ្យបានច្បាស់ពីចរិត អកប្បកិរិយា ឬមួយក៏ធម្មជាតិពិតរបស់យុទ្ធជនភេរវជនបរទេសក៏ដោយ ក៏គេបានកត់សម្គាល់ឃើញជាទូទៅថា អ្នកដែលបានសម្រេចចិត្តបរិច្ចាគរាងកាយរត់ទៅសេពគប់ជាមួយអង្គការរដ្ឋអ៊ីស្លាមមានវ័យកាន់តែក្មេងទៅៗ ពោលមានអាយុចន្លោះពី ១៥ ទៅ ៣៥ឆ្នំា និងដែលចំនួនស្រ្តីក៏មានការកើនឡើងគួរឲ្យកត់សម្គាល់ដែរ។ លោកអាឡិចសង់ អ៊ីវ៉ាន អ្នកសម្របសម្រួលរបស់គណៈកម្មាធិការនៃទ័ណ្ឌកម្មប្រឆំាងអាល់កៃដាបានគូសបញ្ជាក់ថា បញ្ហាយុទ្ធជនភេរវជនបរទេសបានក្លាយជាបញ្ហាបន្ទាន់មួយសម្រាប់សន្តិសុខពិភពលោក។ ក្រុមជីហាតបរទេសមិនត្រឹមតែបានគំរាមកំហែងលើជនស៊ីវិលនៅអ៊ីរ៉ាក់ ស៊ីរី ឬមួយក៏នៅលីប៊ីប៉ុណ្ណោះទេ តែពួកនេះក៏កំពុងក្លាយជាអ្នកគំរាមកំហែងលើប្រទេសកំណើតរបស់ខ្លួន ឬមួយក៏ប្រទេសដែលពួកគេបានធ្វើដំណើរឆ្លងកាត់ ដូចករណីប្រទេសតួកគី ហ្សកដានី ឬមួយក៏ប្រទេសលីបង់។
ដូច្នេះវាជារឿងបន្ទាន់មួយដែលសហគមន៍អន្តរជាតិត្រូវតែពួតដៃគ្នាដើម្បីទប់ស្កាត់។ នៅត្រង់ចំណុចនេះ អង្គការសហប្រជាជាតិមិនញញើតនឹងចោទរដ្ឋសមាជិកពីភាពយឺតយ៉ាវក្នុងការចាត់វិធានការជាលក្ខណៈឧបតោភាគី ក៏ដូចជាការរួមសហការណ៍ជាលក្ខណៈអន្តរជាតិ។ អ្នកដែលទទួលរងការរិះគន់ខ្លំាងជាងគេ គឺប្រទេសអឺរ៉ុបដែលខ្វះការដោះដូរព័ត៌មានរវាងគ្នាឲ្យបានស៊ីជ្រៅស្តីពីអត្តសញ្ញាណ និងការធ្វើដំណើរទៅមករបស់ពលរដ្ឋខ្លួនទៅកាន់ប្រទេសស៊ីរី ឬអ៊ីរ៉ាក់។ ឯកអគ្គរដ្ឋទូតអាមេរិកំាងប្រចំានៅអង្គការសហប្រជាជាតិ លោកស្រី Samantha Power បានសម្តែងការសោកស្តាយដែលពិភពលោកនៅមិនទាន់សហការណ៍គ្នាឲ្យបានពេញទំហឹងក្នុងការទប់ស្កាត់ពួកយុទ្ធជនបរទេសកុំឲ្យធ្វើដំណើរចេញ ចូលនៅក្នុងតំបន់ជម្លោះ។
រហូតមកដល់ពេលនេះ ប្រទេសនីមួយៗបានចាត់វិធានការដាច់ដោយឡែករបស់ខ្លួនដើម្បីព្យាយាមរារំាងពលរដ្ឋខ្លួនកុំឲ្យធ្វើដំណើរទៅចូលរួមជាមួយអង្គការរដ្ឋអ៊ីស្លាម។ តែទន្ទឹមគ្នានេះ ក្រុម ឬអង្គការដែលជាអ្នករៀបចំជ្រើសរើសយុទ្ធជនជីហាតក៏បានព្យាយាមប្រើយុទ្ធសាស្រ្តបង្វែងដានដើម្បីគេចផុតពីសំណាញ់ស៊ើបអង្កេតរបស់ក្រសួងស៊ើបការណ៍សម្ងាត់។ ប្រទេសតួកគី គឺជាទីកន្លែងឆ្លងកាត់របស់ពួកជីហាតបរទេសទៅកាន់ប្រទេសស៊ីរី និងអ៊ីរ៉ាក់។ រដ្ឋាភិបាលទីក្រុងអង់ការ៉ាបានពង្រឹងសន្តិសុខផ្ទៃក្នុង និងបានអនុម័តនូវវិធានការជាតិមួយចំនួននៅតាមច្រកព្រំដែនដើម្បីស្ទាក់ចាប់យុទ្ធជនបរទេសដែលប្រើទឹកដីខ្លួនដើម្បីបន្តឆ្លងចូលក្នុងទឹកដីនៃប្រទេសស៊ីរី និងអ៊ីរ៉ាក់។ សព្វថ្ងៃនេះ មានបញ្ជីមនុស្សចំនួន ១២ ៥០០នាក់កំពុងស្ថិតក្រោមការឃ្លំាមើលរបស់រដ្ឋអំណាចតួកគី។
គួរជម្រាបជូនថា តួកគីមានព្រំដែនជាប់នឹងប្រទេសស៊ីរីប្រវែងជាង ៩០០គីឡូម៉ែត្រ និងជាប់ប្រទេសអ៊ីរ៉ាក់ប្រវែង ៣០០គីឡូម៉ែត្រ។ ក៏ប៉ុន្តែ យុទ្ធនាការប្រយុទ្ធប្រឆំាងឲ្យមានប្រសិទ្ធិភាពតែម្នាក់ឯងរបស់តួកគីទល់នឹងពួកជីហាតបរទេសនឹងមិនអាចធ្វើបានឡើយ ប្រសិនបើគ្មានការរួមសហការណ៍ពីក្រុមប្រទេសដើមរបស់ពួកជីហាតទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ