អន្តរការីរបស់អ.ស.ប.ទៅដល់ស៊ីរីដើម្បីចរចាឲ្យដាក់អាវុធបណ្តោះអាសន្ននៅតំបន់ អាឡេប
លោកមីស្ទូរ៉ា អន្តរការីតំណាងឲ្យអង្គការសហប្រជាជាតិ បានធ្វើដំណើរដល់ក្រុងដាម៉ាសហើយ នៅថ្ងៃ អាទិត្យនេះ ដើម្បីចរចាជាមួយភាគី ស៊ីរី ទាក់ទិនទៅនឹងការបង្អង់ ឈប់បាញ់បណ្តោះអាសន្ន នៅតំបន់ក្បែរក្រុងអាឡេប ដើម្បីអនុញ្ញាតឲ្យ ក្រុមស្ម័គ្រចិត្តរបស់អង្គការមនុស្សធម៌ យកជំនួយទៅជួយ ប្រជាជន នៅតំបន់នោះ។ គំនិតនេះ ត្រូវបានរដ្ឋាភិបាលក្រុងដាម៉ាសរបស់ លោកបាឆា អាល់អាសាដគាំទ្រ ហើយបានឲ្យភ្លើងខៀវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
លោក Staffan de Misturaអន្តរការីពិសេស ទទួលបន្ទុកកិច្ចការស៊ីរី ដែលអង្គការសហប្រជាជាតិ បានតែតាំងកាលពីខែកក្កដាឆ្នាំទៅ បានធ្វើការស្នើសុំទៅ រដ្ឋាភិបាលស៊ីរី ដែលដឹកនាំដោយលោក បាឆា អាល់អាសាដ ឲ្យធ្វើការដាក់អាវុធឈប់បាញ់បណ្តោះអាសន្ន នៅតាមតំបន់មួយចំនួន។ ការផ្អាកឈប់បាញ់បណ្តោះអាសន្ននេះ នឹងអនុញ្ញាតឲ្យក្រុមការងារមនុស្សធម៌ ដូចជាអង្គការស្បៀងអាហារពិភពលោក យកជំនួយបន្ទាន់ ទៅជួយប្រជាជនស៊ីរី ដែលកំពុងតែរងទុក្ខ ហើយត្រូវសង្គ្រាមហ៊ុំព័ទ្ធ ទៅណាមិនរួច។
លោក មីស្ទូរ៉ា បានជួបជាមួយលោក វ៉ាលីដ មូអាលេម រដ្ឋមន្រ្តីការបរទេស ស៊ីរី ដែលបានផ្តល់ការយល់ព្រមថា ទាហានរដ្ឋាភិបាលស៊ីរី នឹងធ្វើការឈប់បាញ់បណ្តោះអាសន្ន នៅតំបន់ក្បែរក្រុង អាឡេប ហើយនឹង អនុញ្ញាត ឲ្យគណប្រតិភូររបស់អង្គការសហប្រជាជាតិ ចាប់ផ្តើមការងាររបស់ខ្លួនបាន។ កាលពីការចរចា នៅដើមខែ កុម្ភៈ បាឆា អាល់អាសាដ ថាសុខចិត្តព្រមផ្អាកការបាញ់ប្រហារ រយៈពេល ៦សប្តាហ៍ ដើម្បីឲ្យក្រុមការងារ របស់អង្គការសហប្រជាជាតិ ចុះទៅធ្វើការពិនិត្យស្ថានការ អំពីការខូចខាត និងយកជំនួយទៅជួយប្រជាពលរដ្ឋ។
លោក មីស្ទូរ៉ា បានបញ្ចាក់ថា ក្រុមការងារលោក ចង់ចុះទៅក្រុងអាឡេប ឲ្យបានកាន់តែឆាប់កាន់តែល្អ។ លោកបន្ថែមថា លោកមានចេតនាយកក្រុងអាឡេបជាគំរូ ក្នុងការផ្អាកការប្រយុទ្ធគ្នា ដើម្បីឲ្យភាគីទាំងអស់ យកពេលវេលាទៅគិត និងចរចាគ្នាស្វែងរកដំណោះស្រាយតាមផ្លូវនយោបាយ ជាជាងការបាញ់សម្លាប់គ្នា។ លោកសង្ឃឹមថា គម្រោងការនេះ នឹងត្រូវដាក់អនុវត្តនៅតាមតំបន់ផ្សេងៗទៀត ជាបន្តបន្ទាប់។
សូមរំលឹកថា បើរាប់ដល់ថ្ងៃទី ១៥ ខែមិនានេះ សង្គ្រាមស៊ីវីលនៅស៊ីរី បានអូសបន្លាយពេលអស់ ៥ឆ្នាំហើយ។ សង្រ្គាមដែលដើមឡើយកើតចេញពីការតវ៉ា របស់ប្រជាជននិងក្រុមប្រឆាំង ដែលទ្រាំលែងបាន នឹងរបបផ្តាច់ការ ពុករលួយរបស់លោកបាឆា អាល់អាសាដ។ កងកម្លាំងរដ្ឋាភិបាលរបស់បាឆា អាល់អាសាដ រវល់តែជាប់ដៃប្រឈមមុខដាក់គ្នា ជាមួយនឹង ក្រុមឧទ្ទាមប្រឆាំង បានធ្វើឲ្យ ក្រុមជីហាតអ៊ីស្លាមជ្រុលនិយម ដែលមានដើមកំណើតនៅអ៊ីរ៉ាក់ មានឱកាស ពង្រីកឥទ្ធិពល និងបានគ្រប់គ្រងដែនដីមួយភាគធំ នៅភាគខាងជើង។ ពួកជីហាតអ៊ីស្លាម ធ្វើការវាយប្រហារ ទាំងទៅលើក្រុមឧទ្ទាមប្រឆាំងរបបបាឆាអាល់អាសដ ទាំងទៅលើទាហានរដ្ឋាភិបាលរបស់បាឆាអាល់អាសាដផ្ទាល់។ ភាគីទាំងបី ធ្វើការវាយបកគ្នា ទៅវិញទៅមក ដោយពុំមាននរណាម្នាក់ មានចេតនាស្វែងរក ដំណោះស្រាយនយោបាយឡើយ។
អស់រយៈពេល៥ឆ្នាំមកនេះ សង្គ្រាមនៅស៊ីរី បានសំលាប់ជីវិតជនស្លូតត្រង់ ប្រមាណជា ២២ម៉ឺននាក់ ព្រមទាំងជាច្រើនលាននាក់ទៀត ត្រូវបង្ខំចិត្តរត់ភៀសខ្លួន នៅតាមប្រទេសជិតខាង។ ដរាបណាគ្មានដំណោះស្រាយនយោបាយ សង្គ្រាមគ្មានថ្ងៃនឹងបញ្ចប់នោះទេ។ អ្នកតំណាងរបស់ក្រុមប្រឆាំងនឹងរបបបាឆា អាល់អាសាដ ដែលបានផ្តុំបក្សពួកខ្លួននៅក្រៅប្រទេស បានបញ្ជាក់ថា ការប្រជុំនៅក្រុងគែរ នៅថ្ងៃទី ១៧ មេសា ខាងមុខនេះ មានសារៈសំខាន់ខ្លាំងណាស់។ ប៉ុន្តែអ្វីដែលចោទជាបញ្ហា គឺភាគីទាំងអស់ នៅមិនទាន់ចុះសម្រុងគ្នា ទាក់ទិននឹងតួនាទីរបស់ក្រុម ភាតរៈអ៊ីស្លាម ដែលជាផ្នែកមួយ នៃក្រុមប្រឆាំងនឹង របបបាឆាអាល់អាសាដ។ អេហ្ស៊ីប និងក្រុមប្រឆាំងក្នុងស៊ីរី ចាត់ទុកក្រុមនេះ ជាក្រុមឧទ្ទាម ដែលមិនគួររាប់រកទេ ប៉ុន្តែ តួគី ព្រមទាំងក្រុមចំរុះ ដែលនិរទេសខ្លួននៅក្រៅស្រុកវិញ មានចេតនាគាំទ្រក្រុមភាតរៈអ៊ីស្លាមនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ