ក្រោយការសម្លាប់អាប៊ូ សាយ៉ាសនៅស៊ីរី អាមេរិកកំពុងមានកំណប់មាសក្នុងដៃស្តីពីអង្គការរដ្ឋអ៊ីស្លាម!
ចុះផ្សាយនៅថ្ងៃ៖
ស្តាប់ - ០៤:៥៦
នៅថ្ងៃសៅរ៍ ទី១៦ ឧសភាចុងសប្តាហ៍កន្លងទៅ សេតវិមានបានប្រកាសឲ្យដឹងជាសាធារណៈពីប្រតិបត្តិការរបស់កងកម្មង់ដូអាមេរិកប្រកបដោយជោគជ័យនៅក្នុងប្រទេសស៊ីរី។ នៅក្នុងប្រតិបត្តិការរយៈពេលខ្លីនោះ កងកម្មង់ដូអាមេរិកសម្លាប់បានជនអាប៊ូ សាយ៉ាស និងចាប់ខ្លួនភរិយា ព្រមទំាងរឹបអូសបានសម្ភារៈជាច្រើន ពិសេសម៉ាស៊ីនកុំព្យូទ័ដែលមានស្តុកដោយព័ត៌មានសំខាន់ៗជាច្រើនទាក់ទងនឹងរចនាសម្ព័ន្ធរបស់អង្គការរដ្ឋអ៊ីស្លាម។ តើជនអាប៊ូ សាយ៉ាស ជានរណា និងថា តើមរណៈភាពរបស់អាប៊ូ សាយ៉ាសអាចនឹងធ្វើឲ្យកម្លំាងរបស់អង្គការរដ្ឋអ៊ីស្លាមចុះខ្សោយ ឬទេ?
រហូតមកពេលនេះ និងតំាងពីមានការគំរាមកំហែងរបស់អង្គការរដ្ឋអ៊ីស្លាមនៅក្នុងប្រទេសអ៊ីរ៉ាក់ និងស៊ីរីមក សហរដ្ឋអាមេរិក រួមជាមួយនឹងកម្លំាងសម្ព័ន្ធមិត្តបានព្យាយាមវាយកម្ទេចពួកជីហាតអង្គការរដ្ឋអ៊ីស្លាមតែតាមផ្លូវអាកាសប៉ុណ្ណោះ ពោលមិនបានប្រើកម្លំាងទ័ពថ្មើរជើងទេ។ អាមេរិកមានវត្តមានទ័ពរបស់ខ្លួននៅអ៊ីរ៉ាក់ តែមិនមែនជាទ័ពចុះប្រយុទ្ធផ្ទាល់ទេ ហើយនៅស៊ីរី គឺគ្មានម្នាក់សោះ នេះក៏ដោយសារតែបស្ចិមលោកកំពុងពួកដៃគ្នាដាក់គំនាបលោកប្រធានាធិបតីស៊ីរីអាសាដ។
តែអ្វីដែលហាក់ដូចជាថ្មីស្រឡាងមិនធ្លាប់មានពេលនេះ គឺការដែលកងកម្មង់ដូពិសេសអាមេរិកបានចូលវាយបំបែកសំបុករបស់អង្គការរដ្ឋអ៊ីស្លាមនៅក្នុងទឹកដីស៊ីរីដោយផ្ទាល់តែម្តង។ គឺជាប្រតិបត្តិការសឹកមួយយ៉ាងសម្ងាត់ដែលអាមេរិកមិនបានជូនព័ត៌មានដល់រដ្ឋអំណាចស៊ីរី និងដែលសូម្បីតែរដ្ឋអំណាចស៊ីរីខ្លួនឯងក៏មិនបានដឹងអ្វីទំាងអស់ដែរ។ នៅក្នុងប្រតិបត្តិសឹករយៈពេលខ្លីនាថ្ងៃសៅរ៍ ទី១៦ ឧសភាកន្លងទៅ កងកម្មង់ដូអាមេរិកសម្លាប់បានថ្នាក់ដឹកនំាជាន់ខ្ពស់អង្គការរដ្ឋអ៊ីស្លាមម្នាក់ឈ្មោះអាប៊ូ សាយ៉ាស និងចាប់ខ្លួនប្រពន្ធគេ ព្រមទំាងរឹបអូសបានសម្ភារៈជាច្រើនផ្សេងទៀត ពិសេសម៉ាស៊ីនកុំព្យូទ័រដែលមានស្តុកទៅដោយព័ត៌មានសំខាន់ៗជាច្រើនទាក់ទងនឹងរចនាសម្ព័ន្ធ និងលុយកាក់របស់អង្គការរដ្ឋអ៊ីស្លាម។
តាមពិតទៅ និងកុំតែទូរទស្សន៍អាមេរិកំាងបានផ្សព្វផ្សាយឲ្យដឹងនូវព័ត៌មាននេះទេ ម្ល៉េះប្រតិបត្តិការយ៉ាងសម្ងាត់របស់កងកម្មង់ដូអាមេរិកស្ងាត់ៗនៅក្នុងទឹកដីស៊ីរីនេះនឹងបន្តស្ងាត់ជាបន្តទៀតបាត់ទៅហើយ។ គួរជម្រាបជូនថា មែនទែនទៅ នេះជាលើកទី២ ហើយដែលកងកម្មង់ដូអាមេរិកបានចូលធ្វើអន្តរាគមន៍នៅក្នុងទឹកដីស៊ីរី។ លើកទី១ គឺអន្តរាគមន៍ដើម្បីជួយរំដោះចំណាប់ខ្មំាងអាមេរិកំាងម្នាក់ឈ្មោះ James Foley ពីកណ្តាប់ដៃអង្គការរដ្ឋអ៊ីស្លាម តែគួរឲ្យស្តាយ អន្តរាគមន៍កាលណោះបានទទួលបរាជ័យ ហើយចំណាប់ខ្មំាង James Foley ក៏ត្រូវបានពួកជីហាតអង្គការរដ្ឋអ៊ីស្លាមកាត់ក្បាលចោលបាត់ដែរ។ កំណត់សម្គាល់មួយទៀត អន្តរាគមន៍លើកទី២ របស់កងកម្មង់ដូអាមេរិកនៅស៊ីរីដែលឈានដល់ការសម្លាប់បានអាប៊ូ សាយ៉ាស គឺជាផែនការដែលបានរៀបចំទុកជាមុន និងមានការចេញបញ្ជាផ្ទាល់ពីលោកប្រធានាធិបតីបារ៉ាក់ អូបាម៉ា។
ដូច្នេះវាជារឿងមួយធម្មតាទេដែលទីក្រុងវ៉ាស៊ីនតោនបានប្រកាសសារភាព និងបង្ហាញពីមោទនភាពរបស់ខ្លួន។ តែសំណួរដែលគ្រប់គ្នាកំពុងចោទពេលនេះគឺថា អាប៊ូ សាយ៉ាសមិនមែនជាមេកើយកំពូលរបស់អង្គការរដ្ឋអ៊ីស្លាមទេ ចុះហេតុអ្វីបានជាអាមេរិកត្រេកត្រអាលខ្លំាងម្ល៉េះ និងថែមទំាងបានអះអាងថា មរណៈភាពអាប៊ូ សាយ៉ាសនឹងពិតជាធ្វើឲ្យអង្គការរដ្ឋអ៊ីស្លាមចុះខ្សោយខ្លំាង។
ជាការពិត អាប៊ូ សាយ៉ាសមិនមែនជាមេកើយកំពូលរបស់អង្គការរដ្ឋអ៊ីស្លាមទេ តែជាឃ្លំាងលុយ ឬអាចនិយាយដោយសាមញ្ញថា ជាអ្នករកលុយ និងគ្រប់គ្រងលុយកាក់សម្រាប់ចិញ្ចឹមក្រពះរបស់អង្គការរដ្ឋអ៊ីស្លាម។ មានដើមកំណើតជាជនជាតិទុយនីស៊ី អាប៊ូ សាយ៉ាស ជាអ្នកទទួលខុសត្រូវក្នុងការលក់ប្រេង និងឧស្ម័នដែលបូមចេញពីតំបន់គ្រប់គ្រងដោយអង្គការរដ្ឋអ៊ីស្លាម ព្រមទំាងជាអ្នកចាត់ចែងចំណូល ចំណាយរបស់អង្គការរដ្ឋអ៊ីស្លាមទំាងមូល។ ក្រៅពីនោះ អាប៊ូ សាយ៉ាសក៏បានចូលរួមបញ្ជាផ្ទាល់នៅក្នុងប្រតិបត្តិការផ្សេងៗ។ តាមពិតទៅ គោលដៅរបស់អាមេរិក គឺចាប់អាប៊ូ សាយ៉ាសទំាងរស់ តែដោយប្រឈមមុខនឹងការតតំាងខ្លំាងពីពួកជីហាតផ្សេងទៀត កងកម្មង់ដូគ្មានជម្រើសអ្វីនឹងបាញ់សម្លាប់ទំាងអស់ ដោយមានវត្តមានអាប៊ូ សាយ៉ាសនៅក្នុងហ្នឹងដែរ។
អាមេរិកមានការសោកស្តាយ និងខកចិត្តយ៉ាងខ្លំាងដែលមិនបានចាប់ខ្លួនអាប៊ូ សាយ៉ាសទំាងរស់។ តែទន្ទឹមគ្នា រដ្ឋបាលអាមេរិកំាងក៏មិនបានខាតបង់ទំាងស្រុងដែរ ព្រោះកងកម្មង់ដូបានចាប់ខ្លួនប្រពន្ធអាប៊ូ សាយ៉ាស និងរឹបអូសបានសម្ភារៈជាច្រើនទៀត ពិសេសម៉ាស៊ីនកុំព្យូទ័រដែលមានស្តុកទៅដោយព័ត៌មានសំខាន់ៗជាច្រើន។ គេនៅមិនទាន់ដឹងថា តើមានព័ត៌មានអ្វីខ្លះទេនៅក្នុងម៉ាស៊ីនកុំព្យូទ័រនោះ តែមន្រ្តីអាមេរិកជាច្រើនរូបបានអះអាងរួចជាស្រេចថា ការស្លាប់របស់អាប៊ូ សាយ៉ាសមិនជាសំខាន់ទេ អ្វីដែលសំខាន់ និងដែលអាមេរិកយកមកធ្វើជាមូលដ្ឋានបាន គឺទិន្នន័យដែលមានស្តុកនៅក្នុងម៉ាស៊ីនកុំព្យូទ័រទៅវិញទេ។ បន្ទាប់មក គឺការសួរចម្លើយលើប្រពន្ធរបស់អាប៊ូ សាយ៉ាស។
ជាមួយនឹងទិន្នន័យនៅក្នុងកុំព្យូទ័រ រដ្ឋបាលអាមេរិកំាងនឹងអាចដឹងច្បាស់ពីចំណូល ចំណាយ ពិសេសពីប្រភពចំណូលដែលអង្គការរដ្ឋអ៊ីស្លាមទទួលបាន។ សម្រាប់ទីក្រុងវ៉ាស៊ីនតោន មានតែទិន្នន័យនៅក្នុងកុំព្យូទ័រនោះទេដែលនឹងអាចលាតត្រដាងការពិត និងដែលគេអាចប្រើជាផ្ទំាងស៊ីបដើម្បីចាត់វិធានការបំផ្លាញអង្គការភេរវនិយមមួយនេះឲ្យដល់ឫសគល់ ឬក៏យ៉ាងហោចណាស់ ក៏ធ្វើឲ្យកម្លំាងរបស់គេចុះខ្សោយដែរ។ ដូច្នេះសួរថា បើប្រតិបត្តិការនៅសមរភូមិទទួលបានជោគជ័យបែបនេះ តើអាមេរិកគួរយកធ្វើជាគំរូដើម្បីផ្លាស់ប្តូរយុទ្ធសាស្រ្តដោយបញ្ជូនទ័ពទៅវាយប្រហារទល់នឹងពួកជីហាតអង្គការរដ្ឋអ៊ីស្លាមនៅសមរភូមិផ្ទាល់ ឬយ៉ាងណា?។ ចម្លើយភ្លាមៗគឺគ្មានទេ ព្រោះអាមេរិកមិនចង់ផុងខ្លួនសាជាថ្មីដូចសម័យសង្រ្គាមនៅអ៊ីរ៉ាក់ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ