ការបោះឆ្នោតប្រធានាធិបតីទុយនីស៊ី បេក្ខជនឈរឈ្មោះប្រកាសជ័យជំនះរៀងៗខ្លួន
ចុះផ្សាយនៅថ្ងៃ៖
ស្តាប់ - ០៥:៥៧
ទុយនីស៊ីបានបោះឆ្នោតជ្រើសរើសប្រធានាធិបតី ជុំទីពីរ នៅថ្ងៃអាទិត្យទី ២១ ធ្នូម្សិលមិញ។ រវាងលោក ម៉ុងសេហ្វ ម៉ារហ្ស៊ូគី Moncef Marzouki ប្រមុខរដ្ឋផុតអាណត្តិ និងលោក បេជី កាអ៊ីត អេសេបស៊ី Beji Caid Essebsi នៃគណបក្សនីដា ទួណែស តើនរណានឹងក្លាយជាប្រធានាធិបតីទុយនីស៊ីទីមួយដែលប្រសូតចេញពីការបោះឆ្នោត ? បើតាមការប៉ាន់ស្មានក្រោយពេលបិទហិបឆ្នោតភ្លាម ជោគជ័យនឹងធ្លាក់ទៅលើកណ្តាប់ដៃរបស់លោក អេសេបស៊ី ប៉ុន្តែក្រុមលោក Marzouki មិនទទួលស្គាល់ជោគជ័យនោះទេ ដោយសំអាងថាត្រូវរង់ចាំស្តាប់លទ្ធផលផ្លូវការ។
គ្រាន់តែការិយាល័យបោះឆ្នោតបិទទ្វារមិនទាន់ទាំងស្រួលបួលផង អ្នកទទួលខុសត្រូវម្នាក់របស់បក្សនីដាទួណែស Nidaa Tounes បានផ្តល់សន្និសីទកាសែតមួយ ប្រកាសអំពីជ័យជំនះរបស់បេក្ខជន អេសេបស៊ី ដោយសំអាងលើការស្ទង់មតិផ្ទាល់របស់បក្ស ប៉ុន្តែមិនបានលម្អិតអំពីភាគរយ ឬចំនួនសំឡេងដែលលោកអេសេបស៊ីទទួលបាននោះទេ។
ជាមួយនឹងការប្រកាសជ័យជំនះ ប្រធានការិយាល័យឃោសនារបស់លោក អេសេបស៊ី បានប្រកាសចាប់ផ្តើមការងារ ជាមួយអាទិភាពលើកកម្ពស់អភិវឌ្ឍន៍សេដ្ឋកិច្ចនិងសង្គម ព្រមទាំង បានអំពាវនាវឱ្យមានការរួបរួមជាតិ បោះដៃទៅរកគ្រប់ភាគី និងនិន្នាការនយោបាយក្នុងប្រទេស។ ពីទីស្នាក់ការបក្ស បេក្ខជនអេសេបស៊ី ផ្ទាល់ក៏បានថ្លែងអំណរគុណដល់ម្ចាស់ឆ្នោត និងសម្តែងគារវកិច្ចចំពោះគូប្រជែង តាំងខ្លួនជាអ្នកបង្រួបបង្រួមពិតៗ។
ប៉ុន្តែ សម្រាប់ខាងលោក ម៉ុងសេហ្វ ម៉ារហ្ស៊ូគី វិញ ដរាបណាលទ្ធផលផ្លូវការមិនទាន់ត្រូវបានប្រកាស គ្មានហេតុផលអ្វីដែលត្រូវទទួលស្គាល់ជ័យជំនះរបស់គូប្រជែងឡើយ។ ម្យ៉ាងទៀត បើតាមអ្នកនាំពាក្យបេក្ខជន ម៉ុងសេហ្វ ម៉ារហ្ស៊ូគី គេមិនអាចទុកចិត្តលើការស្ទង់មតិរបស់បក្សនីដាទួណែសបានទេ ព្រោះមិនមែនជាអ្នកឯកទេសខាងស្ទង់មតិ។ បេក្ខជនទាំងពីរបានទទួលការគាំទ្រយ៉ាងប្រកៀកប្រកិតបំផុត ដូច្នេះបើរាប់សន្លឹកឆ្នោតមិនទាន់អស់ គ្មានលទ្ធផលផ្លូវការ គឺមិនអាចនិយាយអំពីជោគជ័យបានឡើយ។
លោក អេសេបស៊ី និងម៉ារហ្ស៊ូគី ជានរណា ?
បេក្ខជនទាំងពីរ មានប្រវត្តិ និងជីវិតនយោបាយ សឹងថា ផ្ទុយគ្នាទាំងស្រុងតែម្តង ! កាលពីទុយនីស៊ីស្ថិតក្រោមរបបផ្តាច់ការប៊ិនអាលី លោក Moncef Marzouki ជាបក្សប្រឆាំងឆ្វេងនិយម និងជាអ្នកការពារសិទ្ធិមនុស្ស មានមុខរបរជាវេជ្ជបណ្ឌិត និរទេសខ្លួននៅប្រទេសបារាំង។ ក្រោយរដ្ឋប្រហារឆ្នាំ១៩៨៧ លោក Beji Caïd Essebsi ដែល មានតួនាទីជា រដ្ឋមន្ត្រីក្រសួងមហាផ្ទៃស្រេចទៅហើយនោះ បានក្លាយទៅជាប្រធានសភាទុយនីស៊ី មុននឹងងាកខ្លួនទៅផ្នែកការទូត។
ក្រោយបដិវត្តផ្កាម្លិះ បុរសទាំងពីរ បានវិលមកប្រលូកលើឆាកនយោបាយ។ លោក អេសេបស៊ី បានក្លាយជានាយករដ្ឋមន្ត្រីអន្តរកាល ដឹកនាំប្រទេសឱ្យមានការបោះឆ្នោតដោយសេរី។ លោក ម៉ារហ្ស៊ូគី ជាប្រធានាធិបតីបណ្តោះអាសន្ន ដោយសារមានសម្ព័ន្ធភាពជាមួយបក្សអ៊ីស្លាមនិយម Ennahda។ គឺនៅពេលនោះហើយដែលលោក អេសេបស៊ី បានបង្កើតបក្សនយោបាយ នីដាទួណែសឡើង និងក្លាយជាបក្សប្រឆាំង ជាបក្សមូលធននិយម ប្រឆាំងនឹងអ៊ីស្លាម។
ហេតុដូច្នេះហើយបានជាបេក្ខជនទាំងពីរ តំណាងឱ្យគន្លងនយោបាយពីរដាច់គ្នាស្រឡះ ៖ ខាងលោក Beji Caid Essebsi ជារនាំងប្រឆាំងនឹងពួកអ៊ីស្លាមជ្រុលនិយម ឯលោក Moncef Marzouki ជាអ្នកធានាប្រឆាំងនឹងការវិលត្រលប់នៃរបបចាស់ ផ្តាច់ការ។
ទុយនីស៊ី លើគន្លងប្រជាធិបតេយ្យ
ក្រោយបដិវត្តទម្លាក់របបផ្តាច់ការ ប៊ិនអាលី ទុយនីស៊ី បានរៀបចំបោះឆ្នោតសភា បន្ទាប់មកបោះឆ្នោតប្រធានាធិបតីដោយសេរី និងដោយផ្ទាល់ទៀត។
ពលរដ្ឋទុយនីស៊ី ប្រមាណ៥លាន៣សែននាក់ជាលើកទីមួយ ត្រូវជ្រើសរើសប្រមុខដឹកនាំរបស់តាមរយៈសន្លឹកឆ្នោត ដោយសេរី និងជាសកល។ ថ្វីបើនៅ ក្នុងការបោះឆ្នោតជុំទីពីរនេះ ចំនួនអ្នកចូលរួម មានប្រមាណត្រឹម ៥៦% ពោលគឺធ្លាក់ចុះបន្តិចបើប្រៀបទៅនៅការបោះឆ្នោតជុំទីមួយមែន តែបើតាមអ្នកសង្កេតការណ៍ឯករាជ្យ ការបោះឆ្នោតបានប្រព្រឹត្តទៅរលូន។
កាលពីល្ងាចថ្ងៃសៅរ៍ ក្រុមប្រដាប់អាវុធមួយក្រុម ដែលជាពួកជីហាតរដ្ឋអ៊ីស្លាមបានសាកល្បងវាយប្រហារសាលារៀនមួយនៅភាគខាងត្បូងរដ្ឋធានីទុយនីស ដើម្បីបំផ្លាញសម្ភារៈបោះឆ្នោត។ តែជាទូទៅ ការបោះឆ្នោតជុំទីពីរនេះប្រព្រឹត្តទៅក្នុងស្ថានភាពស្ងប់ស្ងាត់ល្អ !
ចរន្ត យន្តការបោះឆ្នោត ដែលនឹងត្រូវបិទបញ្ចប់នយោបាយអន្តរកាលនៅ ទុយនីស៊ី ដែលក្នុងអំឡុងពេលនេះ ប្រទេសត្រូវរងការវាយប្រហារពីសំណាក់ចលនាជីហាត វិបត្តិនយោបាយផ្ទៃក្នុងផ្ទួនៗគ្នា តែទុយនីស៊ី អាចបញ្ជៀសបាននូវភាពវឹកវរ ការបង្ក្រាប អំពើហិង្សា មិនដូចជាបណ្តាប្រទេសអារ៉ាបផ្សេងទៀត។
ដំណើរការបោះឆ្នោតប្រព្រឹត្តទៅបានល្អ រឹតតែអាចជួយពង្រឹងទុយនីស៊ីឱ្យកាន់តែជឿជាក់។ ហើយក្រោយពេលប្រកាសលទ្ធផលជាផ្លូវការ (យ៉ាងឆាប់នៅល្ងាចថ្ងៃចន្ទនេះ និងយ៉ាងយូរនៅថ្ងៃពុធទី ២៤ធ្នូ) បើបេក្ខជនជាគូប្រជែងទទួលយកដោយស្មោះស្ម័គ្រទាំងអស់គ្នា នោះស្ថិរភាពនយោបាយនឹងអាចកើតមានបានជាប្រាកដនៅទុយនីស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ