អារ៉ាប៊ីសាអូឌីត៖មូលហេតុនៃការរុះរើសមាសភាពថ្នាក់ដឹកនំាក្នុងរដ្ឋាភិបាល និងអ្នកស្នងរាជ្យ
ចុះផ្សាយនៅថ្ងៃ៖
ស្តាប់ - ០៥:២២
កាលពីថ្ងៃទី២៩ មេសាកន្លងទៅ ព្រះមហាក្សត្រនៃប្រទេសអារ៉ាប៊ីសាអូឌីតព្រះចៅសាលម៉ានបានធ្វើការរុះរើដោះដូរសមាសភាពថ្នាក់ដឹកនំាក្នុងរដ្ឋាភិបាល និងអ្នកស្នងរាជ្យ។ មានក្រសួងជាច្រើនដែលព្រះចៅសាលម៉ានបានប្តូររដ្ឋមន្រ្តី តែអ្វីដែលបានធ្វើឲ្យគ្រប់គ្នាភ្ញាក់ផ្អើលខ្លំាងជាងគេនោះ គឺការប្តូរអ្នកស្នងរាជ។ ព្រះចៅសាលម៉ានបានជ្រើសរើសលោករដ្ឋមន្រ្តីក្រសួងមហាផ្ទៃម៉ូហាម៉េត បិនណាយ្វេ (Mohamed Ben Nayef) ឲ្យធ្វើជាស្តេចស្នងរាជ្យជំនួសកន្លែងលោកម៉ូរីន (Muqrin) និងលោករដ្ឋមន្រ្តីក្រសួងការពារជាតិម៉ូហាម៉េត បិនសាលម៉ាន (Mohamed Ben Salman) ឲ្យធ្វើជាស្តេចស្នងរាជ្យបន្ទាប់។ ហេតុអ្វីបានជាព្រះចៅសាលម៉ានបានសម្រេចចិត្តរុះរើថ្នាក់ដឹកនំាក្នុងរដ្ឋាភិបាល និងអ្នកស្នងរាជ្យពេលនេះ?
ការរុះរើដោះដូរសមាសភាពដឹកនំានៅក្នុងរដ្ឋាភិបាលរបស់ប្រទេសមួយមិនមានអ្វីគួរឲ្យភ្ញាក់ផ្អើល ហើយក៏វាមិនមែនជារឿងចម្លែកអ្វីដែរ។ តែអ្វីដែលគ្រប់គ្នាបាន និងកំពុងចោទសួរចំពោះប្រទេសអារ៉ាប៊ីសាអូឌីតពេលនេះគឺថា ហេតុអ្វីបានព្រះមហាក្សត្រសាលម៉ានដែលបានឡើងសោយរាជ្យតំាងពីថ្ងៃទី២៣ មករាកន្លងមក បែរជាទើបបានសម្រេចធ្វើការដោះដូរសមាសភាពថ្នាក់ដឹកនំារដ្ឋាភិបាល និងប្តូរស្តេចស្នងរាជ្យនៅពេលនេះទៅវិញ និងថា តើការរុះរើដោះដូរពេលនេះ អាចជាតម្រុយនៃការប្រេះឆា ឬមួយក៏ការប្រជែងកម្លំាងគ្នានៅក្នុងរង្វង់គ្រួសាររាជ្យវង្សគ្នាឯងដែរ ឬយ៉ាងណា?
មុននឹងឆ្លើយសំណួរខាងលើ គេគួរតែពិនិត្យមើលលើឥស្សរជននយោបាយដែលបានដកចេញ និងឥស្សរជននយោបាយដែលទើបតែងតំាងថ្មី ឬមួយបានបន្ថែមតំណែងជាមុនសិន។ អ្វីដែលគ្រប់គ្នាបានចាប់អារម្មណ៍ខ្លំាងជាងគេនោះ គឺទាក់ទងនឹងក្រសួងចំនួន ៣ ដែលជាគ្រឹះអំណាចរបស់ព្រះចៅសាលម៉ាន គឺក្រសួងមហាផ្ទៃ ក្រសួងការពារជាតិ និងក្រសួងការបរទេស។ ចាប់ពីពេលនេះទៅ លោកម៉ូហាម៉េត បិនណាយ្វេដែលបច្ចុប្បន្នមានតួនាទីជារដ្ឋមន្រ្តីក្រសួងមហាផ្ទៃបានទទួលតំណែងបន្ថែមជាឧបនាយករដ្ឋមន្រ្តី និងជាស្តេចស្នងរាជ្យ។ ចំណែកលោកម៉ូហាម៉េត បិនសាលម៉ានដែលសព្វថ្ងៃកំពុងកាន់តំណែងជារដ្ឋមន្រ្តីក្រសួងការពារជាតិបានទទួលតំណែងបន្ថែមជាស្តេចស្នងរាជ្យបន្ទាប់។ រីឯតំណែងរដ្ឋមន្រ្តីការបរទេសដែលកាន់កាប់ដោយលោកសាអ៊ូដ អាល់ហ្វាយសាលតំាងពី ៤០ឆ្នំាកន្លងមកហើយនោះ ត្រូវបានដាក់ជំនួសដោយលោកអាដែល អាល់យូប៊ែរ ឯកអគ្គរាជ្យទូតអារ៉ាប៊ីសាអូឌីតប្រចំានៅសហរដ្ឋអាមេរិក។
ឥស្សរជនដែលគ្រប់គ្នាកំពុងចាប់អារម្មណ៍ និងនិយាយច្រើនជាងគេ គឺរូបលោករដ្ឋមន្រ្តីក្រសួងមហាផ្ទៃម៉ូហាម៉េត បិនណាយ្វេ និងលោករដ្ឋមន្រ្តីក្រសួងការពារជាតិម៉ូហាម៉េត បិនសាលម៉ាន។ មានអាយុ ៥៥ឆ្នំា លោកបិនណាយ្វេមានឈ្មោះល្បីខាងកំចាត់បណ្តាញអាល់កៃដាក្នុងស្រុក។ ក្នុងនាមជារដ្ឋមន្រ្តីក្រសួងមហាផ្ទៃ លោកបិនណាយ្វេមិនញញើតនឹងប្រើធម៌ក្តៅក្នុងការបោសសំអាតពួកជីហាតរបស់អាល់កៃនៅទូទំាងប្រទេស។ ក្នុងចន្លោះឆ្នំា ២០០៣ និង ២០០៦ ពោលចំពេលដែលបណ្តាញអាល់កៃដាប្រកាសបើកយុទ្ធនាការធ្វើភេរវកម្មបង្ហូរឈាមប្រឆំាងនឹងរដ្ឋអំណាច មូលដ្ឋានទ័ព និងទីតំាងរបស់លោកខាងលិចនៅអារ៉ាប៊ីសាអូឌីត លោកបិនណាយ្វេក៏បានចាត់វិធានការវាយបង្រ្កាបមុនយ៉ាងចាស់ដៃ ដោយបានធ្វើអ្នករួចខ្លួននំាគ្នារត់ផាសក្រញាំចេញពីអារ៉ាប៊ីសាអូឌីតទៅជ្រកកោណក្នុងប្រទេសជិតខាង ពិសេសគឺយេម៉ែន។
ក្រៅពីចំណាត់ការវាយបំបែកសំបុកពួកអាល់កៃដាក្នុងស្រុក លោកបិនណាយ្វេក៏បានចេញមុខកំចាត់បណ្តាញអាល់កៃដានៅក្នុងតំបន់ដែរ ដោយបានរួមសហការណ៍ជាមួយស្ថានទូតអារ៉ាប៊ីសាអូឌីតប្រចំាប្រទេសក្នុងតំបន់។ ស្នាដៃរបស់លោកបិនណាយ្វេត្រូវបានទទួលស្គាល់ដោយបស្ចិមលោក និងដែលរូបលោកបានក្លាយជាផ្ទំាងស៊ីបនៃការវាយប្រហារពីចលនា Aqpa ដែលជាសាខាអាល់កៃដាក្នុងតំបន់កាលពីឆ្នំា ២០០៩។ លោកបិនណាយ្វេ គឺជាសមាជិករាជវង្សអារ៉ាប៊ីសាអូឌីតតែម្នាក់គត់ដែលបានទទួលការគំរាមកំហែងដោយផ្ទាល់ពីអង្គការអាល់កៃដា។ ក្រៅពីប្រើធម៌ក្តៅ លោកបិនណាយ្វេក៏បានប្រើធម៌ត្រជាក់ ដោយយល់ព្រមទទួលយុទ្ធជនអាល់កៃដាណាដែលសុខចិត្តបោះបង់ចោលគំនិតជ្រុលនិយម និងយល់ព្រមវិលត្រឡប់រួមរស់ក្នុងសង្គមជាថ្មី។
និយាយពីរូបលោករដ្ឋមន្រ្តីការពារជាតិម៉ូហាម៉េត បិនសាលម៉ានដែលមានអាយុប្រមាណ ៣០ឆ្នំា និងដែលទើបត្រូវបានព្រះចៅសាលម៉ានតែងតំាងជាស្តេចស្នងរាជ្យបន្ទាប់ គឺជាមនុស្សខ្លំាងលំដាប់ទី២ របស់រដ្ឋអំណាច បន្ទាប់ពីលោកបិនណាយ្វេ ពិសេសនៅក្នុងកាលៈទេសៈដែលអារ៉ាប៊ីសាអូឌីតកំពុងដឹកនំាកម្លំាងសម្ព័ន្ធមិត្តវាយប្រហារពួកឧទ្ទាមហ៊ូទី្សក្នុងប្រទេសយេម៉ែន និងចំពេលដែលអារ៉ាប៊ីសាអូឌីតកំពុងទទួលការគំរាមកំហែងពីអង្គការរដ្ឋអ៊ីស្លាម។ មកដល់ត្រង់ចំណុចនេះ អ្វីៗហាក់ដូចជាធម្មតាដែលព្រះចៅសាលម៉ានបានយកចិត្តទុកដាក់ខ្លំាងចំពោះរូបលោកបិនណាយ្វេ ក៏ដូចជាលោកបិនសាលម៉ាន។ តែបើពិនិត្យឲ្យបានស៊ីជម្រៅបន្តិចទៅឃើញថា ទង្វើរបស់ព្រះចៅសាលម៉ាន គឺសំដៅពង្រឹងរាជបល្ល័ង្ក ពិសេសប្រមូលផ្តុំកម្លំាងរបស់ក្រុមគ្រួសារបក្សពួកស៊ូដាយរី (Soudayri) របស់ព្រះអង្គតែម្តង។
ជាក់ស្តែង ការដកលោកម៉ូរីន (Muqrin) ចេញពីតំណែងឧបនាយករដ្ឋមន្រ្តី និងទម្លាក់ពីស្តេចស្នងរាជ្យដោយដាក់លោកបិនណាយ្វេជំនួសវិញពេលនេះ គឺជាការវាយមួយពំនូងយ៉ាងចាស់ដៃលើមហាក្សត្រអាប់ដាឡាដែលទើបចូលទិវង្គតកាលពីពេលថ្មីៗកន្លងទៅ។ ចូរកុំភ្លេចថា ការដែលមហាក្សត្រអាប់ដាឡាបានតែងតំាងលោកម៉ូរីនជាស្តេចស្នងរាជ្យក្នុងឆ្នំា ២០១៣ គឺក្នុងគោលបំណងរារំាងឥទ្ធិពលរបស់ក្រុមបក្សពួកគ្រួសាររាជវង្សស៊ូដាយរីនោះឯង។ តែនៅពេលនេះ ជាឱកាសដែលមហាក្សត្រសាលម៉ានចេញមុខសងសឹកវិញម្តង។ កាលពីប៉ុន្មានខែមុននេះ ព្រះចៅសាលម៉ានក៏បានកំចាត់កូនប្រុសពីរនាក់របស់សពអាប់ដាឡាចេញពីអំណាចដែរ។
ដូច្នេះចាប់ពីពេលនេះតទៅ ព្រះចៅសាលម៉ានប្រមូលបានបក្សពួកស៊ូដាយរីពេញដៃ ពេញជើងហើយ ព្រោះបើគិតតាមលេខរៀងនៃឥស្សរជននយោបាយ ក៏ដូចជាអ្នកឡើងស្នងរាជ្យ លោកម៉ូហាម៉េត បិនណាយ្វេដែលមានអាយុ ៥៥ឆ្នំាបានស្ថិតលំដាប់ទី២ បន្ទាប់ពីមហាក្សត្រសាលម៉ានសព្វថ្ងៃដែលមានអាយុ ៧៩ឆ្នំា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ