រដ្ឋមន្រ្តីអារ៉ាប៊ី សាអូឌីត៖ តម្លៃប្រេងឆៅនឹងឡើងខ្ពស់ឡើងវិញ
នៅក្នុងវេទិកាស្តីពីថាមពល ដែលរៀបចំធ្វើ នៅទីក្រុងអាប៊ូ ដាប៊ី កាលពីថ្ងៃអាទិត្យទី ២១ ធ្នូ រដ្ឋមន្រ្តីប្រេងរបស់អារ៉ាប៊ី សាអូឌីតAli al-Naimi បានប្រកាសជំនឿជឿជាក់របស់ខ្លួនថា តម្លៃប្រេងឆៅ ដែលរហូតមកដល់បច្ចុប្បន្ននេះបានធ្លាក់ចុះយ៉ាងគំហុកនោះ នឹងកើនឡើងវិញ។ សម្រាប់អារ៉ាប៊ី សាអូឌីត ដែលដើរតួជាប្រធានអង្គការ OPEP នៃប្រទេសនាំចេញប្រេង និងសមាជិកដទៃទៀត គឺការផលិតច្រើនលើសកំណត់របស់ប្រទេសដែលមិនមែនជាសមាជិករបស់ OPEPដែលជាមូលហេតុចំបង ធ្វើឲ្យតម្លៃប្រេងធ្លាក់ចុះយ៉ាងខ្លាំងបែបនេះ។
ចុះផ្សាយនៅថ្ងៃ៖
ស្តាប់ - ០២:១៦
នៅក្នុងវេទិកាស្តីពីថាមពល ក្រុមប្រទេសសមាជិករបស់ OPEP មិនបានបញ្ជាក់ចំៗទេ ថា ប្រទេសដែលមិនមែនជាសមាជិករបស់ OPEP ដែលផលិតប្រេងឆៅច្រើនហួសហេតុនោះជាប្រទេសណាទេ។ ប៉ុន្តែ តាមអ្នកជំនាញ គេអាចដឹងខ្លះហើយថា ប្រទេសដែលសមាជិករបស់ OPEPចង្អុលចោទនោះ គឺអាមេរិក ដែលបច្ចុប្បន្ននេះកំពុងបង្កើនការផលិតប្រេងឆៅប្រភេទថ្មី ក្នុងកម្រិតខ្ពស់ រហូតដល់៨លាន ៧សែនធុងក្នុងមួយថ្ងៃ។
កាលពីចុងខែវិច្ឆិកាកន្លងទៅ នៅក្នុងកិច្ចប្រជុំក្នុងទីក្រុងវីយ៉ែន ក្រុមប្រទេសនាំចេញប្រេង របស់អង្គការ OPEP បានប្រកាសរក្សាចំនួនផលិតប្រេងឆៅដដែល គឺប្រមាណ ៣០លានបារីល ក្នុងមួយថ្ងៃៗ។ កន្លងមក នៅពេលដែល តម្លៃប្រេងឆៅធ្លាក់ចុះ អង្គការ OPEP តែងតែបន្ថយការផលិតបូមប្រេង។ ប៉ុន្តែ គេមើលឃើញថា អង្គការ OPEP មិនព្រមបន្ថយចំនួនផលិតលើកនេះ ក៏ដើម្បីទប់ទល់ ប្រកួតប្រជែងនឹងប្រេងឆៅរបស់អាមេរិកនៅលើទីផ្សារ។ អ្នកជំនាញខ្លះទៀត យល់ថា ការដែលអារ៉ាប៊ី សាអូឌីតចេញមុខការពារនយោបាយ រក្សាការផលិត ប្រេងឲ្យនៅដដែល និងបណ្តោយឲ្យតម្លៃប្រេងឆៅធ្លាក់ចុះទាបមួយរយៈ គឺជាយុទ្ធសាស្រ្ត ដើម្បីបំបាក់ដៃគូប្រកួតប្រជែងនៅក្នុងទីផ្សារ ព្រោះថា ការបូមប្រេងក្នុងមួយបារីល នៅអារ៉ាប៊ី សាអូឌីតមានតម្លៃតែ ៣០ដុល្លារ ចំណែកអាមេរិកវិញ ត្រូវចំណាយពី៤០ ទៅ ១០០ដុល្លារ ដើម្បីបូមប្រេងឆៅប្រភេទថ្មីរបស់ខ្លួន។
កាលពីថ្ងៃអាទិត្យ រដ្ឋមន្រ្តីប្រេងរបស់អារ៉ាប៊ី សាអូឌីត លោកអាលី អាល់ ណាអ៊ីមី បានផ្តល់ការសង្ឃឹមដែលថា តម្រូវការប្រេងនឹងកើនឡើង ក្នុងពេលឆាប់ៗខាងមុខ។ សម្រាប់មន្រ្តីអារ៉ាប៊ី សាអូឌីត តម្លៃប្រេងធ្លាក់ចុះនឹងជួយឲ្យមានកំណើនសេដ្ឋកិច្ចពិភពលោកដែរ។ នៅពេលដែលសេដ្ឋកិច្ចពិភពលោកបានល្អប្រសើរ នោះតម្រូវការនឹងកើនឡើង ហើយជាលទ្ធផលតម្លៃប្រេងឆៅនឹងកើនឡើង។
ជាមួយគ្នានេះដែរ អារ៉ាប៊ី សាអូឌីតបានទាត់ចោលផងដែរ ការចោទប្រកាន់របស់អ៊ីរ៉ង់ ដែលថា អារ៉ាប៊ី សាអូឌីតជាអ្នករៀបចំផែនការទម្លាក់តម្លៃប្រេងដើម្បីហេតុផលប្រយោជន៍ភូមិសាស្រ្តនយោបាយរបស់ខ្លួន។ តាមអ៊ីរ៉ង់ អារ៉ាប៊ី សាអូឌីតអាចរៀបចំផែនការធ្វើឲ្យប្រេងធ្លាក់ថ្លៃ ដើម្បីវាយប្រហារអ៊ីរ៉ង់ និងរុស្ស៊ី ដែលគាំទ្ររបបស៊ីរី របស់លោកបាស្ហា អាល់ អាសាដ។ សូមបញ្ជាក់ថា សេដ្ឋកិច្ចរបស់រុស្ស៊ី និងអ៊ីរ៉ង់ ពឹងផ្អែកទៅលើការនាំចេញប្រេង។ អ៊ីរ៉ង់សមាជិករបស់អង្គការ OPEP ដែលកំពុងជួបវិបត្តិសេដ្ឋកិច្ចដោយសារទណ្ឌកម្មរបស់ប្រទេសលោកខាងលិច ជាពិសេស អាមេរិក រួចទៅហើយនោះ ត្រូវរងគ្រោះមួយជាន់ទៀត ដោយសារតែតម្លៃប្រេងធ្លាក់ចុះយ៉ាងគំហុក តាំងពីខែមិថុនា។
តម្លៃប្រេងឆៅបានធ្លាក់ចុះ៥០ភាគរយ ចាប់តាំងពីខែមិថុនា។ ការរក្សាចំនួនផលិតប្រេងរបស់អង្គការ OPEPឲ្យនៅថេរ ៣លាន បារីលក្នុងមួយថ្ងៃនឹងរឹតតែ ធ្វើឲ្យតម្លៃប្រេងធ្លាក់ចុះព្រោះថា ចំនួនប្រេងត្រូវផ្គង់ផ្គង់ នឹងនៅតែមានច្រើន បើប្រៀបធៀបនឹង តម្រូវការក្នុងទីផ្សារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ