តួកគីបានបញ្ជូនជំនួយជាសម្ភារៈយោធាទៅឲ្យទ័ពអ៊ីរ៉ាក់
តំាងពី ២ថ្ងៃមកហើយដែលទាហានអ៊ីរ៉ាក់ប្រមាណជា ៣ម៉ឺននាក់កំពុងវាយប្រហារលើពួកជីហាតនៃអង្គការរដ្ឋអ៊ីស្លាមដើម្បីដណ្តើមយកទីក្រុងទីគ្រីត (Tikrit) មកវិញ។ ទីក្រុងទីគ្រីតដែលមានចម្ងាយប្រមាណជា ១៦០គីឡូម៉ែត្រស្ថិតប៉ែកខាងជើងទីក្រុងបាកដាដ។ នៅក្នុងប្រតិបត្តិការសឹកនោះ ទ័ពអ៊ីរ៉ាក់អាចពឹងពាក់លើជំនួយរបស់ប្រទេសអ៊ីរ៉ង់ និងប្រទេសតួកគី។ តួកគីដែលទើបបានបញ្ជូនសម្ភារៈយោធាចំនួន ២យន្តហោះទៅកាន់ប្រទេសអ៊ីរ៉ាក់។ នេះជាភស្តុតាងដែលបង្ហាញយ៉ាងច្បាស់ពីការចូលរួមដោយផ្ទាល់របស់ទីក្រុងអង់ការ៉ាក្នុងការប្រយុទ្ធប្រឆំាងនឹងអង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
រហូតមកដល់ពេលនេះ តួកគីតែងតែបានអាល់អែក រារែកមិនចង់ចូលប្រឡូកជាមួយកម្លំាងសម្ព័ន្ធមិត្តក្នុងការប្រយុទ្ធប្រឆំាងនឹងពួកជីហាតអង្គការរដ្ឋអ៊ីស្លាមទេ។ តែជាមួយនឹងការបញ្ជូនសម្ភារៈយោធាចំនួន ២យន្តហោះទៅឲ្យទាហានអ៊ីរ៉ាក់ដែលកំពុងប្រយុទ្ធដណ្តើមយកទីក្រុងទីគ្រីតត្រឡប់វិញពេលនេះ ជាសក្ខីកម្មមួយដែលបញ្ជាក់យ៉ាងពីការចូលរួមជាចំហ និងផ្លូវការពីរដ្ឋាភិបាលទីក្រុងអង់ការ៉ា។ ទន្ទឹមនឹងការជួយទាហានអ៊ីរ៉ាក់ក្នុងការដណ្តើមយកទីក្រុងទីគ្រីត តួកគីក៏បានប្រកាសឲ្យដឹងពីការត្រៀមខ្លួនជួយទាហានអ៊ីរ៉ាក់ដើម្បីវាយដណ្តើមយកទីក្រុងម៉ូស៊ូលពីពួកជីហាតដែរ។ ប្រតិបត្តិការវាយយកទីក្រុងម៉ូស៊ូលដែលគ្រោងនឹងចាប់ផ្តើមនៅ ១ខែ ឬ ២ខែខាងមុខ។
ជំនួយនៅក្នុងជំហានដំបូងរបស់តួកគីសម្រាប់បំពាក់ឲ្យទាហានអ៊ីរ៉ាក់ប្រមាណជា ៥០០នាក់ពេលនេះ មានដូចជាខោអាវ មួក ភួយ ឬមួយក៏ជំរំសំពត់សម្រាប់រដូវរងា។ គួរជម្រាបជូនថា សេចក្តីសម្រេចរបស់តួកគីក្នុងការផ្តល់ជំនួយយោធាឲ្យអ៊ីរ៉ាក់ពេលនេះបានធ្វើឡើង បន្ទាប់ពីលោករដ្ឋមន្រ្តីការពារជាតិតួកគីបានទៅបំពេញទស្សនកិច្ចចំនួន ២ថ្ងៃក្នុងប្រទេសអ៊ីរ៉ាក់ និងក្រោយពីសមភាគីអ៊ីរ៉ាក់បានទៅទស្សនកិច្ចនៅតួកគីកាលពីមួយសប្តាហ៍កន្លងទៅ។ លោករដ្ឋមន្រ្តីការពារជាតិតួកគីបានធ្វើអត្ថាធិប្បាយថា តួកគីក៏ជាប្រទេសនៅក្នុងកម្លំាងសម្ព័ន្ធមិត្តដែរ និងថា ជំនួយរបស់តួកគីសម្រាប់ទាហានអ៊ីរ៉ាក់ពេលនេះ គឺជាការចូលរួមដោយផ្ទាល់។ កន្លងមក រដ្ឋអំណាចតួកគីក៏បានបើកមូលដ្ឋានផ្លូវអាកាសឲ្យកម្លំាងសម្ព័ន្ធមិត្តប្រើប្រាស់ដែរ។
ដោយឡែក លោកប្រមុខរដ្ឋាភិបាលតួកគីបានគូសបញ្ជាក់ថា បេសកកម្មដើម្បីដណ្តើមយកវិញ និងធ្វើឲ្យមានស្ថិរភាពនៅទីក្រុងម៉ូស៊ូលក្នុងប្រទេសអ៊ីរ៉ាក់ គឺជាកាតព្វកិច្ចមិនអាចខ្វះបានរបស់តួកគី ព្រោះក្រុមជីហាតរដ្ឋអ៊ីស្លាមក៏បានគំរាមកំហែងសន្តិសុខរបស់តួកគីដែរ។ ដោយនិយាយមិនលាក់លៀម នាយករដ្ឋមន្រ្តីតួកគីបានទម្លាយឲ្យដឹងថា តួកគីត្រៀមខ្លួនជួយអ៊ីរ៉ាក់តាមគ្រប់មធ្យោបាយទំាងអស់។ បើយោងតាមសម្តីរបស់ឧបនាយករដ្ឋមន្រ្តីតួកគីដែលបានជួបសន្ទនាជាមួយអតីតចៅហ្វាយក្រុងម៉ូស៊ូលឲ្យដឹងថា មានកិច្ចព្រមព្រៀងបានចុះហត្ថលេខាដោយតួកគីបានយល់ព្រមផ្តល់អាវុធ និងជួយហ្វឹតហ្វឺនកម្លំាងស្វាយត្រានអ៊ីរ៉ាក់ចំនួន ៣ ០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ